Pfizer Ақ үймен баға туралы келісімге келді. Акциясы 6% шарықтады
Америкалық фармацевтика алыбы Pfizer АҚШ-тағы бірқатар рецептуралық дәрілердің бағасын төмендетуге, сондай-ақ, америкалық нарыққа арналған өндірісті жергілікті етуге келісті. Бұдан бөлек, компания АҚШ-тағы жобалар мен зерттеулерге $70 млрд инвестиция салу жоспарын растады. Ал оған жауап ретінде Дональд Трамп Pfizer-ге импорттық дәрілерге 100 пайыздық баж салығын төлеуден үш жылға босатты. Осы жаңалықтан кейін компанияның және басқа да фармацевтика алпауыттарының акциясы 2–6% күрт өсті.
Егжей-тегжейлі
Дональд Трамптың хабарлауынша, Pfizer барлық америкалықтар үшін бірқатар рецептуралық дәрілердің бағасын, сондай-ақ, аз қамтылғандарға арналған мемлекеттік Medicaid бағдарламасындағы дәрілердің бағасын төмендетеді, деп хабарлайды CBS News. Ақ үйдің бағалауынша, Pfizer бағасын төмендету шамамен 100 млн науқасқа көмектесуі мүмкін. Трамп кейбір дәрілердің құны 50–100% қысқаруы мүмкін екенін атап өтті, бұл америкалықтарға және салық төлеушілерге жыл сайын жүздеген миллион доллар үнемдеуге мүмкіндік береді. Бағаны төмендету «бірден» күшіне енеді, деді президент.
«Енді Pfizer-дің барлық жаңа дәрілері америкалық нарықта басқа елдер деңгейінде — ұзақ жылдар бойы әлдеқайда аз төлеген бағамен сатылады», — деді Трамп Ақ үйдегі баспасөз мәслихатында. Оның сөзінше, бұл дәрілер TrumpRx деп аталатын мемлекеттік сайтта онлайн сатып алу үшін қолжетімді болады.
Президенттің бұл мәлімдемесі сәрсенбі күні айтқан хабарынан бірнеше күннен кейін жасалды. Ол кезде АҚШ егер брендтік және патенттелген дәрілер ел ішінде өндірілмесе, оларға 100 пайыздық баж салығы енгізілетінін жариялаған еді. Өз кезегінде Pfizer америкалық нарыққа арналған дәрілер өндірісін АҚШ-қа көшіруге келісіп, алдағы жылдары елде капиталдық жобалар мен зерттеулерге қосымша $70 млрд бағыттайтынын баспасөз хабарламасында растады. Осы келісім аясында фармацевтика алыбы баж салығынан үш жылдық жеңілдік алды. Ақ үйдегі Оваль кабинетінде президенттің жанында болған Pfizer бас директоры Альберт Бурла баж салығының қатерінің шешуші фактор болғанын атап өтті. «Президенттің айтқаны дұрыс — баж салығы компаниялардың мінез-құлқын өзгертуге арналған ең қуатты құрал. Ол бізге де сөзсіз әсер етті», — деді ол.
Трамп сонымен бірге, әкімшілігі басқа компаниялармен де жақын арада «осындай келісімдерге» қол қою үшін жұмыс істеп жатқанын айтты. Оның айтуынша, Ақ үймен келіссөз жүргізіп жатқан компаниялардың қатарында Eli Lilly бар, деп жазады The Wall Street Journal.
Акция қалай қозғалды?
30 қыркүйектегі саудада Pfizer акциясы 6,2% күрт өсіп, $25,4-ға жетті. Бұл 25 тамыздан бергі ең жоғарғы көрсеткіш болды. Дегенмен, 2025 жылдың басынан бері компанияның нарықтық құны 4,5% минуста қалып отыр. Салыстыру үшін: АҚШ-тың басты S&P 500 қор индексі осы кезеңде шамамен 13% өсті.
Pfizer-ден бөлек, басқа да фармкомпаниялардың акциясы қымбаттады. Мысалы, вакциналар мен онкологиялық препараттар өндіруші Merck акциясы да 6%-дан астам күрт өсті. Онкология және иммунология саласына маманданған Bristol Myers Squibb акциясы 2,2% өсті. Қатерлі ісік пен қан ауруларына қарсы дәрілер шығаратын биотех-компания Amgen акциясы 2,7% қымбаттады. Респираторлық ауруларға қарсы дәрілер мен вакциналарымен танымал британдық GSK акциясы да 3,7% қымбаттады, сондай-ақ, диабет пен сирек кездесетін ауруларға қарсы препараттар өндіретін француздық Sanofi депозитарлық түбіртегі 2,3% өсті.
