Pizza Hut 2,7 миллиард долларға сатылмақ. Бұл қазіргі иесінің бизнесіне қандай әсер етеді?

Yum! Brands компаниясы Pizza Hut желісін 2,7 миллиард долларға сатуды жоспарлап отыр, бұл жылдар бойы компанияның қаржылық көрсеткіштеріне кедергі келтіріп келген активтен арылуға мүмкіндік береді. Сатып алушылар – инвестициялық фирма LongRange Capital және Yum China. Сату туралы жаңалықтан кейін Yum! Brands акцияларының бағасы күрт өсті.

Yum! Brands хабарлағандай, Pizza Hut-тың Қытайдан тыс бизнесі LongRange Capital компаниясына 1,5 миллиард долларға сатылады, ал Yum China желінің Қытай бөлімшесін 1,2 миллиард долларға сатып алады. Салықтар, алымдар және басқа да шығындар төленгеннен кейін таза түсім шамамен 2,3 миллиард долларды құрайды деп күтілуде. Мәмілелер реттеуші органдардың мақұлдауына байланысты 2026 жылдың үшінші тоқсанында аяқталады деп күтілуде.

Компания мәлімдегендей, бұл мәміле Yum! Brands-қа негізгі брендтерін дамытуға және акционерлердің мүддесін арттыруға мүмкіндік береді, ал Pizza Hut мейрамхана индустриясында тәжірибесі бар иелерді табады, олар негізгі нарықтарда желіні дамытуға көбірек көңіл бөле алады.

Осылайша Pizza Hut-тың Yum құрамында болған шамамен 30 жылдық тарихы аяқталды. Бұл желі 1977 жылдан бастап PepsiCo компаниясының мейрамхана бизнесінің құрамында болды, ал 1997 жылы бұл бөлім бөлініп, жеке компанияға айналғаннан кейін, CNBC атап өткендей, ол KFC пен Taco Bell-пен бірге болашақ Yum! Brands портфеліне енді.

Соңғы кездері Pizza Hut Yum компаниясының ең әлсіз активіне айналды. Bloomberg мәліметі бойынша, бұл желінің компанияның жалпы табысындағы үлесі 2019 жылғы 18 пайыздан 2025 жылы шамамен 12 пайызға дейін төмендеді. Агенттік мәліметінше, Pizza Hut сатылымдары 1 миллиард доллардан сәл жоғары деңгейде қалса, Yum компаниясының жалпы табысы соңғы алты жылда шамамен 47%-ға өсіп, 8,2 миллиард долларға жеткен.

GlobalData басқарушы директоры Нил Сондерстің айтуынша, бұл желі АҚШ нарығындағы негізгі бәсекелесі Domino's-тың жеткізу қызметін дамыту, цифрлық қызметтер, маркетинг және мәзірді жаңарту бойынша озып кетуі салдарынан қысымға ұшырап отыр. «Pizza Hut-тың нәтижелері жалпы алғанда көңіл көншітпейді. KFC пен Taco Bell-дің мықты көрсеткіштері Pizza Hut-тың сатылымдары мен пайдасының үздіксіз төмендеуінің көлеңкесінде қалып отыр», – деп түсіндірді Сондерс.

CNBC мәліметі бойынша, DoorDash сияқты жеткізу қызметтері бәсекені одан әрі күшейтті. 2025 жылы компания Domino's Pizza-мен серіктестік туралы келісім ге келді. Алайда Pizza Hut дәстүрлі мейрамхана форматынан – тамақтанатын залдары мен салат-барлары бар – жеткізу мен алып кету тапсырыстарына бағытталған модельге өтуде баяу болды, – деп хабарлайды телеарна.

Yum! Brands акциялары 16 маусымдағы сауда сессиясында 3,6%-ға өсті, бірақ сессияны 2%-ға өсумен аяқтады. Жыл басынан бері компанияның нарықтық капитализациясы 4,2%-ға артты.

MarketWatch мәліметі бойынша, оның акциялары үшін орташа мақсатты баға 174 АҚШ долларын құрайды, бұл шамамен 10%-дық өсім әлеуетін көрсетеді. Уолл-стрит консенсусы сақтықпен қарайды: 12 сарапшы Yum! Brands акцияларын сатып алуды ұсынса, тағы 17-еуі оларды портфельде ұстауды кеңес береді. Ешкім сатуды ұсынбайды.