Rivian робот-такси үшін өз ЖИ-чипін әзірледі. Nvidia үшін не білдіреді?
Rivian Automotive электромобиль өндірушісі автономды жүргізу жүйесіне арналған өз ЖИ-чипін таныстырды. Чип компанияның жаңа жол талғамайтын көліктерінде Nvidia шешімдерінің орнын басады. Rivian түпкі мақсаты — автономды жүргізу жүйелері нарығына дербес ойыншы ретінде шығу. Nvidia үшін бұл тек 2025 жылы 50 мың электромобильге арналған чиптерге берілген ірі тапсырысынан айырылуды ғана емес, автомобильдік жартылай өткізгіштер нарығында жаңа бәсекелестің пайда болуын да білдіруі мүмкін.
Егжей-тегжейлі
Rivian компаниясы 11 желтоқсанда хабарлағандай, жаңа Rivian R2 жол талғамайтын көліктері Rivian Autonomy Processor 1 (RAP1) деп аталатын өздерінің ЖИ-чипімен және жаңа лидармен жабдықталады. Чиптерді контракт бойынша Taiwan Semiconductor Manufacturing Co. (TSMC) өндіреді. Өз ЖИ-чипінің, лидардың және жаңартылған бағдарламалық қамтылымның біріктірілуі Rivian-ға болашақта толық автономды жүргізу функциясын іске асыруға мүмкіндік береді деп күтіледі, деп жазды Bloomberg.
Екі RAP1 чипі жаңа Autonomy Compute Module 3 борттық жүйесіне орнатылады. Жүйе секундына 5 млрд пиксельді өңдей алады және Rivian R1 модельдерінде қолданылып жүрген Nvidia чиптеріне негізделген платформадан төрт есе жоғары өнімділік береді. Қазіргі таңда компания жүргізуші бақылауын үнемі талап ететін көмекші жүйелерді ғана ұсынады.
Үшінші тоқсан есебінде Rivian жылдық жеткізілімі 41 500–43 500 автомобиль болады деп болжам жасаған. Негізінен бұл R1 пикаптары. R2 моделінің жаппай өндірісі 2026 жылғы бірінші жартыжылдықта басталады, бірақ алғашқы машиналар RAP1 чипінсіз және лидарсыз шығады, сондықтан автономды жүргізу мүмкіндігі шектеулі болады, деп жазады Bloomberg. 2027 жылдан бастап Rivian жүргізушінің рөлді ұстап тұруы мен жолды бақылауын талап етпей, көліктің нүктеден нүктеге өздігінен жүріп өтетін бағдарламалық қамтылымын кезең-кезеңімен енгізуді жоспарлап отыр. Алдымен бұл функциялар автомагистральдарда іске қосылады, кейін басқа жол түрлеріне де таралады. Компания автопилот қызметін ақылы етуді көздейді, әрі айлық жазылым Tesla-нан екі есе арзан болады: $49,99 қарсы $99.
Rivian түпкі мақсаты — автономды көлік нарығына шығу және бағдарламалық қамтылымды жазылым арқылы сату, деп жазды CNBC. Бұл Google-дың Waymo және Tesla Robotaxi технологиялары деңгейіне сәйкес келеді.
Nvidia үшін не білдіреді?
Автономды жүргізу жүйелерін әзірлеп жатқан автокомпаниялардың басым бөлігі өз шешімін жасау өте қымбат әрі технологиялық тұрғыда күрделі болғандықтан, Nvidia, Mobileye немесе Qualcomm сияқты сыртқы өндірушілердің чиптеріне сүйеніп келді, деді Bloomberg. Ал тәуелсіз жұмыс істейтін жалғыз ірі өндіруші — Tesla, өйткені ол электромобильдеріне арналған ЖИ-чиптерді өзі шығарады.
Nvidia дата-орталықтарға арналған жартылай өткізгіштер нарығында үстемдікке ие, ал автомобиль бизнесі компания табысының 1%-ынан да аз үлес қосты. Соған қарамастан, компания бұл бағытты күшейтуге тырысып келеді. Үшінші тоқсан есебінде Nvidia автомобильдер мен роботтарға арналған чиптерден түскен табыс $592 млн болғанын, бұл көрсеткіштің жылдық негізде 32% өскенін хабарлады.
MarketsandMarkets бағалауынша, жаһандық автомобильдік жартылай өткізгіштер нарығы 2025 жылғы $77,4 млрд деңгейінен 2030 жылы $133 млрд-қа дейін өседі. Бұл секторды ЖИ-шешімдер жеткізушілерінің барлығы үшін стратегиялық маңызды салаға айналдырады.
Rivian ахуалы
Rivian 2021 жылы АҚШ тарихындағы ең ірі IPO-лардың бірі аясында биржаға шықты. Компания толық өлшемді электрлі пикаптар мен жол талғамайтын көліктерді алғашқы болып шығарғандықтан, Tesla-ның әлеуетті бәсекелесі ретінде қабылданды, деп еске салды Bloomberg. Алайда кейін Rivian операциялық қызметте қиындықтарға тап болды: Иллинойстағы оның жалғыз зауыты 2025 жылы 50 000-нан аз автомобиль шығарады — бұл жобалық қуатынан әлдеқайда төмен.
Капиталдың қарқынды жұмсалуы аясында компания бірнеше рет штат қысқартты, ал оның акциялары листингтен кейінгі ең жоғары деңгейден 80%-дан астам құлдырады. Соған қарамастан, Volkswagen бағдарламалық қамтылым мен электроника саласындағы Rivian тәжірибесін пайдалану үшін компанияға шамамен $6 млрд инвестиция салып, бірлескен кәсіпорын құрды. Қазір екі компания Rivian and VW Group Technology шеңберінде жаңа модельдер мен платформалар әзірлеуде.
Наурыз айында Rivian қысқа қашықтықтарға арналған шағын электркөлік шығаратын Also атты стартапты іске қосатынын жариялады.
Акция ахуалы
Бейсенбі күнгі саудада Rivian акциясы 6% құлдырап, $16,6-ға дейін түсті. Жыл басынан бері олар 25%-дан астам қымбаттаған. MarketWatch дерегінше, автокомпания қағазын 27 сарапшы қадағалап отыр. «Бейтарап» позицияда — 14, «сатып алуға» — 7, ал «сатуға» — 6 сарапшы кеңес берді. Уолл-стриттің консенсус бағасы — $14,9, бұл 11 желтоқсандағы жабылудан 10% төмен.
Nvidia акциясы Oracle-дың нарықты көңіл қалдырған есебінен кейін ЖИ-секторындағы жалпы сатылым аясында 1,5% жоғалтты.
