Guggenheim Rivian акцияларына «бұқалық» сценарийден бас тартты. Енді болжам қандай?
Guggenheim инвестициялық банкі электрлі көлік өндіруші Rivian компаниясының акцияларын сатып алуға берген ұсынымынан бас тартып, олардың рейтингін бейтарап деңгейге түсірді. Мұндай шешімге бірнеше себеп түрткі болды: электромобиль сатып алуға берілетін салықтық жеңілдіктердің жойылуы, компанияның пикап модельдерінің әлсіз сатылымы және Rivian енді басқа автокомпанияларға көміртек квоталарын сату арқылы пайда таба алмауы мүмкін. Компания үшін 2026 жылы жаңа модельдер шыққанға дейінгі кезең қиын болады, деп санайды Инвестбанк.
Егжей-тегжейлі
Guggenheim сарапшысы Рональд Евсиков Rivian акцияларының рейтингін «сатып алу» (Buy) деңгейінен бейтарап (Hold) деңгейге төмендетті, дейді Barron's. Сонымен қатар ол акцияға берген мақсатты бағасын $16 деңгейінде растады — бұл соңғы жабылу бағасымен салыстырғанда 25% өсім әлеуетін білдіреді.
Дүйсенбі күнгі саудада Rivian Automotive қағаздары 2,5% төмендеп, 12,8 долларға арзандады.
Guggenheim-нің көңілінен не шықпады?
АҚШ президенті Дональд Трамптың «Үлкен әрі керемет» заңы электромобиль сатып алған кезде берілетін $7500 көлеміндегі салықтық жеңілдікті алып тастайды. Бұл шара қыркүйек айында күшіне енеді және сарапшылардың пікірінше, бұл барлық электрокарлардың сатылым өсіміне кедергі келтіруі мүмкін.
Rivian компаниясының жағдайы 2025 жылы онсыз да күрделі. Компания R1S және R1T модельдерінің шамамен 43 000 данасын сатуды жоспарлап отыр, бұл 2024 жылмен салыстырғанда 18% аз. Ол кезде R1 пикаптарының бұрынғы нұсқасы жеткізілген болатын. Ал арзан бағалы R2 және R3 модельдерінің шығуы тек 2026 жылға жоспарланған.
«R1 сериясының сатылымының баяулығы мен Трамптың салық заңы R2/R3 пикаптарының сатылымы бойынша бұрынырақ болжанған бұқалық сценарийімізге іргелі және имидждік тұрғыда тәуекел төндіреді. Бұл факторларды елемеуге болмайды», – деп жазды сарапшы Barron’s келтірген жазбада.
Компания үшін қосымша тәуекел — экологиялық реттеу ережелерінің өзгеруі. Конгресс Калифорния штатының көміртек шығарындыларын бақылау бойынша өкілеттігін шектеуі мүмкін. Бұл негізінде Rivian өз электромобильдері үшін көміртек квоталары түрінде несие алып, оларды іштен жанатын қозғалтқышы бар көлік шығаратын басқа автокомпанияларға сатады.
Guggenheim болжамынша, енді Rivian 2028 жылы 150 000 көлік сатады. Бұған дейінгі болжам — 185 000 еді. Бұл нарықтық консенсустен әлдеқайда төмен, деп жазады Barron’s. FactSet дерегінше, сарапшылар орта есеппен 2028 жылы Rivian 282 000 пикап жеткізеді деп күтеді. Бірақ бұл көлемнің өзі де компанияны операциялық пайдаға шығаруға жеткіліксіз, деп атап өтеді басылым.
Жаппай өндіріспен айналысатын автокомпаниялар залалсыздық шегіне шығу үшін кем дегенде 400 000 көлік сату қажет. Бұл дәстүрлі де, электрлі көліктер үшін де әділетті, дейді Barron’s.
Бәрі расымен үмітсіз бе?
Электрлі көлік сатып алуға берілетін субсидияның АҚШ-та жойылуы барлық автокөлік өндірушілердің бәріне әсер етпейді, деп мәлімдеді BNP Paribas сарапшысы Джеймс Пикариелло 3 шілдеде. Оның айтуынша, General Motors, Ford, Hyundai және Kia соңғы жылдары электромобиль өндірісін айтарлықтай көбейтті. Алайда, BNP сарапшысы бұл күш-жігердің мемлекеттік қолдаусыз және тұтынушылық сұраныс әлсіреген жағдайда баяулауы мүмкін екенін атап өтті. Ал электромобиль өндірісіне толық назарын аударған Rivian, Lucid және Tesla секілді компаниялар үшін бұл жағдай нарықтағы үлесін арттыру мүмкіндігіне айналуы мүмкін, деп болжайды Пикариелло.
Трамп қол қойған заң электрлі көліктер секторы үшін акцияларды қайта бағалауға жол ашуы мүмкін. Бұл сектор жыл басынан бері макроэкономикалық тәуекелдер мен баж салығына қатысты белгісіздік аясында төмендеп келеді, деп жазады Bloomberg.
Қазіргі уақытта Уолл-стриттегі сарапшылардың Rivian акцияларына деген ұстанымы сақтықпен қарайтын сипатта. Тек әрбір төртінші сарапшы ғана бұл қағаздарды сатып алуға кеңес береді, MarketWatch. Ал 61%-ы Guggenheim сияқты бейтарап позицияда, тағы төрт сарапшы сатуға кеңес берген. Уолл-стрит сарапшыларының орташа мақсатты бағасы бір акция үшін 15 доллардан сәл төмен, бұл соңғы жабылу бағасынан шамамен 16% жоғары. Бірақ соңғы бір жылда компанияның құны 28% қысқарды.
