Roche акциясы 1997 жылдан бергі ең мықты айды көрсетті. Ралли жалғаса ма?
Швейцариялық Roche дәрі өндірушісінің акциясы соңғы ондаған жылдағы ең мықты айлық өсімді көрсетті. Нарық жаңа препараттарға қатысты үміттендірер деректерді оң қабылдап, компанияны алдағы жылдары фарма секторындағы ықтимал көшбасшы ретінде қарастырып отыр. Енді сұрақ — Roche бәсекелестік пен денсаулық сақтау секторындағы өзгерген көңіл-күй жағдайында өсімді жалғастыра ала ма?
Егжей-тегжейлі
Roche қағазы қараша айында 19% қымбаттады. Бұған себеп, компанияның сүт безі ісігіне қарсы әзірленіп жатқан тәжірибелік препаратына қатысты оптимизм мен оның сынақтарынан шыққан үміттендірер нәтижелері, деп жазды Bloomberg. Бұл фармгигант акциясы үшін 1997 жылдан бергі ең мықты ай болды, деді агенттік.
18 қарашада Roche өзінің giredestrant препараты сүт безі қатерлі ісігінің ерте сатысында тиімді болғанын хабарлады. Бұған дейін компания басқа да дәрілерді сынау нәтижелерін жариялаған еді: олардың ішінде шашыранды склерозға қарсы препараттың аурудың көп түріне әсер ете алатыны байқалған.
Швейцариядағы саудада компания акциясы тағы 0,5% өсті. Жыл басынан бері қағаз 20,5% көтеріліп, қаңтардан бері 12,4% өскен еуропалық акциялар нарығынан озып тұр.
Сарапшылар пікірі
Roche котировкасының күрт өсуі компанияның нарықтық құнын $311 млрд-қа дейін жеткізді, және бұл өсім «артқа қайтпауы керек», деді Bank Vontobel AG сарапшысы Стефан Шнайдер. Оның айтуынша, компания препараттарының клиникалық сынақтарындағы оң нәтижелер акцияны әрі қарай да көтеруі тиіс.
Дәрігерлер әйелдердегі сүт безі қатерлі ісігінің ерте сатыларында гормондық терапияны күшейтудің тиімді жолдарын ұзақтан бері іздеп келеді, ал giredestrant осы нарықта «хит» болуы мүмкін, деп жазды Bloomberg. JPMorgan бағалауынша, қарашадағы сынақ нәтижелері препаратқа шамамен $5 млрд деңгейінде ең жоғары сатылым әлеуетін бере алады. Intron Health деректеріне сәйкес, 2032 жылға қарай giredestrant-тың әлемдік сатылымы $10 млрд-қа дейін өсе алады, тіпті бұл межеден асып түсуі ықтимал.
«Roche үшін бұл деректер — бетбұрыс сәті», — деді Intron Health сарапшысы Нареш Чоухан. Ол нарықтың «өте үлкен» әлеуетін және препараттың өз санатындағы алғашқы дәрі екенін атап өтті. Сарапшының пікірінше, семіздік пен генетикалық бұлшықет ауруларына бағытталған препараттардың алдағы клиникалық нәтижелері Roche компаниясын 2026 жылдың ортасына қарай Еуропадағы ең тартымды фармөндірушіге айналдыра алады.
1 желтоқсанда Berenberg инвестбанкі фармгигант акциясы бойынша бейтарап рейтингті растады және мақсатты бағаны 290-дан 300 швейцариялық франкқа (361 доллардан 373 долларға) дейін көтерді. Дегенмен, жаңа бағалау соңғы жабылудан 2,3% төмен. Ал жалпы алғанда Roche қағазын 18 сарапшы қадағалайды: сатып алуға — 8, ұстауға — 5, сатуға — 3 сарапшы кеңес берді.
Қандай тәуекелдер бар?
Roche-тың жетістікке жетуіне ешқандай кепіл жоқ, деді Bloomberg. Басқа фармөндірушілер де сүт безі қатерлі ісігінің ерте сатысындағы әйелдерге арналған дәрілерді әзірлеуге күш салып жатыр. AstraZeneca келесі жылы өздерінің бәсекелес препараты бойынша деректерді ұсынуы тиіс. Сондықтан кейбір онкологтар Roche препаратының перспективасын әзірге сақтықпен бағалап отыр.
«giredestrant бойынша аралық деректерге қатысты күтулер тым жоғары болмауы керек», — деп жазды Jefferies сарапшысы Майкл Лойхтен сүт безі қатерлі ісігі маманының пікіріне сүйене отырып. «Нәтижелер жаңа емдеу схемасына жол ашуы мүмкін, бірақ олар клиникалық практиканы түбегейлі өзгертеді деп санамайды», — деді ол.
Денсаулық сақтау саласында не болып жатыр?
Қараша айында АҚШ акциялар нарығында денсаулық сақтау саласы көш бастады. Инвесторлар ЖИ-компанияларға қатысты өз ставкаларын қайта қарап жатқандықтан, S&P 500 Health Care индексі қарашада 9% өсіп, бенчмарктағы 11 сектордың ішінде үздік нәтиже көрсетті. Ал S&P 500 осы кезеңде айды шамамен өзгеріссіз жапты. Goldman Sachs деректеріне сәйкес, хедж-фондтардың фарма саласына ақша тартуы соңғы бес жылдағы ең максималды деңгейге жеткен.
«Денсаулық сақтау секторындағы компаниялар анық төмен бағаланған еді», — деді өткен аптада журналистерге DWS-тің мультиактивтік инвестициялар бөлімінің басшысы Хеннинг Постада. Оған қоса, инвесторлардың алаңдаушылығы акцияның ағымдағы бағасына белгілі дәрежеде әлдеқашан ескерілген».
