S&P 500 индексінің соңғы 35 жылдағы үздік көрсеткіші. Акциялар өсуін жалғастыра ма?
Мамыр айының қорытындысы бойынша, S&P 500 индексі 6%-дан аса өсіп, 1990 жылдан бергі осы кезеңдегі ең үздік нәтижесін көрсетті. Nasdaq Composite 10%-ға жуық өсіп, 2023 жылдан бергі ең жоғары айлық өсімді тіркеді. Сәуірде Дональд Трамп әкімшілігінің импорттық баж салығын көтеруі нарықты құлдыратқан еді. Мамырда бұл шаралардың жұмсаруы мен сауда серіктестерімен келісімдердің басталуы нарыққа оң әсер етті.
Егжей-тегжейі
S&P 500 6,2% өсіп, қарашадан бергі ең жақсы айлық көрсеткішке қол жеткізді. Nvidia компаниясының есебінен соң Nasdaq Composite 9,6%-ға өсті. Dow Jones Industrial Average 3,9%-ға өсті. Russell 2000 шағын капиталды компаниялар индексі 5%-дан аса көтеріліп, үш айлық құлдырауды тоқтатты. АҚШ қазынашылық облигацияларының индексі 1,2%-ға төмендеді. 30 жылдық облигациялар кірісі үшінші ай қатарынан өсті. Бұл 2023 жылдан бері болмаған жағдай. АҚШ доллары мамырды қатарынан бесінші рет минуста жапты. Bloomberg-тің жазуынша, бұл 2020 жылдан бері алғаш рет тіркеліп отырған жайт.
Нарыққа не әсер етті?
CNBC-нің жазуынша, мамырдағы өсімге АҚШ пен Ұлыбритания арасындағы сауда келісімі, сондай-ақ Қытайға қатысты 145% тарифтің 30%-ға төмендеуі себеп болды. Бірақ 30 мамыр күні Трамп Қытай сауда келісімін бұзды деп мәлімдеді. Сонымен қатар, Bloomberg Қытай технологиялық секторына жаңа санкциялар енгізілуі мүмкін екенін хабарлады. Бұл ақпарат нарықты тағы да құлдыратты.
28 мамырда сот Трамптың енгізген тарифтерін заңсыз деп тауып, олардың көбін жойды. Алайда келесі күні апелляциялық сот бұл тарифтерді кемінде келесі аптаға дейін сақтау жөнінде шешім қабылдады. Трамп әкімшілігі 1974 жылғы Сауда заңының бабына сүйеніп, 150 күнге дейін 15%-дық жаңа тариф енгізуді қарастырып жатыр.
30 мамыр кешке Трамп импорттық болатқа тарифті 25%-дан 50%-ға дейін көтеретінін жариялады. Бұл отандық металлургияны қорғау үшін жасалып отыр. Бұл тарифтерге қатысты дау жоқ, өйткені олар басқа құқықтық механизм арқылы енгізілген. Осы жаңалықтан кейін US Steel компаниясының акциясы постмаркеттік саудада 0,8%-ға өсті.
Сарапшылар сөзі
Сауда тарифтері бойынша сот процесі онсыз да құбылмалы нарыққа қосымша белгісіздік әкеліп отыр.
Infrastructure Capital Management басшысы Джей Хэтфилд: «Қазір инвестиция жасауға қолайсыз уақыт. Инвесторлар табыс есебіне емес, тариф жайлы туитке сенуге мәжбүр» деді.
Bellwether Wealth өкілі Кларк Беллин: «Нарықтар тарифтерге қатысты жаңалықтарға жауап бере береді. Бірақ сауда саясатына қатысты анықтық пайда болғанда, дәстүрлі факторлар — есептер мен негізгі көрсеткіштер — қайтадан алдыңғы орынға шығады» деп болжайды.
Morgan Stanley инфляция мен тұтынушылар көңіл-күйі бойынша сәуірдегі деректер күткеннен жақсы шыққанын атап өтеді. Олардың пікірінше, тарифтердің экономикаға нақты әсерін келесі айда ғана толық көруге болады. Сәуірдегі деректер бойынша, АҚШ-тың сауда тапшылығы рекордтық деңгейде қысқарған, ал ақпан-наурыздағы белсенді шығындардан кейін тұтыну төмендеген.
