«Дүрбелең болады»: JPMorgan басшысы облигация нарығындағы «жарық» туралы ескертті
АҚШ-тың ең ірі банкі — JPMorgan компаниясының бас директоры Джейми Даймон облигация нарығында жақын арада «жарық пайда болуы мүмкін» деп мәлімдеді. Оның айтуынша, бұл АҚШ әкімшілігі мен Федералдық резерв жүйесінің артық мемлекеттік шығындары мен «сандық жұмсарту» саясатының салдары.
«Бұл дағдарыс алты айдан кейін бола ма, әлде алты жылдан кейін бола ма — білмеймін. Бірақ біз мемлекеттік қарыз өсімінің бағытын өзгертіп, маркет-мейкерлердің өз рөлін атқаруына мүмкіндік беруіміз керек. Өкінішке қарай, бізді ояту үшін мұндай сілкініс керек болуы мүмкін», — деді Даймон Рейган атындағы ұлттық экономикалық форумда сөйлеген сөзінде. Оның сөзін Bloomberg жариялады.
JPMorgan басшысы дағдарыстың нақты салдары туралы ашып айтпады. Алайда ол бұған дейін АҚШ-тың қазына облигациялары нарығында тұрақсыздық бола қалса, ФРЖ араласуға мәжбүр болатынын айтқан. Бұл кезде ол банктерге қойылған шектеулердің оларды нарықтағы тұрақтандырушы рөлінен шеттетіп отырғанын ескерткен еді.
Даймон әлем елдерінің үкіметтері бюджет тапшылығын өтеу үшін қарыз алуды тым жиілеткеніне алаңдайтынын бірнеше рет айтқан. Журналистер «облигациялық кек алушылар» — яғни үкіметтердің қаржылық тәртібіне риза болмай, мемлекеттік облигацияларды жаппай сата бастайтын инвесторлар — қайта келді ме деп сұрағанда, Даймон: «Иә», — деп жауап берді.
Bloomberg-тің мәліметінше, сәуірдегі жаппай сатылымнан кейін мамырда АҚШ-тың қазына облигациялары биылғы жылы алғаш рет айлық төмендеуді көрсетті. Бұған Дональд Трамптың саясатындағы өзгерістер мен бизнеске жеңілдіктер қарастырылған салық заңнамасына байланысты бюджет тапшылығы үшін туындаған алаңдаушылық себеп болды.
«Мен реттеушілерге айтамын: бұл орын алады, және ол кезде дүрбелең басталады. Мен өзім сабырлы боламын — біз бәрібір аман қаламыз. Тіпті пайда табуымыз да мүмкін. Кейбір таныстарым: «JPMorgan-ға дағдарыстар ұнайды» дер. Бірақ шын мәнінде, олай емес», — деп ескертті Даймон.
