S&P 500 өсті: дағдарыс пен сауда шиеленісі басылды
АҚШ-тың негізгі қор индекстері аптаны өсіммен аяқтады. Нарықтың кең көрсеткіші S&P 500 соңғы бес сауда күнінде тамыз айынан бергі ең жақсы нәтижесін тіркеді. Жұма күні трейдерлер несие нарығындағы дағдарыс қаупіне қатысты алаңдаушылықты азайтып, АҚШ пен Қытай арасындағы шиеленіс бәсеңдейді деген үміт арттырды. Дональд Трамп ай соңында ҚХР төрағасы Си Цзиньпинмен кездесуі мүмкін екенін және Қытай тауарларына салынған 100%-дық баж ұзаққа созылмайтынын айтты.
Егжей-тегжейі
— 17 қазандағы сауда қорытындысы бойынша S&P 500 индексі 0,53%-ға өсті. Апта ішінде индекс 1,7%-ға көтерілді, деп хабарлайды CNBC.
— Технологиялық компанияларды қамтитын Nasdaq Composite индексі 0,52%-ға өсті, ал апта бойы 2,1%-дық өсім көрсетті.
— Dow Jones Industrial Average жұмада 0,52%-ға, апта ішінде 1,6%-ға артты.
— Кіші капитализациялы компаниялар индексі Russell 2000 ғана 0,6%-ға төмендеді.
— Алтын бағасы 2%-дан астам төмендеп, унциясы 4186 долларға түсті.
— Нарықтағы «қорқыныш индексі» VIX 20,78 пунктке дейін азайып, инвесторлардың қобалжуы басылғанын көрсетті.
— 10 жылдық қазынашылық облигациялардың кірістілігі қайтадан 4%-дан жоғары көтерілді.
Нарыққа әсер еткен факторлар
17 қазандағы түстен кейін индекстердің өсуін АҚШ Қаржы министрі Скотт Бессенттің Қытай әріптесімен кездесу өткізу ниеті және Трамптың ай соңында Си Цзиньпинмен кездесуі мүмкін деген мәлімдемесі күшейтті. Бұл жаңалықтар 1 қарашадан бастап Қытай тауарларына жаңа баж салығын енгізу қаупін азайтты.
Zions және Western Alliance банктерінің проблемалық несиелері салдарынан төмендеген банк секторы жұма күні қалпына келе бастады. Трейдерлер бұл мәселелердің жекелеген жағдай екенін айтып, акцияларды қайта сатып ала бастады. Zions қағаздары 5,8%-ға, Western Alliance акциялары 2,6%-ға өсті. Аналитиктер Baird банк капитализациясының төмендеуі шын шығынға сай емес екенін айтып, рейтингті көтергеннен кейін өсім байқалды. Jefferies акциялары да 6%-ға қымбаттады.
Fifth Third Bancorp банкінің есебі де нарықтағы сенімді арттырды: банк кірісі артқан, ал несиелік шығындар азайған. Банк акциялары шамамен 1%-ға көтерілді. Аймақтық банктердің ETF индексі жұмада 1,5%-ға өсті, бірақ апта бойынша әлі де 2%-дық минуста.
Сарапшылар не дейді?
— Vital Knowledge сарапшысы Адам Криссафулли CNBC-ге: «Біз нарықта жүйелі несие тәуекелін көріп отырған жоқпыз. Барлық жағдай — жекелеген оқиғалар (мысалы, First Brands және Tricolor), ал жалпы кредит сапасы күткеннен де жақсы», — деді.
— Moody’s Ratings өкілі Марк Пинто CNBC эфирінде: «Кредит циклі бұрыла бастады дегенге дәлел жоқ. Актив сапасының төмендеуі соңғы тоқсандарда шамалы ғана», — деп атап өтті.
— City Index және Forex.com сарапшысы Фавад Разакзада Bloomberg-ке берген сұхбатында: «АҚШ пен Қытай арасындағы сауда соғысы, баяу жаһандық өсім және жоғары актив бағаларына енді аймақтық банктердің несие тәуекелі қосылды. Бірақ кейде Трамптың бір ғана жазбасы инвесторлардың көңіл күйін күрт өзгертуі мүмкін», — деді.
— Truist Advisory Services бас стратегы Кит Лернер Bloomberg-ке: «Қазан айында нарықтағы құбылмалылық күрт артты. Ұзақ ралли мен жоғары оптимизмнен кейін нарық теріс жаңалықтарға осал болды. Бірақ біз мұны ұзақмерзімді өсім алдында позицияны күшейту мүмкіндігі ретінде көреміз», — деді.
— UBS Global Wealth Management директоры Ульрике Хоффманн-Бурхарди Bloomberg-ке: «Акциялар нарығындағы “бұқа” кезеңі төртінші жылына аяқ басқанымен, оның әрі қарай өсу әлеуеті бар», — деп мәлімдеді.
