Сарапшылар ЖИ саласындағы өсімнен ұтатын үш орташа компанияны атады
Business Insider басылымы жасанды интеллект саласына байланысты үш шағын компанияның акцияларына инвесторлардың назарын аудартты. Бұл компанияларды басылымның сұрауы бойынша инвестициялық фирмалардың топ-менеджерлері атаған. Олар бұл ұйымдар жасанды интеллектті қолдайтын инфрақұрылымды дамытып жатқанын айтады. Ал бұл саланың өркендеуінен деректер орталығын құру тізбегіндегі барлық қатысушы компаниялар пайда көруі тиіс.
Sterling Infrastructure
Sterling Infrastructure — деректер орталықтарына арналған жер телімдерін іріктеу мен құрылысын жүзеге асыруға көмектесетін компания. Prince Capital инвестициялық компаниясының негізін қалаушы және бас инвестициялық директоры Александр Ва бұл ұйымды жасанды интеллект нарығындағы тиімді ойыншы деп санайды. Оның айтуынша, әзірге инвесторлар тарапынан аса зор қызығушылық байқалмағанымен, Sterling біртіндеп ірі ойыншылардың нарықтағы үлесін тартып алуда.
MarketWatch деректеріне сүйенсек, Уолл-стриттің үш бірдей сарапшысы бұл компания акциясын сатып алуға кеңес береді. Орташа мақсатты баға — 256,3 доллар, бұл 1 тамыздағы жабылу бағасынан төмен. Соңғы бір айда Sterling Infrastructure акциясы 18%-дан аса қымбаттады.
Lumentum Holdings
Lumentum Holdings компаниясы жоғары жылдамдықты байланысты қамтамасыз ететін оптикалық шешімдер ұсынып, үлкен көлемдегі деректермен жұмыс істеуге мүмкіндік береді. Calamos Investments компаниясының аға портфель менеджері Брэндон Нельсонның пікірінше, бұл ұйым да инвесторлар назарын аударуға лайық.
Оның бұл көзқарасын Уолл-стриттің 14 сарапшысы қолдайды, олар Lumentum акцияларын сатып алуға кеңес берген. Тағы төртеуі — қолда бар акцияны портфельде ұстай тұру керек десе, бір сарапшы ғана сатуды ұсынған. Орташа мақсатты баға — 103,2 доллар, бұл қазіргі бағадан 3,3%-ға төмен. Соңғы бір айда компания акциялары шамамен 17%-ға өсті.
Argan
Брэндон Нельсон жасанды интеллект технологияларының қарқынды дамуы кезінде пайда табуы мүмкін тағы бір компания ретінде Argan ұйымын атады. Бұл компания энергетика саласына құрылыс қызметтерін ұсынады.
Investor’s Business Daily басылымы атап өткендей, соңғы бір жылда Argan акцияларының бағасы 200%-дан аса өсіп, әлемдегі ең қымбат компания — чип өндіруші Nvidia-ның өсу қарқынынан да асып түсті. Осыған байланысты басылым инвесторларға Argan акцияларын сатып алуға кеңес береді.
Уолл-стриттің екі сарапшысы бұл ұсынысты қолдайды. Тағы біреуі — акцияны сатпай, портфельде ұстау қажет деп санайды. Ортақ мақсатты баға — 225,33 доллар, бұл қазіргі нарықтағы бағамен шамалас.
