Saxo-ның жүзеге асқан «ақылға қонымсыз» 8 болжамы. 2026 жылы не күтеді?
Даниялық Saxo Bank жыл сайын «сирек болатын, бірақ ауқымды әсер етуі мүмкін оқиғалар» тізімін жариялайды. Банк мұндай болжамдарын «ақылға қонбайтын» деп атайды. Алайда тәжірибе мен Saxo-ның талдауы көрсеткендей, сарапшылар күмәнмен қараған бұл оқиғалар шын мәнінде жүзеге аса алады. Saxo-ның болжамы бойынша орындалған 8 ерекше оқиға төмендегідей:
1. 2022 жылғы болжам: алтын $3000-ға жетеді. 2022 жылы Saxo Bank сарапшысы Оле С. Хансен инфляцияны орталық банктер тежей алмайды деп болжаған. Сондықтан алтын бағасы 2023 жылы $3000-ға жетеді деген. Ол жылы болжам орындалмады. Бірақ 2025 жылғы наурызда алтынның бағасы шын мәнінде $3000-ға жетті.
2. 2025 жылғы болжам: Трамп долларды әлсіретеді. Дональд Трамп АҚШ президенті ретінде екінші рет қызметке келгенде, сарапшы Джон Дж. Харди жаңа президент жоғары баж салығын енгізіп, долларды әлсіретеді деген. 2025 жыл басынан жыл соңына қарай доллар 10%-тен астам арзандады.
3. 2025 жылғы болжам: Nvidia Apple-ден асып түседі.Nvidia ЖИ чиптері арқылы үлкен серпіліс жасап, бір кезеңде нарықтық құны Apple-ді 50%-ке дейін артта қалдырды. Қазіргі дерекке сай, болжам толық орындалмаса да, ол сәттік нәтиже ретінде шындыққа айналды.
4. 2022 жылғы болжам: қазба отыннан бас тарту кейінге қалады. 2022 жылы Оле С. Хансен үкіметтер климаттық мақсаттарды шегеріп, қазба энергиясына инвестицияны қолдайды деп болжаған. Бұл болжам Ресей мен Украина арасындағы қақтығыс салдарынан шындыққа айналды.
5. 2018 жылғы болжам: нарықтағы құлдырау және құбылмалылықтың күрт артуы. 2018 жылғы ақпанда орын алған «Volmageddon» құбылысы құбылмалылыққа қарсы ставкалар жасаған қорларды жойды. Желтоқсандағы 20% құлдырау — осы болжамның толық жүзеге асқанын көрсетті.
6. 2017 жылғы болжам: биткойнның күрт өсуі. 2017 жылы биткойн $800-ден $20 000-ға дейін өсті. Бұл инвесторлардың орталық банктер валютасынан қашуы және Трамп әкімшілігінің қарыз бен инфляцияны күшейтетін саясатына негізделген еді. Расымен де крипторынқтағы спекуляциялар болжамды нақтылады.
7. 2015 жылғы болжам: Brexit 2017 жылы өтеді. Saxo сарапшылары UKIP 2015 жылғы сайлауда табысқа жетіп, консерваторлармен бірігеді, ал 2017 жылы ЕО-дан шығу туралы референдум өтеді деп болжаған. Бұл болжам уақыт жағынан сәл ауытқығанымен, негізі дұрыс болды.
8. 2013 жылғы болжам: алтын $1200-ге дейін арзандайды. Оле С. Хансен сол жылы алтын бағасы үштен бірге төмендейді деп болжаған. 2013 жылы алтын расында $1200-ден де төмен түсті, себебі инвесторлар доллар мен акцияға көбірек назар аудара бастады.
Saxo 2026 жылға не болжайды?
— «Кванттық серпіліс»: сарапшылардың пікірінше, кванттық компьютерлер қазіргі шифрларды бұза алатын «Q күні» келесі жылы орын алуы мүмкін. Бұл криптонарықтың күйреуіне және жаһандық қаржы жүйесінің тұрақсыздануына себеп болады.
— Семіздікке қарсы дәрілер бәріне қолжетімді болады — тіпті үй жануарларына да. Адамдар арықтайды, өмір сүру ұзақтығы артады, ал азық-түлік өндірушілері өз өнімдерін бейімдеуге асығады.
— SpaceX биржаға шығып, нарықтық бағасы $1 трлн-нан асады. Бұл «ғарыш экономикасын» нақты инвестиция нарығына айналдырады және орбиталық, ай жобаларының бумын тудырады.
— Fortune 500 компаниясын ЖИ басқарады. Бір ірі америкалық корпорацияға бас директор ретінде ЖИ-модель тағайындалады.
— Бақылаусыз қалған ЖИ-агенттер бүкіл жүйеде ақау туғызып, триллион долларлық шығынға алып келеді. Бұл — «ЖИ тазалаушы» деген жаңа кәсіптің пайда болуына жол ашады: бұл мамандар сандық инфрақұрылымды қалпына келтіріп отырады.
