SpaceX «тыныштық кезеңінде», Medline — үлкен листинг: 21 желтоқсанға дейінгі IPO
SpaceX IPO қарсаңында «тыныштық кезеңіне» өтті. Медициналық тауарлар жеткізушісі Medline акциясы жылдың басты листингінен кейінгі алғашқы саудада бір жарым есе секірді. АҚШ-тың ипотекалық алпауыттары Fannie Mae мен Freddie Mac орналастыруы 2026 жылға шегерілді, тіпті мүлде өтпей қалу қаупі бар. Аптаның басты IPO жаңалықтары туралы — біздің шолуда.
Болашақ орналастырулар туралы не белгілі?
— Илон Масктың SpaceX компаниясы қызметкерлерін өсім немесе баға туралы кез келген жария пікір айтуға тыйым салатын реттеушілік «тыныштық кезеңінің» енгізілгенін хабарлады, деп жазды Bloomberg дереккөздерге сілтеме жасап. Бұл әлемдегі ең қымбат аэроғарыш және қорғаныс компаниясының тарихтағы ең ірі IPO-ға дайындықтың белсенді кезеңіне өткенін аңғартады, деп санайды агенттік. Дереккөздердің айтуынша, SpaceX-тегі шектеулер АҚШ реттеушісінің талаптарына сай енгізіліп отыр. «Тыныштық кезеңі» — акцияны орналастыру алдындағы уақыт аралығы, осы кезеңде эмитентке болашақтағы котировканы жасанды түрде көтеруі мүмкін мәлімдемелер жасауға тыйым салынады. Bloomberg мәліметінше, SpaceX 2026 жылы биржаға шығып, компанияны $1,5 трлн-ға бағалау аясында $30 млрд-тан астам қаражат тартуды көздеп отыр.
— Nvidia-мен бәсекелес шағын ЖИ-чип өндірушісі Cerebras Systems келесі аптада АҚШ реттеушісіне ел аумағында листинг өткізу үшін құжаттарды тапсырмақ және акцияны орналастыруды 2026 жылдың екінші тоқсанына межелеп отыр, деп хабарлады Reuters дереккөздерге сілтеме жасап. Былтыр Cerebras IPO-ға өтінім бергенімен, оны кейінге қалдырып, ақырында толықтай тоқтатқан. Агенттік мәліметінше, АҚШ билігі стартаптағы БАӘ-нің G42 технологиялық компаниясына тиесілі миноритарлық инвестицияларды ұлттық қауіпсіздік тәуекелдері тұрғысынан тексерген. Reuters дереккөздерінің айтуынша, Cerebras-тың жаңа өтінімінде G42 инвесторлар қатарында жоқ. Ал қазан айында өткен соңғы инвестициялық раундта стартап $8 млрд-тық бағалау аясында $1 млрд-тан астам қаражат тартқан.
— Әлемдегі борттық тамақтандыру саласындағы ең ірі жеткізуші Gategroup 2026 жылдың екінші жартысында өтуі мүмкін IPO үшін андеррайтерлерді таңдады. Bloomberg мәліметінше, Цюрихтегі листингті ұйымдастырушылар ретінде Bank of America, Morgan Stanley және UBS бекітілген. Қазір компания Сингапурдың Temasek қоры мен Гонконгтағы RRJ Capital инвестициялық фирмасына тиесілі. Бұл Gategroup-тың 2018 жылы сұраныстың әлсіздігіне байланысты тоқтатылған орналастырудан кейін биржаға қайта оралудағы екінші талпынысы. Ол кезде компания 1,1 млрд швейцар франкін ($1,4 млрд) тартуды жоспарлаған.
— Белсенді инвесторлық Elliott Management қоры Barnes & Noble және Waterstones кітап дүкендері желілерін IPO-ға дайындауды бастады, деп хабарлады Financial Times. Акцияларды орналастыру 2026 жылдың екінші жартысында Лондонда немесе Нью-Йоркте өтуі мүмкін, ал дереккөздердің айтуынша, әзірге Лондон негізгі алаң ретінде қарастырылып отыр. Barnes & Noble мен Waterstones — АҚШ пен Ұлыбританиядағы ең ірі кітап сатушылар. Өткен жылы олардың жиынтық табысы шамамен $3 млрд-ты, ал пайдасы $400 млн-ды құрады. Осы аптада холдинг басшысы Джеймс Даунт кітап сатылымдары «өте жақсы жүріп жатқанын» айтып, 2025 жылды «ғажайып» деп атады.
Соңғы IPO нәтижелері
— Америкалық медициналық тауарлар жеткізушісі Medline акциясы Нью Йорктегі дебюттік сауда қорытындысы бойынша 41% қымбаттады. Жылдағы ең ірі листинг аясында компания $6,26 млрд тартты, ал нарықтық капитализациясы $39 млрд-ты құрады. Bloomberg атап өткендей, Medline орналастыруы Гонконгта өткен қытайлық CATL компаниясының $5,26 млрд-тық IPO-сынан асып түсті және АҚШ-та 2021 жылы Rivian биржаға шыққаннан бергі ең ауқымды IPO болды.
— Andersen Group акциясы сауданың алғашқы күнінде 47% қымбаттады. Компания Нью Йорк қор биржасында диапазонның жоғарғы шегімен қағаз орналастырып, $176 млн тартты, ал сұраныс ұсыныстан он есе жоғары болды. Andersen Group 2001 жылы энергетикалық алпауыт Enron банкротына байланысты ең ірі корпоративтік алаяқтық істерінің бірінде аты аталған Arthur Andersen аудиторлық фирмасының мұрагері ретінде белгілі. Ол кезде Arthur Andersen Enron-ның қаржылық есептілігіне қатысты тергеуге кедергі келтірді деп танылған. Кейін АҚШ Жоғарғы соты аудит компаниясын ақтағанымен, бизнес тек бірнеше жылдан соң жаңа форматта қайта құрылды.
— AMD-ның бұрынғы топ-менеджерлері негізін қалаған қытайлық ЖИ-чип әзірлеушісі MetaX Integrated Circuits котировкасы Шанхай биржасындағы дебют күні 693% шарықтады. Компания 4,2 млрд юань ($596 млн) тартты. Бөлшек инвесторлар тарапынан сұраныс ұсыныс көлемінен 4 мың еседен астам артық болды. KPMG дерегінше, MetaX листингі 2025 жылы Қытайдағы көлемі бойынша алтыншы орынға шықты және шығынмен жұмыс істеп жатқан стартапты 2024 жылғы табыстан 50 есе жоғары деңгейде бағалады. Салыстыру үшін, бұл көрсеткіш Nvidia-да 34-ті, ал AMD-да 14-ті құрайды, деп жазды Reuters.
— Гонконгтағы ең ірі криптобиржаның операторы HashKey акциясы 1,6 млрд гонконг доллары ($206 млн) көлеміндегі IPO-дан кейінгі дебюттік сауданы 0,2% төмендеумен аяқтады. Құбылмалы сессия барысында котировка 6,6% өскен сәттен 8,4%-ға дейін төмендеген деңгейге дейін ауытқыды, алайда қорытындысында орналастыру бағасынан (6,68 гонконг доллары) төмен түсті. HashKey листингі биткоин бағамының күрт әлсіреуі аясында өтті: криптовалюта қазан айындағы максимумнан 30% төмендеді.
IPO-ны кім кейінге қалдырды немесе болдырмады?
— АҚШ-тың ипотекалық алпауыттары Fannie Mae мен Freddie Mac IPO-сы бастапқыда 2025 жылдың соңына жоспарланған еді, алайда ол 2026 жылға шегерілді, деп мәлімдеді АҚШ қаржы министрі Скотт Бессент. Дегенмен Bloomberg сарапшылары компанияларды мемлекеттік бақылаудан шығару үдерісі бірнеше жылға созылуы мүмкін деп есептейді: капитал талаптарын қайта қарау секілді қажетті рәсімдер көп уақыт алады. Сарапшылар жеке инвесторлар үшін тәуекелдерге назар аударады, себебі олардың әрекеттері 2025 жылы биржадан тыс нарықта акциялардың үш есе қымбаттауына әкелген. Bloomberg бағалауынша, жекешелендіру Дональд Трамптың президенттік мерзімі аяқталғанға дейін тәмамдалмай қалу ықтималдығы шамамен 33% және ол артып келеді.
— Uber бұрынғы басшысы Трэвис Каланик негізін қалаған CloudKitchens стартапы Таяу Шығыстағы IPO жоспарын кейінге қалдырды, деп хабарлады Bloomberg дереккөздері. Онлайн-ресторандарға арналған асүйлерді салып, жалға берумен айналысатын компания листингтің орнына акцияны жеке орналастыру нұсқасын қарастырып отыр. Бұған дейін 2026 жылы Абу-Даби мен Эр-Риядта қосарланған листинг өткізу және бизнесті шамамен $2 млрд көлемінде бағалау жоспарланған болатын. Агенттік атап өткендей, жоспарлардың қайта қаралуы төрт жылдық қарқынды өсімнен кейін Таяу Шығыстағы IPO нарығының салқындауымен және инвесторлардың активтерді бағалауға қоятын талаптарының қатаңдауымен тұспа-тұс келді.
Басқа да маңызды IPO жаңалықтары
— Nasdaq 2026 жылы АҚШ нарығына шығуды жоспарлап отырған ірі стартаптардың арқасында IPO санының күрт өсуін күтеді, деп хабарлады Reuters биржаның топ-менеджерлерінің біріне сілтеме жасап. Сауда алаңы операторының дерегінше, 2025 жылдың басынан бері тартылған қаражат көлемі $46,65 млрд-ты құрап, жылдық есепте екі еседен астам артқан. Биржа сондай-ақ NYSE-ден 22 эмитенттің, оның ішінде Walmart-тың, ауысуы есебінен позициясын нығайтты, олардың жиынтық бағалауы $1,2 трлн-ды құрайды. 2026 жылы АҚШ-та ең көп күтілетін листингтер қатарына SpaceX, Fannie Mae мен Freddie Mac, сондай-ақ OpenAI кіреді.
