Spotify табысын да, тыңдармандарын да арттырды. Бірақ акциялары неге арзандады?
Швецияның аудиостриминг алыбы Spotify-дың акциялары 4 қараша күні сауда басталғанда 5%-дан астам арзандап, кейін қалпына келіп, тағы 2,5%-ға төмендеді. Бұл — компанияның үшінші тоқсандағы қаржылық есебіне нарықтың реакциясы. Spotify табысы, маржасы және қолданушылар саны бойынша сарапшылар болжамынан асып түсті. Бірақ жарнамадан түскен табыс азайды, ал келесі тоқсанға берілген болжам инвесторларды қуанта қоймады.
Компания не айтты?
– Spotify-дың үшінші тоқсандағы табысы былтырғы осы кезеңмен салыстырғанда 12%-ға өсіп, €4,27 млрд-қа жетті. Бұл Bloomberg деректері бойынша сарапшылар күткен €4,23 млрд көрсеткішінен сәл жоғары.
– Бір акцияға шаққандағы түзетілген пайда былтырғы €1,45-тен €3,28-ге дейін артты. Бұл да орташа болжам (€1,98) көрсеткішінен әлдеқайда жоғары.
– Валдық маржа 31,6%-ды құрады. Бұл Spotify-дың өз болжамынан және сарапшылардың 31,1% деңгейіндегі болжамынан жоғары.
– Ай сайынғы белсенді қолданушылар саны 713 млн-ға жетті, ал ақылы жазылым иелері 12%-ға өсіп, 281 млн болды.
– Жарнама табысы жылдық есептеумен 6%-ға төмендеді. Компания мұны жарнама бағасына қысыммен түсіндірді.
Алдағы жоспарлар
Spotify келесі тоқсанда жарнама табысы өсіп, контент шығындарын жабады деп күтеді. Маржа 32,9%-ға жетуі мүмкін — сарапшылардың орташа болжамы 32,5%.
Компания операциялық пайда €620 млн болады деп болжайды (сарапшылар консенсус-болжамы — €605 млн).
Алайда табыс бойынша болжам €4,5 млрд болып отыр, ал сарапшылар €4,56 млрд күтті. Сонымен қатар ақылы жазылым саны 289 млн болады делінген, бұл да болжанған 291,1 млн-нан төмен, деп хабарлайды CNBC.
Spotify-дың қаржы директоры Кристиан Луига: «Біз 2025 жылды жарнама бизнесі үшін өтпелі кезең деп есептейміз, ал нақты өсу 2026 жылдың екінші жартысында болады», — деді Bloomberg келтірген сөзінде.
Қалпына келу жоспары
2022 жылы инвесторлар күні Spotify 30–35% аралығындағы валдық маржаға қол жеткізу мақсатын қойған. Сол кезде компания пайда табуда қиындық көріп, маржа 25% деңгейінде тұрып қалған еді, деп еске салады Yahoo.Finance.
2024 жылдан бастап жағдай өзгерді. Компания қызмет бағасын көтеріп, музыка, подкаст және аудиокітаптарды біріктіретін жаңа премиум-пакет ұсынды. Бұдан бөлек, тек аудиокітаптарға және тек музыкаға арналған жазылымдар енгізілді.
2024 жылдың төртінші тоқсанында маржа 32,2%-ға дейін өсіп, кейін жарнамадағы маусымдық құлдырау мен контент шығындарының өсуіне байланысты төмендеді. 2025 жылдың бірінші тоқсанында 31,6%, екінші тоқсанда 31,5%.
Үшінші тоқсанда көрсеткіш қайта өсті. Себебі жазылым бағасы тағы көтеріліп, шығындар азайды, ал жасанды интеллект шешімдері енгізілді.
Сарапшылар не дейді?
Yahoo.Finance жазуынша, Уолл-стрит Spotify-дың ұзақ мерзімді табыстылығына 2026 жылға қарай жететініне сенеді.
Citi сарапшысы Джейсон Бэзинет: «Spotify АҚШ-та 2025 жылдың соңында немесе 2026 жылдың басында жазылым бағасын көтеруі мүмкін. Бұл маржаны жақсартады, егер музыка үшін көтерме бағалар күтілгеннен төмен өссе», — дейді. Ол Spotify акцияларына бейтарап көзқарас (Hold) танытып, мақсатты баға ретінде $750 белгілеген — бұл қазіргі бағадан 16,5% жоғары.
Аудиостриминг платформасының акцияларын зерттейтін 43 сарапшының 30-ы сатып алуға кеңес береді (Buy және Overweight рейтингтері). 11-і бейтарап (Hold). Екеуі үлесті қысқартуға кеңес береді (Underweight).
