«Стероидтағы рейганомика»: Кэти Вуд алтыннан, биткоиннен және акциялардан не күтеді
ARK Invest басшысы Кэти Вудтың пікірінше экономика соңғы үш жыл ішінде өзгерген қалыптан қайта қалпына келіп жатыр. Ол инфляциядан қорғау үшін жасалған әдеттегі инвестициялық шешімдер енді нәтиже бермейтінін айтып ескертеді. Ал ол инвесторларға не ұсынады?
Парадоксалды өсім
«Қазір ең үлкен қате пікір — экономикалық өсім инфляцияны да өсіреді деген сенім. Бұл шындыққа сәйкес келмейді», — дейді Вуд.
Оның айтуынша соңғы 45 жылдағы АҚШ тарихы (пандемияны қоспағанда) керісінше нәрсені көрсетеді: экономиканың жылдамдауы бағаның төмендеуіне әкеледі. Себебі өндіріс тиімділігі артқан сайын бизнес шығындары сұранысқа қарағанда жылдамырақ төмендейді.
Жаңа экономикалық циклде бұл әсер бұрын-соңды болмаған деңгейге жетеді. Себебі бірнеше технология қатар дамуда: жасанды интеллект, ДНҚ секвенирлеу, робототехника, энергия сақтау және блокчейн. Вуд бұл технологияларды «өте қатты дефляциялық» деп атайды.
«Бұл — жақсы дефляция. Технология бағаларды төмендеткенде, сұраныс керісінше өседі», — дейді ол.
Нарық бұл өзгерісті әлі қабылдаған жоқ. Себебі пандемия инвесторларға психологиялық жара қалдырды. «Бұл үш жылдық шок күтпеген жағдай болды», — дейді Вуд. Сол себепті инвесторлар әлі де тапшылықтан, бағаның тағы өсуінен қорқады. Бірақ Вудтың пікірінше, бұл кезең аяқталды. Енді экономика қайтадан технология бағаны төмендететін дәуірге кірді.
Алтынның болашағы бұлыңғыр
Вуд алтынды ең әлсіз қорғаныс активтерінің бірі деп санайды. Ол сирек талқыланатын көрсеткішке назар аударады — алтын бағасының M2 ақша массасымен салыстырмасы. Қазір бұл деңгей соншалық жоғары, ол тек Ұлы Депрессия кезіндегі көрсеткіштермен салыстыруға болады. Бұл алтынның ары қарай өсу мүмкіндігіне күмән тудырады.
Вуд екі тарихи мысалды келтіреді: 1980 жылы алтын $850 болды, бірақ кейін 67% арзандады. Себебі рейганомика жұмыс істеді: инфляция төмендеді, доллар күшейді, инвесторлар акциялар мен облигацияларға ауысты. 2011 жылы алтын $1900 деңгейін ұстай алмады және төрт жыл ішінде екі есе арзандады.
Ол қазіргі жағдай бұрынғыдан да күштірек қайталанатынын айтады «Біз енді стеройдтағы рейганомика дәуіріне кіріп келеміз», — дейді Вуд.
Ол қазіргі салықтық және реттеу реформалары 1980-жылдардан да ауқымды деп есептейді. Сол себепті капитал «қауіпсіз аймақ» саналатын алтыннан тәуекел активтеріне ауысады.
Биткоин неге төмендеп жатыр?
Вудтың айтуынша биткоин төмендеуі экономиканың жақсаруымен емес, уақытша өтімділік тапшылығымен байланысты. «Құлдырау күткеннен қаттырақ болды. Бірақ бұл уақытша әсер», — дейді ол.
Оның пікірінше биткоиннің келесі бағыты ФРЖ саясатына байланысты. Қаржы жүйесіне ақша қайта кірсе, биткоин тағы да алтыннан жылдам өседі — бұл әрқашан ақша массасы артқан кезеңдерде байқалған.
«Қорқыныш қабырғасы» және шынайы көпіршік
Вуд S&P 500 индексінің өсімін «қорқыныш қабырғасымен жоғары өрлеу» деп сипаттайды. Бұл оның командасы үшін жақсы белгі: «ешкім сенбеген ралли ең ұзақ өмір сүретін ралли».
Ол акциялар нарығында көпіршік жоқ дейді. Себебі инвесторлар әлі сақ — Oracle мен Apple сияқты компанияларға кредиттік тәуекелден сақтандыру (CDS) алуда.
«Бізге бұл алаңдаушылық ұнайды», — дейді Вуд. Оның пікірінше, нағыз дабыл жеке кредиттеу және облигациялар секторында. Себебі ол жақта инвесторлар тәуекелді дұрыс бағаламай отыр.
Кэти Вудтың кеңесі
Вудтың жалғыз нақты ұсынысы — инвестиция емес, көзқарас пен әрекет туралы.
Ол адамдарға белгісіздік кезеңін ЖИ құралдарын үйренуге пайдалану керек дейді.
«Сіз ChatGPT, Cursor, Replit, Gemini немесе Grok арқылы бизнес идеяңызды жазып, қадам бойынша көмек ала аласыз», — дейді ол. Бағасы — тегіннен бастап айына $20–200. Оның ойынша:
«Қазір — өзгеріс жағында болуға ең қолайлы сәт».
