Strategy акциялары бір айда 15%-ға арзандады: биткоин-стратегия сын астында
Strategy (бұрынғы MicroStrategy) — биткоиннің ең ірі жария ұстаушысы — тамыз айының басынан бері акцияларының 15%-ын жоғалтты. Бұл инвесторларды тартқан сыйлықақыны іс жүзінде жойды. Bloomberg жазғандай, криптовалютаға деген көңіл-күйдің индикаторы саналатын компанияға сарапшылардың сенімі азая бастады. Нарық Strategy-дің жаңа биткоин сатып алу үшін акция шығарып, акционерлердің үлесін үнемі сұйылтатынын жақтырмайды. Бұған қоса, компания бағасы тікелей биткоин бағасына тәуелді, ал соңғысы капиталдың Ethereum-ға ауысуы аясында арзандап жатыр.
Егжей-тегжейі
12 тамызда биткоин \$123,7 мыңға дейін көтерілген соң, кейін 9%-ға төмендеді. Осы кезеңде Майкл Сэйлор басқаратын Strategy акциялары 14%-ға арзандады.
Сэйлордың моделі қарыз облигациялары мен акция шығарып, түскен қаржыға биткоин сатып алуға, нарық сыйлықақы бергенін күтуге және процесті қайталауға негізделген. 2020 жылдан бері компания бағдарламалық жасақтамадан криптовалюта жинақтауға көшкеннен соң, акциялары болашақ табысқа емес, mNAV (market-adjusted Net Asset Value) көрсеткішімен бағалана бастады. Ол биткоин резервінің баланстық құнына қатысты акциялардың нарықтық бағасын көрсетеді. Биткоин арзандағанда mNAV та төмендейді.
Bloomberg түсіндіргендей, Strategy жаңа акция шығарғанда акционерлердің үлесі сұйылады, ал сыйлықақы күткендей болмаса, инвесторлар наразылық білдіреді.
Инвесторлар алдындағы уәде және сенім дағдарысы
Шілденің соңында компания mNAV 2,5-тен төмен болса, акция шығармайтынын мәлімдеген. Бірақ екі аптадан кейін шартты жұмсартып, 25 тамызда 900 мыңға жуық жаңа акция сатты. Bloomberg дерегінше, кейбір инвесторлар мұны «сатқындық» деп бағалады.
Агенттік пікірінше, mNAV 1-ден төмен жағдайда жаңа акция шығару теріс спиральды іске қосуы мүмкін: акция бағасының түсуі Strategy-дің биткоин алу мүмкіндігін әлсіретеді, инвестор сенімін шайқалтады және сыйлықақыны одан әрі қысқартады.
Wintermute компаниясының сарапшысы Джейк Островскистің айтуынша, сыйлықақының азаюы бәсекенің күшеюі мен цифрлық активтерге қол жеткізудің балама тәсілдерінің пайда болуына табиғи жауап. Бірақ қысқа мерзімде негізгі себеп — компанияның өз уәдесін бұзуы.
Нарыққа әсері
Сэйлор моделі көптеген компанияларды криптовалюта қоры жинақтауға итермеледі. Бүгінде осындай «криптоказыналарда» \$108 млрд-тан астам биткоин сақтаулы (жиынтық ұсыныстың 4,7%-ы). Егер Strategy сыйлықақысынан толық айырылса, бүкіл стратегияның негізі шайқалмақ, деп жазады Bloomberg. Strategy қарапайым акция емес, баланс арқылы компанияны тұрақты биткоин сатып алушысына айналдыру тұжырымдамасының дәлелі болып келді.
Capriole Investments дерегінше, қазір биткоин ұстайтын жария компания акцияларының үштен бірі криптоактивтер құнынан төмен саудалануда. Әсіресе шағын ойыншылар әлсіз: өтімділіктің аздығы жаңа акция шығаруды ауырлатады, ал конверттелетін облигациялар қарыз жүктемесін арттырып, қайта қаржыландыру тәуекелін өсіреді.
Strategy барлық конверттелетін облигацияларын төрт жыл ішінде өтеп, орнына мерзімі жоқ артықшылықты акцияларға көшуді жоспарлап отыр. Bloomberg-тің жазуынша, мұндай мүмкіндікті ауқымы мен несие тарихы жеткілікті ірі компаниялар ғана іске асыра алады.
Capriole негізін қалаушы Чарльз Эдвардстың айтуынша: «Егер биткоин тағы 50%-ға түссе не болады? Интерес корпоративтік крипторезервтерге азаяды, mNAV мультипликаторлары қысқарады, жүздеген компания қазынашылық стратегияларын қайта қарауға мәжбүр болады».
Twenty One Capital бас директоры Джек Маллерс Bloomberg-ке берген пікірінде: «Бұл нарық қызып кеткен бе? Иә. Біз биткоин-казына құрудың сирек құбылыс емес екенін түсіндік. Кез келген адам компания тіркеп, биржаға шығып, биткоин сатып алу үшін қаржы тарта алады», — деді.
Сонымен қатар инвесторлардың назары Ethereum және Solana сияқты өзге активтерге ауысып жатыр. Кей сарапшылардың пікірінше, олар децентрализденген қаржы үшін анағұрлым тиімді. Ethereum-ға бағытталған қорлар бұл токенге қазірдің өзінде \$19 млрд-тан астам инвестиция салған.
