Тағы бір компания Strategy үлгісімен биткойн сатып алуға шешім қабылдады
Silo Pharma фармацевтикалық компаниясы криптовалютаға инвестиция салу жоспарын жариялағаннан кейін, оның акциялары 26%-дан астамға өсті.
Капитализациясы шамамен 4 миллион долларды құрайтын Silo Pharma компаниясы өз құнының төрттен бір бөлігіне биткойн сатып алуды жоспарлап отыр. Бұл арқылы стартап активтерін әртараптандырып, инфляциядан сақтануды көздейді деп жазады Investing.com. Бұған дейін дәл осындай шешім қабылдағандардың қатарында GameStop бейнеойын сатушысы мен тағы бірнеше ондаған компания бар. Алайда сарапшылар бұл стратегия банкротқа ұрындыруы мүмкін екенін ескертеді, себебі биткойн бағасы күрт төмендеуі ықтимал.
Мәліметтер
Silo Pharma-ның директорлар кеңесі 1 миллион долларға дейін биткойн сатып алуға рұқсат берді. Бұл қаражат компанияның қазынашылық активі ретінде қарастырылып отыр. Препараттарды жеткізудің жаңа әдістерін әзірлеумен айналысатын компания осы шешімді жариялағаннан кейін оның нарықтық құны 5 миллион доллардан асты. 5 маусымдағы саудада Silo Pharma акциялары бір сәтте 26%-дан астамға өсіп, 0,72 долларға жетті.
Компания биткойнды резервке қосу акционерлер үшін ұзақ мерзімді құнды арттыруға көмектеседі деп санайды. Бас директор Эрик Вайсблюм криптовалютаға бет бұру шешімі — өсім әлеуеті жоғары цифрлық активке деген қажеттілік пен инфляцияға қарсы сақтандыру қажеттілігінен туындағанын айтты.
Жаңа тренд
Актив құрылымын әртараптандырып, дәстүрлі қаржы құралдарына тәуелділікті азайту үшін криптовалютаға инвестиция салатын компаниялар көбейіп келеді. Биткойнға қатысты инвесторлардың әлі де сақтықпен қарайтынына, нарықтағы құбылмалық пен құқықтық ережелердің толық қалыптаспағанына қарамастан, Silo Pharma-ның мәлімдемесіне берілген реакция нарықтың бұл стратегияға сенімін көрсетіп отыр деп жазады Investing.com.
Президент Трамптың отбасына тиесілі Trump Media медиахолдингі мен «мем-акция» ретінде танымал GameStop сынды ондаған ашық акционерлік компаниялар қазірдің өзінде Strategy негізін қалаушы Майкл Сэйлор ұсынған стратегияны көшіріп жатыр. Бұл стратегия бойынша компания аналитикалық бағдарламалық жасақтама жасаудан биткойнды ең ірі иеленушіге айналды. Сэйлор жасаған жоспар биткойнды ауқымды көлемде сатып алу үшін қарыз және үлестік қаржыландырудың үйлесімін пайдалануды көздейді деп жазады Yahoo Finance.
2020 жылдан бері Strategy 40,7 миллиард доллар жұмсап, 580 мыңнан астам биткойн сатып алған. Осы уақыт ішінде компания акциялары 2900%-ға өсті, ал S&P 500 индексі тек 76%-ға ғана көтерілді.
— Бұл қиын емес, тіпті қауіпті де емес, бұл — жаңа нәрсе. Егер ақшаны 10 есе көбейткіңіз келсе — биткойн сатып алыңыз. 100 есе көбейткіңіз келсе — биткойнды басқаның ақшасына алыңыз. 1000 есе көбейткіңіз келсе — биткойнды қарызға алып, оны тағы кредит ретінде пайдаланыңыз, — деді Сэйлор мамыр айында Орландода өткен конференцияда Strategy тәжірибесімен бөлісіп.
2023 жылдан бастап ашық компаниялар биткойн нарығындағы үлесін 160%-ға арттырды және қазір айналымдағы барлық токендердің шамамен 3,4%-ын иемденіп отыр. Bernstein сарапшысы Гаутама Чхугани осылай деп есептейді. Bernstein және Coinkite бағалауынша, барлығы 80 компания қазынашылық қорына биткойн қосып, «биткойн стандартына» көшкен.
Көптеген компаниялар мұндай инвестицияны акция шығару, қарыз капиталын тарту немесе осы екеуін біріктіру арқылы жүзеге асыруда.
— Strategy жүзеге асырған биткойн сатып алу стратегиясы өсімі төмен шағын компаниялардың капиталды тиімдірек бөлу жолын көрсетіп отыр. Олар табысы аз бизнесінен биткойн резервіне қайта бағыттап отыр. Бұл компаниялардың құн құруда айқын жолы жоқ, ал Strategy моделінің табысы өсуге сирек мүмкіндік береді. Сондықтан олар Strategy стратегиясын қолдануға ерекше мүмкіндікке ие, — деп жазды Чхугани.
Қандай тәуекел бар?
Соңғы бір жылда биткойн бағасы шамамен 57%-ға өсті және қаңтарда 109 мың доллардан асты. Алайда сәуірде АҚШ-тағы сауда соғысының шиеленісуіне байланысты ол 80 мың доллардан төмендеп кетті.
— Биткойнды қазынашылық актив ретінде қарызға алып сатып алудың басты тәуекелі — оның бағасы күрт құлдыраса, компания банкротқа ұшырауы мүмкін, — деп түсіндірді Yahoo Finance-ке Нью-Йорк университеті бизнес мектебінің профессоры Дэвид Ермак.
Тағы бір проблема — Strategy-дің ауқымы.
— Strategy-дің биткойн стратегиясын бәрі сол күйі көшіре алмайды. Біздіңше, олардың жетістігін кез келген компания қайталай алмайды, — деді Чхугани.
— Шын мәнінде бұл мем-акциялар феноменіне ұқсайды: адамдар биткойн сатып алып жатыр, себебі ол Strategy үшін жұмыс істеді. Бірақ нарық өсім беріп тұрған кезде көрінетін пайданың бәрі бағалар құлдырағанда үлкен проблемаға айналуы мүмкін, — деп қосты Yahoo Finance-ке Колумбия бизнес мектебінің профессоры Омид Малекан.
