Таңғы шолу: алтын рекорды, Tesla өсімге оралды, Nothing $200 млн инвестиция тартты
ФРЖ мөлшерлемесін төмендетуге қатысты үміттер аясында алтын тарихи рекордты жаңартып, унциясы $3685-тен асты және жыл басынан бері 40%-дан артық өсті. Осы уақытта Лондондық Nothing стартапы жасанды жадыға негізделген смартфондарын дамыту үшін $1,3 млрд бағалаумен $200 млн инвестиция тартты, ал АҚШ апелляциялық соты Дональд Трамптың ФРЖ мүшесі Лиза Кукты мерзімінен бұрын қызметінен босату әрекетін бұғаттады. Осы және басқа да тақырыптар туралы 16 қыркүйек таңына арналған негізгі оқиғалар шолуымызда.
Алтын рекорд жаңартты — ФРЖ мөлшерлемесін төмендету күтілуде
Bloomberg агенттігінің хабарлауынша сейсенбі күні алтын бағасы унциясына $3685-тен асып, тарихи рекорд орнатты. Бұл АҚШ Федералды резерв жүйесінің пайыздық мөлшерлемені төмендететініне қатысты болжамдарға байланысты болды. Доллардың әлсіреуі мен еңбек нарығындағы әлсіз мәліметтер ақша-несие саясатының әрі қарай жұмсаруы жөніндегі күтілімдерді арттырды.
Биыл алтын бағасының өсуі 40%-дан асып, S&P 500 индексінен озып, инфляцияға бейімделген 1980 жылғы ең жоғарғы деңгейден де асып түсті. Нарыққа қолдау көрсетіп отырған негізгі факторлар — орталық банктердің сатып алуы, ETF-терге ақша ағыны және геосаяси белгісіздіктің сақталуы.
ФРЖ-ға қосымша қысым жасаған фактор — Дональд Трамптың араласуы. Ол кеңес мүшесі Лиза Кукты отставкаға жіберуге ұмтылып, жұмсақ саясатты қолдап отыр. Goldman Sachs-тың болжауынша егер жеке инвесторлар мемлекеттік облигациялардан алтынға кемінде 1% активтерін қайта бөлсе, алтын бағасы унциясына $5000-ға дейін көтерілуі мүмкін.
Nothing стартапы жасанды интеллект смартфондары үшін $200 млн тартты
Reuters-тің мәліметі бойынша OnePlus компаниясының экс-тең құрылтайшысы Карл Пей негізін қалаған Nothing смартфон өндірушісі $1,3 млрд бағалауымен $200 млн инвестиция тартты. Инвестициялық раундты Tiger Global қоры басқарды, оған GV, Highland Europe, EQT және басқа да инвесторлар қатысты. Компания құрылғыларына жасанды жады технологияларын интеграциялауды көздеп отыр.
2020 жылы құрылғаннан бері Nothing смартфондар мен құлаққаптар шығарып, миллиондаған гаджеттерді сатқан және $1 млрд-тан астам жалпы сату көлеміне жеткен. Жаңа капитал экожүйені дамытуға, соның ішінде смартфондар, аудиотехнологиялар және смарт-сағаттар бағыттарына жұмсалады.
Пейдің айтуынша болашақта компанияның операциялық жүйесі смарт-көзілдіріктерге, гуманоидты роботтарға және электромобильдерге таралуы мүмкін. 2023 жылы өткен алдыңғы қаржыландыру раундында стартап шамамен $100 млн тартқан болатын.
Апелляциялық сот Трампқа ФРЖ мүшесі Лиза Кукты отставкаға жіберуге тыйым салды
CNBC-дің хабарлауынша Колумбия округінің федералды апелляциялық соты Дональд Трамптың ФРЖ кеңесінің мүшесі Лиза Кукты отставкаға жіберу туралы әрекетіне тыйым салды. Бұл шешім пайыздық мөлшерлемені төмендету мәселесі қаралатын отырыстың алдында қабылданды. Осылайша, Кук сейсенбіде басталған екі күндік отырысқа қатыса алады.
Трамп тамыз айында Кукты ипотекалық алаяқтық жасады деп айыптап, оны қызметінен босатуға тырысты. Алайда сот бұл айыптауларды күмәнді деп танып, Ақ үйдің әрекетін орталық банктің тәуелсіздігіне қауіп төндіреді деп бағалады. Байден тағайындаған және Джером Пауэллмен бір бағытта дауыс беретін Кук отставкаға қарсы шағым түсіріп, айыптауларды жоққа шығарды.
Екі демократ-судья төменгі сот шешімін қолдады және Трамптың әрекетін Конституцияны бұзу ретінде бағалады. Жалғыз қарсы шыққан судья — Трамптың өзі тағайындаған судья, ол әкімшілік мүддесі басым деп есептеді.
Tesla жылдың басынан бері қайта өсімге шықты
CNBC-дің мәліметі бойынша дүйсенбіде Tesla акциялары 3,6%-ға қымбаттап, $410,26 деңгейіне жетіп, 2024 жылдың соңындағы көрсеткіштен асты. Қор нарығы Дональд Трамптың жаңа баж салығы туралы мәлімдемесінен кейін құлаған сәуір айындағы минимум — $221,86-дан бері акциялар 85%-ға өсті. Өсімге Илон Масктың компания акцияларын шамамен $1 млрд көлемінде өзінің отбасылық қор арқылы сатып алғаны туралы жаңалық әсер етті.
Раллиге қарамастан, Tesla мегакапитализациялы технологиялық алыптар арасында аутсайдер болып қала береді. Ол тек Apple-ден ғана (жыл басынан бері 5%-ға төмендеген) озып тұр. Электромобильдер сатылымы ескірген модельдер мен қытайлық BYD компаниясының бәсекелестігі салдарынан төмендеп жатыр. Сонымен қатар, Масктың саяси белсенділігі, оның ішінде Трамптың сайлауалды кампаниясына көп миллиондық қолдау көрсетуі қосымша тәуекелге айналды.
Компанияның болашақтағы бағыттары — MegaBlocks энергетикалық жүйелері, роботакси жобасы және Optimus гуманоидты роботтары. Алайда жүргізушісіз көліктер әлі жаппай өндіріске дайын емес, ал роботтар коммерциялық сатылымнан алыс концепт күйінде қалып отыр, деп хабарлайды телеарна.
Нарықтағы жағдай
— Жапонияның кең ауқымды Topix индексі 0,47%-ға өсті.
— Nikkei 225 индексі 0,54%-ға өсті.
— Оңтүстік Кореяда Kospi индексі 1,2%-ға өсті, шағын компаниялардың Kosdaq индексі айтарлықтай өзгерген жоқ.
— Австралиялық S&P/ASX 200 индексі 0,26%-ға төмендеді.
— S&P 500, Nasdaq 100 және Dow Jones Industrial Average индексіне арналған фьючерстерде айтарлықтай өзгеріс жоқ.
