Таяу Шығыстағы бітімге үміт артқан соң алтын бағасы құлдырады. Енді не күтеміз?
24 маусымда алтын бағасы екі апта ішіндегі ең төменгі деңгейге түсті. АҚШ президенті Дональд Трамп Израиль мен Иран арасындағы атысты тоқтату туралы мәлімдеген соң құлдырау орын алды. Қақтығыстың ушығуының алдын алу үміті инвесторлардың қорғаныс активтеріне деген сұранысын азайтып, тәуекелді активтердің тартымдылығын арттырды. Соған қарамастан, алтын өндіруші компаниялардың акциялары әлі де тартымды болуы мүмкін – алтынға деген сұраныс пен ұсыныс арасындағы теңгерімсіздік бағаның әрі қарай өсуіне ықпал етеді.
Егжей-тегжейлі
Сейсенбі күні таңертеңгі саудада алтынның споттық бағасы 1,6%-ға төмендеп, трой унциясы үшін $3316 болды. Бұл 11 маусымнан бергі ең төменгі көрсеткіш. АҚШ-тағы алтын фьючерстері 1,7%-ға арзандап, $3337,5-ке түсті.
Tastylive компаниясының жаһандық макроэкономика бөлімінің басшысы Илья Спивак Reuters агенттігіне берген түсіндірмесінде АҚШ пен Иран арасындағы қатынастың жұмсаруы геосаяси тәуекелдердің көп бөлігін нарықтан ығыстырғанын айтты. Трамп жариялаған Израиль мен Иран арасындағы атысты толық тоқтату 12 күнге созылған қақтығысты аяқтауы мүмкін. Бұл қақтығыс әлемдік мұнай нарығына әсер етіп, жеткізу тізбегінде үзілістер туғызуы ықтимал еді.
Соңғы сағатта алтын бағасы сәл қалпына келді: Израиль Иранды жаңа зымыран ұшырды деп айыптап, атысты тоқтату режимін бұзғаны үшін Тегерандағы режим нысандарына «күшті соққы» береміз деп уәде еткен соң баға унциясы үшін $3327 шамасында тұрақтады – бұл алдыңғы күнгі жабылу деңгейінен 1,2%-ға төмен.
Алда не күтеміз
Жыл басынан бері алтын бағасы 28%-ға қымбаттады – бұл ең алдымен геосаяси шиеленістердің күшеюіне байланысты. Сондай-ақ, Трамптың тарифтік саясатының экономикалық салдарына қатысты алаңдаушылық пен орталық банктердің алтын сатып алуы да бағаға әсер етті. 24 және 25 маусым күндері инвесторлар АҚШ Конгресіндегі Федералды резерв төрағасы Джером Пауэллдің сөзін мұқият бақылайды – олар ақша-несие саясатының жұмсаруы туралы белгілерді күтуде, деп хабарлайды Bloomberg. Агенттік атап өткендей, пайыздық мөлшерлемелердің төмендеуі алтынға деген сұранысты арттырады, өйткені алтын пайыздық табыс әкелмейді.
Алтын «акциялар» не болмақ?
Қысқа мерзімде алтын бағасы өсе береді деп болжайды Zacks Investment Research. Бұған Ресей мен Украина арасындағы төртінші жылға жалғасқан қарулы қақтығыс, алтын өндірісінің өсуін қамтамасыз етудегі қиындықтар және жоғары технологиялық салалар мен медицина тарапынан алтынға деген қосымша сұраныс әсер етеді. Сараптама компаниясының пікірінше сұраныс пен ұсыныс арасындағы теңгерімсіздік алтын бағасының 2026 жылға қарай унциясына $4000-ға жетуіне ықпал етуі мүмкін.
23 маусымда Zacks алтын өндіру секторындағы келесі төрт компания акциясын «сатып алуға лайық» (Strong Buy) деп бағалады:
АҚШ-тың Royal Gold компаниясы тікелей өндірумен айналыспайды, бірақ қымбат металдарды өндіретін компаниялар өнімінен түсетін табысқа (стримингтік келісімшарттар мен роялти құқықтар) инвестиция салады. Негізгі фокусы – алтын. 2025 жылы болжамды табыс өсімі – 35,9%. Соңғы екі айда Zacks-тің осы жылға арналған табысқа қатысты консенсус-болжамы 9,3%-ға артты.
Канадалық Franco-Nevada да роялти мен стриминг инвестицияларға маманданған. Негізгі бағыты – алтын, сондай-ақ күміс, платина тобы металдары, мұнай мен газ, басқа да шикізат ресурстары. Компанияның 54 табысты активі бар және 250-ден астам жоба әзірлеу мен барлау сатысында. Ақша ағынының негізгі көздері – Латын Америкасындағы Antamina, Antapaccay, Candelaria және Cobre Panama шахталары. 2025 жылы болжанатын табыс өсімі – 41,7%. Соңғы 60 күнде Zacks-тің консенсус-болжамы 6,3%-ға жақсарды.
Оңтүстік Африканың Harmony Gold – елдегі ең ірі алтын өндіруші. 2023 қаржы жылында компания 1,47 млн трой унция (45,7 тонна) алтын өндірген. Күтілетін табыс өсімі – 14,3%, ал консенсус-болжам соңғы екі айда 3,7%-ға артты.
АнглоGold Ashanti – ОАР-дың тағы бір тартымды компаниясы. Ол Африка, Америка және Австралияда алтын өндіреді. Негізгі активі – Geita жобасы. 2025 жылы болжамды табыс өсімі – 100%-дан асады, ал консенсус-болжам соңғы 60 күнде 97,2%-ға күрт өсті.
