Таңғы шолу: Азия өсуде, АҚШ Қытай мен Үндістанға қысым жасауда
Азия қор индекстері Жапониядағы саяси өзгерістер мен Қытай экономикасының қалпына келуіне қатысты үміттің күшеюі аясында өсім көрсетті, ал Еуропада көңіл-күй нашарлады – S&P агенттігі Францияның кредиттік рейтингін күтпеген жерден төмендетті. Осы және өзге де тақырыптар 20 қазан таңына арналған негізгі оқиғалар шолуында.
Азия өсуде: Жапониядағы саяси өзгерістер және Қытайға артылған үміт
Азия нарықтары аптаны қуатты өсіммен бастады, бұған Уолл-стриттегі сәтті серия мен банк секторына және Қытаймен сауда соғысына қатысты қорқыныштың азаюы әсер етті.
Жапонияның Nikkei 225 индексі 3% көтеріліп, рекорд жаңартты. Бұған Либерал-демократиялық партияның жаңа коалиция құруы және Санаэ Такаичиге қолдау білдіруі себеп болды. Ол Жапония тарихында алғашқы әйел премьер-министр болуы мүмкін деп хабарлайды AP. Күтулер бойынша, ол төмен пайыздық мөлшерлемелер мен белсенді мемлекеттік шығындар саясатын жалғастырады.
Қытай экономикасы жылдық есеппен 4,8% өсім көрсетті, бұл соңғы 12 айдағы ең төменгі қарқын болып табылады, бірақ экспорт тұрақты қалды. Пекиндегі Қытай Коммунистік партиясының съезі басталды, ол алдағы бес жылға арналған экономикалық мақсаттарды және кадрлық ауысуларды айқындайды.
Hang Seng индексі +2,6% өсті, Shanghai Composite +1% көтерілді, ал Оңтүстік Кореяның Kospi индексі +1,7% өсті. Бұл өсім чип өндірушілерге деген сұраныстың артуына және АҚШ-пен сауда келісіміне үміттен туындады.
Франция облигациялары құлдырады: S&P рейтингі күтпеген жерден төмендеді
S&P Global Ratings Францияның егеменді кредиттік рейтингін AA- деңгейінен A+ деңгейіне күтпеген жерден төмендетті. Бұл француз облигацияларының фьючерстерінің құлдырауына және елдің мемлекеттік қаржысының тұрақтылығына алаңдаушылықтың артуына әкелді, деп хабарлайды Bloomberg.
Бұл бір ай ішіндегі екінші рейтинг төмендеуі болып табылады. Бұған дейін, қыркүйекте Fitch рейтингті қысқартқан, ал Moody’s өз шешімін осы аптада жариялайды.
Аналитиктердің пікірінше екі «A» рейтингі жоғалуы кейбір қорларды француз облигацияларын мәжбүрлі түрде сатуға итермелеуі мүмкін, өйткені олар тек жоғары рейтингті активтерді ұстауға міндеттелген.
Экономистер S&P шешімін саяси дағдарысқа және президент Макронның зейнетақы реформасын тоқтатуына байланыстырады. Премьер Себастьен Лекорню бұл қадам арқылы билікте қалуға тырысты. Бұл жаңа сайлаулардан құтқарса да, бюджет консолидациясын қиындатты. Қазан айында француз және неміс он жылдық облигациялардың кірістілігі арасындағы айырмашылық 90 базистік пунктке жетті, бұл өсіп келе жатқан тәуекелдерді көрсетеді.
Мохамед Эль-Эриан, Pacific Investment Management компаниясының бұрынғы басшысы: «Рейтингтің төмендеуі Еуроаймаққа деген сенімді шайқайды және қарыз алу құнын арттырады».
Француз облигациялары инвестициялық деңгейде қала берсе де, олардың тартымдылығы орталық банктер мен зейнетақы қорлары сияқты консервативті инвесторлар үшін төмендейді. Қазір нарық назарын 2026 жылға арналған бюджеттік келіссөздер мен Moody’s рейтингінің мүмкін қайта қаралуына аударды, деп жазады Bloomberg.
Трамп: Қытаймен келіссөздердің басты тақырыптары – сирек жер металдары, фентанил және соя
АҚШ президенті Дональд Трамп Вашингтон үшін Қытаймен қарым-қатынастағы басты мәселелер ретінде сирек жер металдары, фентанил және американдық соя сатып алуды атады, деп хабарлайды Bloomberg.
Трамп: «Мен олардың бізбен сирек металдар ойынымен ойнауын қаламаймын», — деді.
Ол Қытайға фентанил экспортын тоқтатуды және американдық сояны қайтадан сатып ала бастауды айтты.
Бұл мәлімдемелер екі ел арасындағы уақытша сауда қақтығысын тоқтату келісімі аяқталуына жақындаған шақта жарияланды. АҚШ пен Қытай арасындағы келіссөздер осы аптада Малайзияда өтеді, ал министрлер онлайн кездесу өткізген еді. АҚШ жаңа баж салығын енгізіп, технологиялық шектеулерді кеңейткеннен кейін қатынастар шиеленісті. Қытай өз кезегінде сирек жер металдары мен стратегиялық материалдарды экспортқа бақылау қойды.
Трамп Fox News-пен сұхбатында 100% баж енгізу қаупі бар екенін айтты, бірақ бұл «ұзаққа созылмайды» деп атап өтті. Ол ҚХР төрағасы Си Цзиньпинмен АТЭС саммитінде кездесуді жоспарлап отырғанын айтты.
«Біз Қытаймен жақсы қарым-қатынас орнатамыз, бірақ келісім әділ болуы тиіс», — деді АҚШ президенті.
Үндістан АҚШ-пен жақындасуда
Bloomberg-тің хабарлауынша Үндістан АҚШ-пен сауда келісіміне жетуге және тарифтерді азайтуға бағытталған келіссөздерде маңызды прогресске жетті. Үндістандық шенеуніктердің айтуынша тараптар келіспеушіліктерді азайтты және қазір «маңызды қарама-қайшылық жоқ».
Нью-Делиден келген делегация соңғы аптада Вашингтонда «оң нәтижелі кездесулер» өткізді.
Дональд Трамп бұған дейін Үндістанды Ресей мұнайын сатып алғаны үшін сынап, 50% баж енгізген еді. Дегенмен, соңғы аптада ол риторикасын жұмсартып, премьер-министр Нарендра Модимен екі рет сөйлесті. Трамп Үндістан Ресейден мұнай сатып алуды «қадамдап тоқтатады» деп айтты. Нью-Делиде бұл сөздер ресми түрде жоққа шығарылмады, бірақ энергетикалық саясат тұтынушылар мүддесін ескеретінін хабарлады.
Украинадағы соғыс басталғаннан кейін Үндістан Ресей мұнайын көп сатып алушы елдердің бірі болды, ол импорттың шамамен үштен бірін құрайды. Дегенмен, Үндістандық мұнай өңдеу зауыттары сатып алуды қысқартуды жоспарлап отыр және билік американдық мұнай жеткізілімін арттыру мүмкіндігін қарастырып жатыр. Трамп, өз кезегінде, энергетикалық бағыттағы уәделер орындалмаса, «үлкен тарифтерді» сақтау қаупін айтты.
Нарықтардағы жағдай
Жапонияның кең индексы Topix +2,2% , Nikkei 225 +3%, Оңтүстік Кореяның Kospi +1,7%, Kosdaq +2%, Австралияның S&P/ASX 200 +0,4% қосты.
АҚШ фьючерстері: Nasdaq 100 +0,5%, S&P 500 +0,4%, Dow Jones Industrial Average +0,3% өсті.
