Таңғы шолу: Google Anthropic-ке инвестиция салмақ, Snap пен Robinhood болжамнан асты
Google жасанды интеллект әзірлеушісі Anthropic компаниясына жаңа инвестиция құю мүмкіндігін талқылап жатыр. Егер мәміле жүзеге асса, стартаптың бағалануы $350 млрд-тан асып, OpenAI-мен генеративті ІІ жарысында позициясын нығайтуы ықтимал. Snapchat желісінің иесі күтпеген табыс өсімімен Уолл-стритті таңғалдырды, ал Perplexity AI стартапымен серіктестік туралы хабардан кейін компания акциялары 15%-ға көтерілді. Осы және өзге де маңызды жаңалықтар — 6 қараша таңындағы шолуда.
Google Anthropic-ке инвестиция көлемін арттыруды қарастыруда
Business Insider мәліметінше Google Anthropic-ке қосымша инвестиция салу бойынша келіссөздер жүргізіп жатыр. Бұл келісім жүзеге асса, компания құны $350 млрд-тан жоғары бағалануы мүмкін. Мәміле әзірге бастапқы кезеңде және ол стратегиялық әріптестік түрінде жасалуы ықтимал: оған қосымша Google бұлттық қуаты немесе айырбасталатын облигациялар кіреді.
Google бұған дейін Anthropic-ке $3 млрд-тан астам қаражат құйып, компанияның 14%-ын иеленіп отыр. Күзде стартап $13 млрд инвестиция тартып, $138 млрд бағаланған еді. Жаңа раунд Anthropic пен OpenAI арасындағы ірі тілдік модельдер нарығындағы бәсекенің күшеюі аясында өтіп жатыр: мұнда Google мен Amazon – Anthropic-ті, ал Microsoft пен Nvidia – OpenAI-ді қолдайды.
Snap табысын өсірді және Perplexity AI-пен серіктестік орнатты
CNBC-дің хабарлауынша Snap акциялары қаржылық есеп жарияланғаннан кейін кеңейтілген саудада 15%-ға көтерілді. Компания табысы 10%-ға өсіп, $1,51 млрд-қа жетіп, аналитиктердің болжамынан жоғары болды. Күн сайынғы белсенді қолданушылар саны 477 млн-ға өсті. Сонымен қатар, Snap $500 млн көлемінде акцияларды кері сатып алу бағдарламасын және Perplexity AI-пен жаңа серіктестікті жариялады — осы серіктестік аясында Perplexity іздеу чатботын Snapchat-ке енгізеді.
Perplexity бір жыл ішінде Snap-ке $400 млн ақшалай және акция түрінде төлейді. Интеграция 2026 жылдан басталып, Snapchat-ті жетекші ІІ-компаниялар платформасына айналдыру стратегиясының бөлігі болмақ. Пайдаланушылар белсенділігінің кейбір аймақтарда төмендеуіне және реттеушілер қысымының артуына қарамастан, компания келесі тоқсан табысын $1,71 млрд-қа дейін жеткізуді және EBITDA-ны $310 млн-ға өсіруді жоспарлап отыр.
Robinhood табысын екі есе арттырып, Уолл-стрит күтулерінен асып түсті
CNBC-дің мәліметінше Robinhood үшінші тоқсанда аналитиктердің күтулерінен жоғары нәтижелер көрсетті: таза пайда $556 млн немесе акцияға шаққанда $0,61 болды. Жалпы табыс $1,27 млрд-қа жетті (күтілгені — $1,19 млрд). Компанияның жылдық табысы екі есеге, ал таза пайдасы шамамен төрт есеге өсті.
Транзакциялардан түскен табыс болжаудан сәл төмен болып, $730 млн-ды құрады (күтілгені $739 млн), дегенмен компания бизнесін белсенді түрде әртараптандырып жатқанын атап өтті. Үшінші тоқсанда Robinhood Prediction Markets және Bitstamp бағыттарын іске қосып, олар қазірдің өзінде жылына шамамен $100 млн табыс әкеліп отыр. Брокерлік платформа капиталды басқару саласындағы позициясын нығайтып, Coinbase-тен қалып қойған айырманы қысқартып және Fidelity мен Schwab сияқты ірі қарсыластардың клиенттерін өзіне тартып жатыр.
Pony.ai және WeRide Гонконг биржасында құлдырады
CNBC-дің хабарлауынша қытайлық Pony.ai және WeRide компанияларының Гонконгтағы алғашқы сауда күнінде акциялары тиісінше 14% және 12% төмендеді. Бұған дейін АҚШ-та да листингтен өткен бұл екі компания шамамен $860 млн және $305 млн тартып, қаражатты 4-деңгейлі автономды жүргізу технологияларын дамытуға және операцияларды кеңейтуге бағыттауда.
Гуанчжоуда орналасқан Pony.ai мен WeRide Таяу Шығыс, Еуропа және Азия нарықтарына шығуды жоспарлап отыр. Бұл ретте олар реттеуші шектеулерге, соның ішінде АҚШ-тың ақылды көлік жүйелерінде қытайлық технологияларды пайдалануға тыйым салуына тап болды. Сарапшылардың айтуынша, Гонконгтағы қос листинг — стартаптар үшін тәуекелдерді азайту және азиялық капиталды тартудың жолы, әсіресе Baidu Apollo Go және Waymo секілді бәсекелестердің күшеюі жағдайында.
Нарықтағы жағдай
— Жапонияның кең ауқымды Topix индексі 1,38%-ға өсті. Nikkei 225 — 1,28%-ға көтерілді.
— Гонконгтың Hang Seng индексі 1,64%-ға көтеріліп, Қытайдың CSI 300 индексі 1,42%-ға артты.
— Оңтүстік Кореяда Kospi 0,67%-ға өссе, Kosdaq 0,36%-ға төмендеді.
— Австралияның S&P/ASX 200 индексі 0,3%-ға өсті.
— Nasdaq 100, S&P 500 және Dow Jones Industrial Average фьючерстері айтарлықтай өзгерген жоқ.
