Таңғы шолу: Канаданың баж салықтары, Intel–TSMC шиеленісі

Қытайдың алдыңғы қатарлы техкомпаниялары — Alibaba мен ByteDance — өздерінің жасанды интеллект модельдерін шетелде оқытып, Nvidia чиптеріне қол жеткізу үшін АҚШ шектеулерін айналып өтіп жатыр, деп хабарлайды Financial Times дереккөздері.

Ал Қытайдағы ең ірі девелоперлердің бірі Vanke төлемдерді кейінге қалдыруды сұрап, облигацияларының күйреуіне және бүкіл секторда дүрбелең туғызды. Осы және өзге де жаңалықтар 27 қараша таңына арналған шолуда.

Қытайдың техгиганттары ЖИ-модельдерді шетелде оқытып, АҚШ шектеулерін айналып өтуде

Financial Times мәліметінше, Alibaba, ByteDance және басқа да ірі қытайлық компаниялар Оңтүстік-Шығыс Азиядағы дата-орталықтарды жалға алып, жаңа ІІ-модельдерін сол жақта оқытуды бастады.

Мақсат — АҚШ-тың қатаң экспорттық бақылауына түскен Nvidia H20 сияқты алдына жан салмайтын ЖИ-жеделдеткіштерге заңды түрде қол жеткізу.

Компаниялар көбіне Сингапур мен Малайзиядағы инфрақұрылымды пайдаланып жатыр. FT дереккөздері мұндай «офшорлық оқу» көлемі АҚШ сәуірде чиптерге шектеуді күшейткелі бері тез өсіп жатқанын айтады.

Тек бір ғана ерекшелік бар: DeepSeek — Nvidia чиптерін алдын ала мол қоры бар компания. Ол модельдерін ел ішінде оқытып, сонымен бірге Huawei бастаған қытайлық чипөндірушілермен жаңа буын ЖИ-процессорларын жасап жатыр.

Vanke дағдарысы Қытай жылжымайтын мүлік нарығындағы жайсыздықты күшейтті

Қытайдың беделді, ең тұрақты девелоперлерінің бірі саналатын Vanke жергілікті облигация бойынша 2 млрд юань төлемді кейінге қалдыруды сұрады.

Бұл оның бондтарын тарихи минимумға дейін құлатты және Пекин тіпті ірі құрылыс компанияларының өзін құтқаруға қаншалықты дайын деген сұрақты одан әрі ушықтырды, деп жазады Bloomberg.

Evergrande мен Country Garden күйреуінен кейін әлі толық қалпына келмеген сектор үшін бұл жағдай үлкен соққы болды. Vanke дефолт жасаса немесе қарыздарын қайта құрылымдаса, нарықта жаппай жұқтыру әсері болуы мүмкін деген қауіп күшейді.

Bloomberg атап өткендей, биліктің нарықты қолдау мен жекелеген компанияларды құтқарудан бас тарту арасындағы тепе-теңдігі өте әлсіз күйде.

Компанияның басты акционері Shenzhen Metro-дан алған қарыздарына қарамастан, Vanke-де қысқа мерзімді борыш пен қолма-қол қаражат арасында алып айырмашылық бар, ал сатылымдары екі есеге төмендеді.

Сарапшылардың ойынша ықтимал дефолт — ипотекалық мөлшерлемелерді субсидиялау сияқты ынталандыру шараларының тиімділігін төмендетіп, тұрғын үй бағасының әрі қарай құлдырауын жеделдетуі мүмкін.

Intel TSMC-дың «технология ұрлады» деген айыптауларын теріске шығарды

TSMC сотқа жүгініп, бұрынғы топ-менеджері Вэй-Джэнь Ло Intel-ге өткен соң компанияның құпияларын пайдалануы мүмкін деген күдік келтірген еді.

Yahoo Finance жазғандай, Intel бұл айыптауларды негізсіз деп атап, бәсекелестердің зияткерлік меншігін қорғау бойынша өздерінде қатаң ережелер бар екенін еске салды.

Вэй-Джэнь Ло TSMC-де 20 жылдан аса жұмыс істеп, оның негізгі чип желілерін жаппай өндіріске шығаруында маңызды рөл атқарған. Бұған дейін ол Intel-де 18 жыл еңбек еткен.

Тайвань экономика министрлігі бұл істің ұлттық қауіпсіздікке немесе стратегиялық технологияларға қатысы бар-жоғын тексеретінін мәлімдеді. Егер солай болса, әлемдегі екі ірі чипөндіруші арасындағы қақтығыстың деңгейі жаңа сатыға көтерілуі мүмкін.

Канада болат өнімдеріне 25% жаңа баж енгізді

Канада премьер-министрі Марк Карни құны 10 млрд канадалық доллар болатын — жел генераторларына арналған мұнаралардан бастап, бекіткіштер мен сымға дейінгі бірқатар болат өнімдеріне 25% кедендік баж енгізілетінін жариялады, деп хабарлайды Bloomberg.

Бұл тауарлардың шамамен 40%-ы АҚШ-тан келетіндіктен, бұл шешім қыркүйекте шектеулердің көп бөлігі алынып тасталғаннан бері Канада тарапынан АҚШ өнімдеріне салынған алғашқы кеңейтілген баж болып отыр.

Карни бұл шаралар Канада болат өнеркәсібін қорғауға бағытталғанын, бірақ АҚШ-қа қарсы жасалған қадам емес екенін баса айтты.

Сонымен бірге үкімет америкалық болатты пайдаланатын өндіріс пен агрокәсіпорындар үшін баждан босату өтініштерін қабылдау мерзімін соңғы рет ұзартып отыр.

Гонконгтағы биік кешендегі өрт 44 адамның өмірін қиды

Гонконгтағы алып «Wang Fuk Court» тұрғын кешенінде болған алапат өрт 44 адамның қаза болуына, шамамен 300 адамның жоғалып кетуіне әкелді, деп хабарлады Reuters.

Полиция өртке құрылыс компаниясының немқұрайлылығы себеп болуы мүмкін екенін айтады.

Ғимараттар қорғаныс торлары мен пластик материалдармен қапталған, олар өрт қауіпсіздігі талаптарына сәйкес келмеуі ықтимал. Құрылыс компаниясының үш қызметкері қамауға алынды, кеңседе тінту жүргізілді.

Бұл — 1948 жылдан бергі Гонконгтағы ең өлімші өрт.

Оқиға Қытай қалаларындағы тығыз салынған мыңдаған биік кешендерде ұқсас қауіптер болуы мүмкін екенін көрсетіп отыр. Қытайда биіктігі 150 метрден асатын 3500-ден астам ғимарат бар — бұл әлем бойынша ең жоғары көрсеткіш.

Нарықтардағы жағдай