Пентагон Alibaba және BYD компанияларын қара тізімге қосуды жоспарлап отыр

АҚШ Қорғаныс министрлігі Қытайдың электронды коммерция көшбасшылары және ЖИ әзірлеушілері Alibaba Group пен Baidu, сондай-ақ автоөндіруші BYD пен Қытайдың тағы бес компаниясы Қытай қарулы күштеріне қолдау көрсететін ұйымдар тізіміне енгізілуі тиіс деген қорытындыға келді. Бұл туралы Конгреске жіберілген хатта айтылған. Хат Трамп пен Си Цзиньпин 30 қазанда Оңтүстік Кореяда өтетін кездесуден шамамен үш апта бұрын жолданған. Сол кездесуде тараптар баждарды төмендетуді және кейбір экспорттық шектеулерді уақытша тоқтатуды қамтитын шаралар пакеті жөнінде келіскен.

Bloomberg дерегінше, қорғаныс министрінің орынбасары Стивен Файнберг өз ұстанымын 7 қазандағы хатта баяндаған. Ол хат Өкілдер палатасы мен Сенаттың қарулы күштер комитеттерінің төрағаларына жолданған. Агенттік осы құжаттың көшірмесін алған.

Аталған компаниялардың ресми түрде 1260H деп аталатын тізімге енгізілгені әзірге белгісіз. Тізімге ену автоматты түрде санкция салуды білдірмейді, бірақ америкалық инвесторларға ықтимал қауіп туралы қатаң ескерту ретінде қарастырылады, деп жазады агенттік. Бұл тізім жыл сайын жаңарып отырады. Онда АҚШ-та жұмыс істейтін және Қытай қарулы күштерімен байланысы бар компаниялар көрсетіледі. Қаңтарда шыққан соңғы нұсқада, Трамп қызметке кіріспей тұрып, аталған компаниялар болмаған.

Пентагон хатына кірген басқа компаниялар:

— Eoptolink Technology,

— Hua Hong Semiconductor,

— RoboSense Technology,

— WuXi AppTec Co,

— Zhongji Innolight.

Хатта аталған сегіз қытайлық компанияның өкілдері Bloomberg сұрауына жауап бермеді.