Таңғы шолу: OpenAI Foxconn-мен келісім жасады, Walmart теңсіздіктің күшеюіне алаңды
Жапония үкіметі пандемиядан бергі ең ауқымды 21,3 трлн иенге (шамамен $135 млрд) тең ынталандыру пакетін бекітті. Бағдарлама инфляциямен күресуге, үй шаруашылықтарын қолдауға және қорғаныс әлеуетін күшейтуге бағытталған. Ал АҚШ-та табыс теңсіздігінің артуы алаңдатуда. Walmart соңғы он жылдағы ең үлкен алшақтықтың байқалғанын хабарлайды. Осы және өзге де маңызды жаңалықтар 21 қараша таңындағы негізгі оқиғалар шолуында.
OpenAI мен Foxconn АҚШ-та ЖИ-инфрақұрылымды жергілікті деңгейде дамытуға кіріседі
OpenAI Америкада жасанды интеллектке арналған дата-орталық компоненттерін — серверлерден бастап, энергиямен жабдықтау, салқындату және желілік жүйелерге дейін — бірлесіп әзірлеу және өндіру үшін тайвандық Foxconn компаниясымен серіктестік орнатты, деп хабарлайды CNBC.
Компаниялар ЖИ-серверлерінің бірнеше буынын қатар жасап, Foxconn олардың негізгі модульдерін АҚШ-тағы зауыттарында өндіреді. Ал OpenAI жаңа жүйелерге ерте қол жеткізіп, оларды сатып ала алады, бұл ел ішінде инфрақұрылымды жылдам өрістетуге және ұзақмерзімді өндірістік қуаттарды қамтамасыз етуге тиіс. Сэм Альтманның айтуынша, бұл — «ЖИ дәуірінің басты технологияларын АҚШ-та жасау» және өндірісті қайта жаңғырту жолындағы маңызды қадам.
CNBC атап өткендей, бұл келісім OpenAI-дың Nvidia, Microsoft, Google, Amazon және Oracle сынды ірі ойыншылармен жасаған инфрақұрылымдық серіктестіктерінің логикалық жалғасы.
АҚШ-тағы бигтех құлдырағаннан кейін Азия нарықтары да құлады
АҚШ-тағы технологиялық алпауыттардың күрт арзандауы және желтоқсандағы ФРЖ мөлшерлемесін төмендетуге қатысты әлсіреген күтулер салдарынан жұма күні Азия биржалары да қатты төмендеді, деп жазады CNBC. Жапонияның Nikkei 225 индексі сауда басында 1,5%-дан артық жоғалтты, ал SoftBank акциялары 10%-дан аса төмендеп, елдің бүкіл технологиялық секторын құлатты. Кореяның Kospi индексі Samsung мен SK Hynix қағаздарының түсуінен кейін 4%-дан көп төмендеді. Төмендеу аймақтың өзге нарықтарына да тарады: Австралияның ASX 200 — 1,3%, Гонконгтың Hang Seng — 2%-ға жуық, Қытайдың CSI 300 — 1,1% құлдырады.
ФРЖ мөлшерлемесі туралы күтулерді әлсіреткен АҚШ-тың мықты еңбек нарығы деректері теріс ахуалды күшейтті. Инвесторлар желтоқсандағы төмендету ықтималдығын небәрі 40% деңгейінде бағалап отыр. Америкалық индекстер де бір күн бұрын минуспен жабылды. Nasdaq 2%-дан артық, ал S&P 500 1,6% төмендеді (күндізгі 2%-ға жуық өсімнен кейін). Криптовалюта нарығындағы түзету жалғасты. Биткоин жеті айлық минимумға түсіп, эфир шілдеден бергі ең төмен мәнді жаңартты.
Жапония пандемиядан бергі ең ірі ынталандыру пакетін іске қосады
Жапонияның министрлер кабинеті экономикадағы баяулауды еңсеру және инфляцияның үй шаруашылықтарына қысымын азайту мақсатында 21,3 трлн иендік (шамамен $135 млрд) ірі ынталандыру пакетін бекітті, деп хабарлайды CNBC. Бағдарлама электр және газға субсидияларды, бензин салығын алып тастауды, жергілікті билікке гранттарды кеңейтуді және кеме жасау саласын дамыту үшін он жылдық қор құруды қамтиды. Үкімет 2027 жылға қарай қорғаныс шығындарын ЖІӨ-нің 2%-ына дейін арттыруды да жоспарлап отыр.
Пакет Ұлттық банктің мақсатты деңгейінен 43 ай қатарынан жоғары тұрған инфляцияға байланысты туындаған алаңдаушылықты көрсетеді. Бағаның өсуі иеннің әлсіреуімен және экономиканың баяулауымен қатар жүруде: екінші тоқсанда ЖІӨ соңғы бір жарым жылда алғаш рет қысқарды. Осыған байланысты билік валюта интервенциясы мүмкіндігін ескертіп отыр.
Walmart базалық тауарларға қолжетімділіктегі теңсіздік күшейіп бара жатқанын ескертеді
АҚШ-та күнделікті тұтыну тауарларын сатып ала алатын және ала алмайтын адамдар арасындағы айырмашылық ұлғайып келеді, деді Walmart компаниясының қаржы директоры Джон Дэвид Рейни, деп хабарлайды Yahoo Finance. Негізгі фактор — азық-түлік бағасының өсуі: олар әлі де пандемияға дейінгі кезеңмен салыстырғанда шамамен 25% жоғары. Walmart себетінің ішкі инфляциясы 1% шамасына дейін түскенімен, жалпы баға деңгейі табысы төмен отбасылар үшін тым ауыр болып тұр. Соның салдарынан «үнемшіл мінез-құлық» күшейіп, сатып алушылар қазір жиі үнемдеуде, арзан балама іздеп, ең тиімді ұсыныстарға жүгінуде.
Осыған қарамастан Walmart үшінші тоқсанда мықты нәтижелер көрсетті. АҚШ-тағы салыстырмалы сатылымдар 4,5% өсті, жалпы табыс 6%-ға артып, $179,5 млрд-қа жетті, бұл болжамнан жоғары. Акциялары 6%-дан астам көтерілді. Компания жылдық табыс пен пайда бойынша болжамын да жақсартты.
Нарықтардағы жағдай
— Жапонияның кең ауқымды Topix индексі 0,14% төмендеді. Nikkei 225 — 2,3%-ға құлдырады.
— Гонконгтың Hang Seng индексі 1,7%, ал Қытайдың CSI 300 — 2% азайды.
— Оңтүстік Кореяда Kospi 3,8%, Kosdaq 3,1% төмендеді.
— Аустралияның S&P/ASX 200 индексі 1,6% түсті.
— Nasdaq 100 фьючерстері шамамен өзгеріссіз қалды, ал S&P 500 — 0,3%, Dow Jones — 0,4% өсті.
