Таңғы шолу: семіздікке қарсы таблетка, АҚШ флотына кемелер және Голливудқа $40 млрд
АҚШ-тың Азық-түлік пен дәрі-дәрмек сапасын бақылау басқармасы (FDA) Novo Nordisk компаниясы әзірлеген семаглутид негізіндегі семіздікке қарсы алғашқы GLP-1 таблетканы мақұлдады. Бұл Novo Nordisk пен Eli Lilly арасындағы бәсекені күшейтті. TikTok иесі ByteDance жаһандық технология секторында қарыз арқылы қаржыландыру рекордтық деңгейге жеткен тұста жасанды интеллект инфрақұрылымына шамамен $23 млрд инвестиция салуды жоспарлап отыр. Осы және өзге де тақырыптар — 23 желтоқсан таңына арналған негізгі шолуда.
FDA семіздікке қарсы алғашқы GLP-1 таблетканы мақұлдады
АҚШ-тың Азық-түлік пен дәрі-дәрмек сапасын бақылау басқармасы (FDA) тарихта алғаш рет семіздікті емдеуге арналған GLP-1 таблетканы — Novo Nordisk компаниясының Wegovy препаратының пероральды түрі саналатын семаглутидті мақұлдады, деп жазады CNBC. Препарат семіздігі бар науқастарда жүрек-қан тамырлары аурулары қаупін төмендету үшін де қолдануға рұқсат етілді. Өндіріске шығару 2026 жылдың басында күтіледі, ал бастапқы 1,5 мг дозасы қаңтар айынан бастап айына $149 бағамен қолжетімді болады. Осы жаңалық аясында Novo Nordisk акциялары шамамен 10%-ға өсті.
Препараттың таблетка түрі ине салудан қорқатын немесе өз жағдайын инъекцияға лайықты деп санамайтын пациенттер үшін емге қолжетімділікті кеңейте алады. III фазадағы клиникалық зерттеу нәтижесі бойынша таблетка 64 апта ішінде салмақты орта есеппен 16,6%-ға азайтуға көмектескен. Бұл мақұлдау Novo Nordisk-ке семіздікке қарсы өз таблеткасын әзірлеп жатқан Eli Lilly-ге қатысты уақытша басымдық береді. Сарапшылар GLP-1 препараттары нарығын 2030-жылдары шамамен $100 млрд деп бағалайды, оның төрттен біріне жуығын таблеткалар алуы мүмкін.
Трамп АҚШ әскери-теңіз күштері үшін фрегаттар салынатынын мәлімдегеннен кейін Hanwha Ocean акциялары 10%-ға қымбаттады
Оңтүстіккореялық Hanwha Ocean компаниясының акциялары АҚШ президенті Дональд Трамп компанияның АҚШ Әскери-теңіз күштеріне арналған жаңа фрегаттар салу бағдарламасына қатысатынын мәлімдегеннен кейін 10%-ға қымбаттады, деп хабарлайды CNBC. Кемелер 2024 жылы Hanwha Ocean сатып алған Филадельфиядағы Hanwha Philly Shipyard верфінде салынбақ. Компания нысанға $5 млрд инвестиция салуды жоспарлап отыр, бұл Оңтүстік Кореяның кеме жасау саласын дамытуға бағытталған $150 млрд көлеміндегі міндеттемесінің бір бөлігі.
Жоба АҚШ пен Оңтүстік Корея арасындағы кең ауқымды сауда келісімінің бір бөлігі болып табылады. Бұл келісім аясында кореялық экспортқа салынатын америкалық тарифтер 15%-ға дейін төмендетіледі, ал Сеул $350 млрд көлемінде инвестициялық міндеттеме алады. Қорғаныс шығындарының артуы аясында Оңтүстік Кореяның қорғаныс компанияларының акциялары күрт өсті: Hanwha Aerospace пен Hyundai Rotem жыл басынан бері тиісінше 170% және 270%-дан астам өсті, ал Hanwha Ocean өсімі 220%-дан асты.
ByteDance ЖИ инфрақұрылымына $23 млрд салуды жоспарлап отыр
TikTok иесі саналатын қытайлық ByteDance 2026 жылы жасанды интеллект инфрақұрылымын салу үшін 160 млрд юань ($22,7 млрд) көлемінде капиталдық инвестиция жасауды қарастырып отыр, деп хабарлайды Financial Times дереккөздерге сілтеме жасап. Reuters бұл ақпаратты жедел түрде растай алмады. Бұл ықтимал инвестициялар технологиялық компаниялар арасындағы ЖИ үшін есептеу қуаттарына деген жаһандық бәсекенің бір бөлігіне айналып отыр.
Осы тұста әлемдік IT-компаниялар қарыз тартуды айтарлықтай арттырды: Dealogic деректері бойынша 2025 жылы олар $428 млрд көлемінде облигация орналастырған, оның $342 млрд-ы АҚШ-қа тиесілі. Бұрын өз ақшалай ағындарына сүйенген компаниялар қарызды жиі қолдана бастады — бұған қарыздың салыстырмалы түрде арзан болуы мен инвесторлардың жоғары сұранысы себеп. Сарапшылар ЖИ-ге арналған капиталы шығындар құрылымдық өзгеріске айналып жатқанын атап өтеді, алайда егер бұл инвестициялар күткен нәтижені бермесе, қарыз жүктемесінің өсуі тәуекелдерді күшейтеді. Бұл ірі ойыншылардың жоғары табыстылығы мен қомақты ақшалай резервтеріне қарамастан орын алып отыр.
Paramount пен Warner Bros. акциялары $40 млрд мәмілеге Ларри Эллисонның кепілдігінен кейін өсті
Paramount Skydance пен Warner Bros. Discovery акциялары Oracle негізін қалаушы Ларри Эллисон Warner Bros.-ты Paramount тарапынан сатып алу бойынша болжамды мәміле үшін $40,4 млрд көлеміндегі қаржыландыруды жеке өзі қамтамасыз етуге келіскеннен кейін күрт өсті, деп хабарлайды Yahoo Finance. Paramount акциялары 4%-дан астамға, Warner Bros. қағаздары 3,5%-дан жоғары қымбаттады. Эллисонның бұл шешімі мәміленің капитал жеткіліктілігіне қатысты WBD директорлар кеңесінің алаңдаушылығын жоюға бағытталған. Бұған дейін бұл мәміле Netflix ұсынысының пайдасына қабылданбай қалған еді.
Мәміле Warner Bros. активтерін бір акция үшін $30 бағамен сатып алуды көздейді және жалпы құны $108,4 млрд деп бағаланады. Paramount компаниясы Oracle акцияларының ірі пакетіне ие Эллисондар отбасы мәміленің equity-бөлігін толық қамтамасыз етуге кепілдік беретінін мәлімдеді. Warner Bros., HBO және HBO Max студияларын біріктіруді көздейтін Netflix-тің бәсекелес ұсынысы антимонополиялық тәуекелдерге тап болды: біріктірілген компания АҚШ стриминг нарығының шамамен үштен бірін бақылауы мүмкін, бұл Дональд Трамп әкімшілігі мен реттеуші органдардың назарын аударды.
Нарықтардағы жағдай
— 23 желтоқсанда Жапонияның кең ауқымды Topix индексі 0,4%-ға өсті, ал Nikkei 225 дерлік өзгеріссіз қалды.
— Гонконгтың Hang Seng индексі айтарлықтай өзгерген жоқ, ал Қытайдың материктік CSI 300 индексі 0,36%-ға өсті.
— Оңтүстік Кореяда Kospi индексі 0,4%-ға көтерілді, ал Kosdaq 1,01%-ға төмендеді.
— Австралияның S&P/ASX 200 индексі 1,1%-ға өсті.
— S&P 500, Nasdaq Composite және Dow Jones Industrial Average бойынша фьючерстер іс жүзінде өзгеріссіз қалды.
