Эллисон Paramount-қа Warner Bros.-ты алуға $40 млрд жеке кепіл берді
Ең бай миллиардерлердің алғашқы бестігіне кіретін Ларри Эллисон Paramount Skydance-тың Warner Bros. Discovery-ді сатып алу жоспарын күшейтті. Бұл компанияны оның ұлы Дэвид Эллисон басқарады. Эллисон ықтимал мәміле үшін $40,4 млрд көлеміндегі акционерлік қаржыландыруға жеке өзі кепіл болатынын айтты. Bloomberg жазуынша, бұл Paramount-тың Netflix ұсынған бәсекелі ұсыныспен тартыстағы позициясын нығайтуы мүмкін және WBD активтері үшін ұзаққа созылған күрестегі барлық тараптардың акция бағасына әсер етті.
Егжей-тегжейі
Oracle негізін қалаушы Ларри Эллисон Warner Bros. Discovery-ді сатып алуға пайдаланылуы мүмкін $40,4 млрд көлеміндегі акционерлік қаржыландыруға қайтарылмайтын жеке кепіл беруге келіскен. Бұл қаржыны Paramount Skydance қолданбақ, деп хабарлайды Bloomberg.
Реттеушіге тапсырылған құжатта Paramount Эллисондар отбасының трасты Oracle-дың шамамен 1,16 млрд акциясына иелік ететінін де көрсеткен. Сондай-ақ миллиардер Warner Bros.-пен мәміле талқыланып жатқан кезде трасты қайтарып алмауға және оның активтерін “теріс әсер ететін түрде” басқа жаққа бермеуге міндеттенген.
Paramount Warner Bros. Discovery акциясы үшін $30 ұсынады. Қарызын қоса есептегенде, жалпы сома шамамен $108,4 млрд болады. Бұл Netflix ұсынысынан жоғары: Netflix бір акцияға $27,75 немесе WBD-дің студиялық және стриминг активтері үшін $82,7 млрд ұсынған.
Соған қарамастан, Warner Bros. директорлар кеңесі өткен аптада акционерлерді Paramount ұсынысын қабылдамауға шақырған. Мәлімдемеде бұған себеп ретінде қаржыландыру кепілдігінің жеткіліксіздігі және соның салдарынан “көп әрі елеулі тәуекелдер” бар екені айтылған.
Bloomberg атап өткендей, отбасылық траст арқылы қаржыландыру (қажет болса активті кез келген уақытта шығарып алуға болатын құрылым) Netflix-пен алдын ала келісілген мәмілемен салыстырғанда әлсіз көрінген. Ал өз байлығын тігуге дайын миллиардердің жеке кепілі Warner Bros.-ты шешімін қайта қарауға итермелеуі мүмкін, деп санайды агенттік.
Акциялар қалай әсер етті?
Дүйсенбі, 22 желтоқсандағы саудада Paramount Skydance акциялары 4,3% өсті. Warner Bros. Discovery қағаздары 3,5% көтерілді. Осы фонда Warner Bros.-тың бизнесінің бір бөлігін сатып алуға бұған дейін келіскен Netflix акциялары шамамен 1,2% төмендеді.
Уолл-стритте Paramount Skydance-қа көзқарас сақ: MarketWatch дерегінше, 21 талдаушының 13-і акцияны портфельде ұстап тұруға кеңес береді. Бесеуі сатуды ұсынады, ал үшеуі ғана сатып алуды қолдайды. Орташа мақсатты баға 22 желтоқсандағы жабылу деңгейінен бар болғаны 5% жоғары.
Netflix-ке қатысты жағдай керісінше: 46 талдаушының 31-і акцияны сатып алуға кеңес береді. Үшеуі сақтық танытады. Ортақ мақсатты баға акцияның шамамен 40% өсу мүмкіндігін көрсетеді.
Warner Bros. акциялары бойынша қазір мүлде “сату” ұсынысы жоқ. 13 талдаушы ұстап тұруды, 11-і үлесті көбейтуді ұсынады. Бірақ орташа мақсатты бағаға қарағанда, Уолл-стрит компания акциясы алдағы 12 айда шамамен 5% ғана өседі деп күтеді.
