WBD-мен жасалған ірі мәміле Netflix акциясын қалай құлатуы мүмкін?
Тарихи мәміле соңғы жылдары медиаиндустрияны түбегейлі өзгерткен Netflix стримингтік алпауытын «Оз елінің сиқыршысы», Хәрри Поттер әлемі және DC Comics франшизасы сақталған аңыз киностудия Warner Bros. Discovery-мен біріктіреді. Мәмілеге сондай-ақ HBO Max контенті — «Клан Сопрано», «Мир Дикого Запада» және «Тақтар ойыны» секілді жобалар да кіреді. Сарапшылардың айтуынша, бұл бірігуге антимонополиялық органдар рұқсат берсе, ол Netflix-ке де, жалпы медиаиндустрияға да айтарлықтай әсер етеді.
Сарапшылар пікірі
— WBD-мен мәміле Netflix-ке ұзақ мерзімді пайда әкеле алса да, қысқа мерзімді перспективада теріс әсер етуі ықтимал, деді LightShed Partners компаниясының теңқұрушысы Рич Гринфилд. «Бұл жерде математика Netflix үшін біраз уақыт ауыр болады. Мұнда күмән жоқ, — деді ол CNBC эфирінде. — Бұл қымбат. Олар (Netflix) мәміле екінші жылға қарай пайда әкеле бастайды деп отыр. Оның қалай жүзеге асатынын әлі түсінуіміз керек, бірақ, бәлкім, олардың бірден сатып жіберуге болатын контент көлемі күрт артады», — деп түсіндірді ол. Гринфилдтің сөзінше, мәміленің бағасы соншалық «аса үлкен», тіпті «Paramount бұл ұсыныстан асып түсе алады деп елестету қиын».
Мәмілеге қолма-қол қаражат та, акциялар да кіреді, ал WBD акциясын сатып алу бағасы бір қағаз үшін $27,75 деп белгіленген. Жұту процесін 12–18 ай ішінде аяқтау жоспарланып отыр. Сонымен қатар Netflix мәміле мақұлданбаса, $5,8 млрд мөлшерінде кері өтемақы төлеуге міндеттенді. «Бұл тым көп», — деп қосты Гринфилд.
Сонымен бірге, ол ұзақ мерзімді перспективада Netflix үшін пайда едәуір болуы мүмкін екенін айтады: егер Warner Bros.-тың зияткерлік меншігінің коммерциялық әлеуетін ашып, оны ауқымдай алса. «Warner Bros. кітапханасы — бүгінде жай ғана шаң басып жатқан бай қор. Бірақ енді [контент] өндірісінің көлемі күрт өседі», — деді ол.
— Мәміле кинотеатрлар нарығына да ықпал етуі мүмкін, деп жазды Quartz. Қазірше Netflix Warner Bros. Discovery бұрын алған міндеттемелерін орындай ма, яғни фильмдерді кинотеатрларда шығаруды жалғастыра ма — бұл белгісіз. Ресми түрде стриминг платформасы барлық прокаттық міндеттемелерді орындауға уәде бергенімен, салада да, мемлекеттік шенеуніктер арасында да «бұл мәселеге қатысты елеулі алаңдаушылық сақталып отыр», — деп жазды Wedbush сарапшысы Алисия Риз инвесторларға арналған жазбасында. «Cinemark, AMC және Marcus сияқты кинотеатр желілерінің акциялары соңғы уақытта мәміледе Netflix-тің жеңіске жету ықтималдығына байланысты төмендеп кетті. Өйткені Netflix көптеген фильмдер үшін кинотеатр прокатын айтарлықтай қысқартуы немесе мүлде алып тастауы мүмкін», — деп жазады Quartz аналитиктің сөзін келтіріп.
Антимонополиялық қорқыныш
АҚШ президенті Дональд Трамптың әкімшілігі де Netflix пен Warner Bros. Discovery арасындағы мәмілеге «едәуір скепсиспен» қарап отыр, деп хабарлады CNBC-ге әкімшілікке жақын жоғары лауазымды шенеунік. Сонымен қатар, Netflix-ті сынға алуды АҚШ Сенатының екі партия өкілдері де қосылған, деп жазды Reuters.
«Бұл мәміле антимонополиялық саясат үшін нағыз қорқынышты жағдайға ұқсайды, — деді демократ сенатор Элизабет Уоррен. — Netflix пен Warner Bros. бірігіп, стриминг нарығының жартысына жуығын бақылауға алатын медиагигант құра алады — бұл жазылым бағасының қымбаттауына, контент таңдауының қысқаруына және америкалық жұмысшылар үшін қауіпке әкелуі мүмкін».
«Netflix тамаша сервис құрды, бірақ оның үстемдігін осылай күшейту стримингтің Алтын дәуірінің аяқталуы дегенді білдіруі мүмкін — әрі авторлар үшін де, көрермендер үшін де», — деп жазды X желісінде республикашыл сенатор Майк Ли.
Reuters бұған дейін хабарлағандай, әлемдегі ең ірі стриминг сервисіне HBO Max-ке ие болып, шамамен 130 млн жазылушысы бар бәсекелесті сатып алу құқығын беретін бұл мәміле АҚШ пен Еуропада қатаң антимонополиялық бақылауға түсуі мүмкін. PP Foresight сарапшысы Паоло Пескаторе да осы пікірмен келіседі: «Қазіргі реттеуші база тұрғысынан бұл мәміле нарықта түсінбеушілік пен алаңдаушылық тудырады, — деді ол (Reuters келтірген). — Егер бірігу жүзеге асса, стриминг нарығындағы үстем ойыншы мұқият тексеріледі. Бұл даулар тудыруы ықтимал».
«Әділет министрлігі осы мәмілені тоқтатуға тырысатын шығар деп есептейміз, бірақ “Трамптың мәмілелерге салатын салығы” деп аталатын кейбір элементтер бар, Netflix оларды төлеуге дайын болуы мүмкін — бұл келісімнің мақұлдануына жол ашуы ықтимал», — деп жазды New Street Research сарапшысы Блэр Левин Barron’s келтірген жазбасында.
Benchmark Research сарапшысы Мэттью Харриган WBD активтеріне тағы бір үміткер — Paramount Skydance бар екенін еске салады. Компания студияны сатып алу үшін бұрын бес рет өтінім берген. «Біздің ойымызша, Paramount Skydance шегінбейді және күресті жалғастырады», — деп жазды ол (Barron’s). Алайда сарапшының айтуынша, Paramount үшін Netflix ұсынысынан асып түсетін баға беру өте қиын. Харриганның бағалауынша, Warner бизнесінің нарықтық құны қазір акциясына $30-дан асып түсуі мүмкін, ал Paramount-тың соңғы ұсынысы — бір қағаз үшін $24.
Нарық қалай қабылдады?
Жұма күнгі саудада, мәміле жарияланғаннан кейін, Netflix қағазы алдымен 1% қымбаттап, кейін 2,5% құлдырап, $100,6-ға дейін түсті. Соған қарамастан, Evercore ISI сарапшылары 5 желтоқсанда Netflix бойынша «Нарықтан жоғары» (Outperform) рейтингін растады, компанияның «іргелі көрсеткіштері күшейіп келеді» деп атап өтті.
«Соңғы уақытта Netflix қағазы ықтимал стратегиялық мәмілелерге қатысты жаңалықтарға айтарлықтай реакция білдіріп келетінін мойындаймыз. Алайда, біздің ойымызша, компанияның ұзақ мерзімді іргелі перспективалары тұтынушыларға ұсынылатын тартымды сервисінің, стратегияны мінсіз орындау тарихының және жаһандық бәсекелестік ортадағы мықты позициясының арқасында жақсара бермек», — деп жазды Evercore сарапшыларының Investing.com келтірген жазбасы.
Ал Warner Bros. Discovery қағаздары, керісінше, өсті. 5 желтоқсандағы сауда барысында олар шамамен 4% қымбаттап, акциясына $25,5-ға дейін жетті. Егер қағаз өсе берсе, олар 2022 жылдың 13 сәуірінен бергі ең жоғарғы деңгейде жабылуы мүмкін, деп жазды Wall Street Journal. Ол кезде компания қағазы акциясына $26 деңгейінде саудаланған. Бұл WarnerMedia мен Discovery-дің бірігуінен кейін бірден болған еді.
