$72 млрд-тық мәміле: Netflix WBD бизнесінің бөлігін сатып алады
Netflix Warner Bros. Discovery-дің теле және киностудияларын, сондай-ақ стриминг бөлімшесін $72 млрд-қа сатып алуға келісті. Бұл мәміле Голливудтың ең құнды әрі көне активтерінің бірін медиаиндустрияны өзгерткен стриминг пионеріне береді, деп хабарлады Reuters.
Netflix қағазы премаркетте 1,5% төмендеп жатыр, ал Warner Bros. қағазы, керісінше, 1,7% өсіп жатыр.
Егжей-тегжейлі
5 желтоқсанда жарияланған мәміле бірнеше аптаға созылған «баға соғысының» нәтижесі болды, деп еске салды агенттік. Netflix түбі жеңіске жетіп, бір акция үшін $28 ұсынды. Бұл Paramount–Skydance-тің бір қағаз үшін ұсынған $24-дан жоғары болды.
Warner Bros. Discovery қағазы 4 желтоқсанда $24,5 деңгейінде жабылып, компанияның нарықтық бағасын шамамен $61 млрд-қа жеткізді, деп жазды Reuters.
«Тақтар ойыны», DC Comics және «Хәрри Поттер» франшизаларының иесін сатып алу Голливудтағы ықпалды Netflix жағына аударады, деп жазды Reuters. Агенттіктің айтуынша, мұның бәрі Netflix-ке Walt Disney мен Paramount-пен бәсекелесу әлеуетін күшейтеді.
«Біз бірге көрермендерге қалағанын көбірек беріп, әңгімелеу өнерінің келешегін айқындауға көмектесеміз», — деді Netflix қосдиректоры Тед Сарандос мәлімдемесінде.
Тәуекелдер
HBO Max-ке ие болып, 130 млн жазылушысы бар бәсекелесті сатып алуға мүмкіндік беретін бұл мәміле Еуропа мен АҚШ-та қатаң тексерілуі мүмкін, деді Reuters.
Бұған дейін АҚШ Конгресіне ықпалды киноиндустрия өкілдері жүгінген. Егер Netflix өтінімі мақұлданса, мәмілеге араласуды сұрады. Variety жазғандай, олар келісім саланы экономикалық және институционалдық дағдарысқа әкелуі, сондай-ақ нарықтың шамадан тыс шоғырлануына жол беруі мүмкін екенін атап өткен. Компаниялардың бірігуі бәсекені әлсіретіп, кинотуындылардың кинотеатрлардағы релиздерін азайтып, контенттің алуан түрлілігін шектеп, салада жаңа қысқартулар толқынын туғызуы ықтимал, деген болатын индустрия өкілдері.
