Warner Bros акционерлерді Paramount-тың өтінімін қабылдамауға шақырды
Warner Bros директорлар кеңесі 17 желтоқсанда акционерлерді Paramount Skydance тарапынан студияны $108,4 млрд-қа сатып алу жөніндегі ұсынысты қабылдамауға шақырды. Кеңес бұл ұсыныста қаржыландыруға жеткілікті кепілдіктер жоқ екенін мәлімдеді. Хат АҚШ-тың Бағалы қағаздар және биржалар комиссиясының (SEC) сайтында жарияланған.
Хатта директорлар кеңесінің өкілдері Paramount-тың Warner Bros акционерлерін жүйелі түрде жаңылыстырғанын атап өтті. Компания сатып алу ұсынысы бір акцияға $30 көлемінде толық кепілдендірілген немесе Oracle бас директоры, миллиардер Ларри Эллисон бастаған Эллисон әулеті тарапынан «сақтандырылған» деп мәлімдеген. «Мұндай кепіл болған жоқ және ешқашан болған емес», — деді кеңес өкілдері. Хатта Paramount-тың өтінімі көптеген және елеулі тәуекелдерге ие екені де көрсетілген.
Warner Bros директорлар кеңесі Paramount-тың ұсынысын голливудтық компания бизнесінің бір бөлігін Netflix сатып алу туралы келісімінен «нашар» деп санайтынын да мәлімдеді. Warner Bros-тың айтуынша, стриминг алыбының кино және телестудиялар, олардың кітапханасы мен HBO Max сервисі үшін бір акцияға $27,75 көлеміндегі ұсынысы — міндетті келісім, акционерлік қаржы тартуды қажет етпейді және сенімді қарыздық міндеттемелермен қамтамасыз етілген.
17 желтоқсанда премаркетте Warner Bros акциясы 1,6%, Paramount акциясы 1,2% арзандады. Ал Netflix қағазы, керісінше, 1,8% өсті.
Контекст
Өткен аптада Paramount Warner Bros акционерлеріне тікелей жүгініп, өз өтінімін «берік қаржыландырумен» қамтамасыз еткенін мәлімдеді. Компанияның айтуынша, $41 млрд көлеміндегі жаңа акционерлік капиталды Эллисон әулеті мен RedBird Capital кепілдендірген, ал $54 млрд қарыздық қаржыландыруды Bank of America, Citi және Apollo ұсынуға дайын.
«Қаржылық міндеттемелерімізді орындай алмаймыз немесе олардан жалтару үшін алаяқтыққа барамыз деген кейбір жарияланымдардағы болжамдар — абсурд», — деп жазды Paramount өкілдері өткен аптада Warner Bros акционерлеріне жолдаған хатында. Компания сондай-ақ қарыз бойынша міндеттемелер оның қаржылық жағдайына тәуелді емес екенін атап өтті.
Алайда, Warner Bros директорлар кеңесі өз хатында Paramount ұсынған қаржыландыру құрылымында «құрылымдық тәуекелдер» бар екенін көрсетіп, компанияның қаржылық ахуалы мен несие қабілетіне күмән келтірді.
Warner Bros дерегінше, Paramount ұсынған мәміле өзара шарттары бар күрделі құрылымға сүйенеді. Бұл ретте Эллисонның қайтарып алуға болатын трасты қажетті акционерлік қаржыландырудың небәрі 32%-ын ғана қамтамасыз етеді және өз жауапкершілігін $2,8 млрд көлемімен шектейді. Сонымен қатар Warner Bros траст активтері кез келген уақытта шығарылып кетуі мүмкін екенін де атап өтті.
Paramount пен Netflix бұл хатқа түсініктеме берген жоқ.
Netflix-тің Warner Bros. Discovery-дің студиялық және стримингтік бизнесін сатып алу жөніндегі келіссөздері туралы желтоқсан айының басында белгілі болды. Netflix пен Warner Bros. Discovery арасындағы мәміле $72 млрд деп бағаланған (Warner Bros. бизнесі үшін бір акцияға $27,75 — қолма-қол ақша мен бағалы қағаздар түрінде). Алайда, бір аптадан кейін Paramount Skydance бұл ұсынысты басып озуға тырысып, Warner Bros. Discovery-ді бір акциясына $30 қолма-қол ақшаға сатып алу жөнінде өтінім ұсынды.
