Таңғы шолу: : OpenAI-дың ірі раунды, Waymo-ға $15 млрд

OpenAI Amazon-нан $10 млрд-тан аса инвестиция тартуды және Microsoft-қа тәуелділікті азайтуы мүмкін қадамдарды талқылап жатыр. Alphabet-ке тиесілі Waymo $15 млрд көлемінде жаңа раунд өткізуді жоспарлауда. Warner Bros. Discovery болса Paramount ұсынысынан бас тартып, Netflix нұсқасына көбірек бейім. 17 желтоқсанға арналған негізгі оқиғаларға қысқаша шолу.

OpenAI Amazon-нан $10 млрд-тан аса инвестиция тартуы мүмкін

ChatGPT әзірлеушісі OpenAI Amazon-мен инвестиция және оның Trainium атты ЖИ-чиптерін пайдалану жөнінде келіссөз жүргізіп жатыр, деп хабарлайды CNBC. Инвестиция көлемі $10 млрд-тан асуы мүмкін, бірақ шарттар әлі нақты бекітілмеген. Bloomberg дереккөздерінің айтуынша бұл мәміле OpenAI-дың бағасын $500 млрд-тан жоғары деңгейге жеткізуі ықтимал.

Бұл келіссөздер OpenAI-дың қазан айындағы қайта құрылымдауынан кейін басталған. Ол компанияға Microsoft экожүйесінен тыс серіктестік орнатуға және капитал тартуға көбірек еркіндік берді. Бұған дейін OpenAI-ға $13 млрд-тан астам қаржы салған Microsoft енді стартапқа өз серверлері мен инфрақұрылымын ұсынуда эксклюзивті құқыққа ие емес.

Amazon бұған дейін OpenAI-дың бәсекелесі Anthropic-ке кемінде $8 млрд инвестиция салып, Inferentia және Trainium сияқты өз ЖИ-чиптерін белсенді дамытып келеді.

Waymo $15 млрд тартуды жоспарлап отыр

Alphabet құрамындағы роботакси қызметін ұсынатын Waymo шамамен $15 млрд көлемінде жаңа қаржыландыру раундын талқылап жатыр. Бұл қаржы Alphabet-тің өзінен де, сыртқы инвесторлардан да келуі мүмкін. Осы раундта компанияның бағасы $110 млрд-қа дейін жетуі ықтимал.

Қазір Waymo Остин, Сан-Франциско шығанағы, Финикс, Атланта және Лос-Анджелесте жұмыс істейді. Аптасына шамамен 450 мың ақылы сапар орындайды. 2026 жылы сервисін АҚШ-тың тағы 11 қаласында іске қосуды және Лондон нарығына шығуды жоспарлап отыр.

Warner Bros. Discovery Paramount ұсынысынан бас тартуы мүмкін

Reuters дерегінше, Warner Bros. Discovery директорлар кеңесі 17 желтоқсанда Paramount Skydance-тің $108,4 млрд-тық сатып алу ұсынысына қатысты шешімін жариялауы мүмкін. Ақпарат көздері акционерлерге бұл мәмілеге қарсы дауыс беруді ұсыну ықтимал екенін айтады.

WBD активтері үшін Netflix те таласып отыр. Ол $72 млрд көлемінде қолма-қол ақша және акциялар түрінде ұсыныс жасаған. Сомасы аз болғанымен, Netflix фаворит саналады.

Paramount ұсынысы Oracle негізін қалаушы Ларри Эллисонның ұлы Дэвид Эллисонның отбасылық капиталы, RedBird Capital және Bank of America, Citi мен Apollo берген қарыз есебінен қаржыландырылмақ. Алайда Джаред Кушнерге тиесілі Affinity Partners бұл мәмілені қолдаудан бас тартты.

Қытайлық чип өндірушінің акциялары IPO-дан кейін 700%-ға жуық өсті

MetaX Integrated Circuits атты қытайлық микросхема өндірушінің акциялары Шанхай биржасында алғашқы сауда күнінде шамамен 700% өсті. IPO бағасы 104,66 юань болса, сауда барысында котировкалар 835 юаньнан асты. Компания шамамен $600 млн тартты.

MetaX жасанды интеллектке арналған графикалық процессорлар әзірлейді. Инвесторлардың қызығушылығы Қытайдың АҚШ-қа тәуелділікті азайтып, өз чип өндірісін дамытуға ұмтылуымен байланысты. Бұл, әсіресе, Nvidia-ның ең озық ЖИ-чиптеріне қойылған экспорттық шектеулер аясында маңызды.

Lovable стартапы $6,6 млрд бағамен бағаланды

Швециялық ИИ-стартап Lovable жаңа раундта $6,6 млрд бағалаумен инвестиция тартты. Шілдедегі алдыңғы раундта компания $1,8 млрд-қа бағаланған еді. Қаржыландыруды Accel және Khosla Ventures берді. Бұл — Lovable-дың биылғы үшінші раунды.

2023 жылы құрылған стартап «vibe coding» бағытына жатады: платформа мәтіндік сұраныстар арқылы, бағдарламалау білмей-ақ қосымша мен сайт жасауға мүмкіндік береді. OpenAI және Anthropic модельдерін пайдаланады. 2025 жылдың қарашасына қарай Lovable жылдық қайталанатын табысын (ARR) $200 млн-ға жеткізген.

Нарықтардағы жағдай