Таңғы шолу: Трамп ФРЖ басшысын таңдады, криптовалюталар құлдырады, күміс рекорды
Криптовалюталар күрт арзандады — биткоин бағасы ETF-терге ақша құйылымдарының болмауы, ірі инвесторлардың қысымы және USDT токеніне қатысты алаңдаушылықтар аясында $86 мыңнан төмен түсті. Ал күміс, керісінше, жеткізілім тапшылығы, Үндістандағы жоғары сұраныс және технологиялық тұтынудың артуы арқасында тарихи максимумын жаңартты. Осы және басқа да маңызды жаңалықтар 1 желтоқсан таңына арналған шолуда.
Трамп ФРС басшылығына кандидатты таңдады
Дональд Трамп ФРЖ төрағасы қызметіне кандидат таңдалғанын және жақын арада жарияланатынын айтты. Оның айтуынша болашақ басшыдан пайыздық ставкаларды белсенді түрде төмендетуді күтеді, деп жазады Bloomberg. Агенттік дереккөздері фаворит ретінде Ақ үйдің Ұлттық экономика кеңесінің жетекшісі Кевин Хассетті атайды. Трамп олардың ақша-несие саясаты бойынша көзқарастары толық сәйкесетінін атап өтті. Таңдау процесін Қаржы министрі Скотт Бессент басқарып жатыр, ал нақты шешім Рождествоға дейін жариялануы мүмкін.
CBS эфирінде сөйлеген Хассетт өз кандидатурасы туралы пікір білдіруден бас тартып, оны «жай қауесет» деп атады. Бірақ ол Трамптың шешімі туралы жаңалықтарға нарықтың оң реакция бергенін атап өтті. Bloomberg-тің мәліметінше 10 жылдық қазынашылық облигациялар кірістілігі уақытша 4%-дан төмен түскен.
Күміс жаңа рекорд орнатты
Күміс 2%-ға қымбаттап, унциясы $57,86-ға жетіп, тарихи максимумға шықты. Биыл оның бағасы 70%-дан астам өсіп, алтыннан да озып отыр, деп жазады CNBC. Мұндай серпіліске ұсыныстың қатты тапшылығы әсер еткен. Бұдан бөлек, АҚШ-тағы пайыздық ставканың төмендеуі мүмкін деген күткен спекуляциялық сұраныс та артқан, деп көрсетеді Bloomberg.
Лондонда күміс қоры көпжылдық минимумға жетті, ал қазанда металды қарызға алу құны жылдық 200% баламасына дейін көтерілген еді. Үндістан — әлемдегі ең ірі тұтынушы — сұранысты айтарлықтай арттырып отыр: ел қажеттілігінің 80%-ын импорттан жабады, ал жаһандық өндіріс он жыл бойы қысқаруда.
Технологиялық факторлар да баға өсуін жеделдетіп тұр: электромобильдерде 25–50 грамм күміс қолданылады, ал қатты күйдегі аккумуляторларға көшу бұл көлемді автоға бір килограммға дейін арттыруы мүмкін. Сонымен қатар, күмістің жоғары жылу және электр өткізгіштігі оны ЖИ-инфрақұрылымы, күн энергетикасы және электрификация үшін маңызды металл етеді. Сарапшылар тапшылық пен сұраныстың құрылымдық өсуі бағаны әрі қарай да қолдап тұрады деп күтеді, деп жазады CNBC.
Биткоин $86 мыңнан төмен құлдырады
Дүйсенбіде криптонарық тағы да төмендеді: биткоин 5%-дан артық құлдырап, $86 мыңнан арзандады, деп хабарлайды Bloomberg. Binance деректері бойынша мәтін жазылған сәтте биткоин $86 238 деңгейінде саудаланды. Ethereum 7% төмендеп $2,8 мыңға түсті, ал Solana 7,8%-дан астам жоғалтты.
Нарық қазан айында басталған $19 млрд левереджді позициялардың жойылуынан кейін тұрақсыз күйде қалды. Өткен аптада биткоин уақытша $90 мыңнан жоғары көтерілгеніне қарамастан, инвесторлар қайтадан тәуекелден қашуда. Трейдерлердің айтуынша биткоин-ETF-терге ақша құйылымдары төмен, ал төмен бағамен сатып алушылар жоқ. Енді негізгі қолдау деңгейі $80 мыңға қарай ығысып жатыр.
Қосымша қысым Strategy басшысы Фонг Ле-нің компанияның ($56 млрд) ірі биткоин қорын сатуы мүмкін екенін мәлімдеуінен кейін күшейді. Осы жаңалықтар аясында S&P стейблкоин USDT-тің тұрақтылық бағасын төмендетіп, биткоин құлдыраған жағдайда оның толық қамтамасыз етілуіне қатысты тәуекел бар екенін ескертті.
Тайвань АҚШ-тан тарифтерді 15%-ға дейін төмендетуді талап етпек
Тайвань өз тауарларына салынатын АҚШ баж салығын қазіргі 20%-дан 15%-ға төмендеткісі келеді, деп хабарлайды Reuters. Тайбэй келісімді жыл соңына дейін аяқтауды қалайды, бірақ нақты мерзім айтылмайды.
Айта кетерлігі, Тайваньның жартылай өткізгіш экспортына 20%-дық тариф қолданылмайды. Бұған қоса, Дональд Трамп бұрын АҚШ-та өндіріс жүргізетін немесе оны жоспарлап отырған компанияларды қоспағанда, чип импортына 100% тариф енгізу жоспарын жариялаған еді. Мұндай компаниялардың қатарында ең ірі чип өндіруші TSMC бар. Дереккөздер Вашингтон жаңа тарифтерді енгізуді кейінге қалдыруы мүмкін екенін айтады.
Швейцария супербайларға 50% мұрагерлік салығына қарсы шықты
Швейцария ультрабай тұрғындарға арналған 50%-дық мұрагерлік салықты қолдамады — референдумда оған 78,3% сайлаушы қарсы дауыс берді, деп жазады Bloomberg.
Салық 50 млн швейцар франкінен ($62 млн) асатын активтерге қолданылуы тиіс еді. Бұл елдегі шамамен 2500 адамға әсер етеді. Қаржы министрі Карин Келлер-Зуттер мұндай салық жүйенің тепе-теңдігін бұзып, Швейцарияның тартымдылығына нұқсан келтіреді деп түсіндірді. Кейбір ауқатты кәсіпкерлер салық енгізілсе, елден кететінін ескерткен.
Нарықтағы жағдай
— Жапонияның кең индексі Topix 1,2% төмендеді, Nikkei 225 бірден 2% құлдырады.
— Гонконгтың Hang Seng индексі 0,2% өсті, Қытайдың CSI 300 индексі 0,6% көтерілді.
— Оңтүстік Кореяда Kospi 0,6%, Kosdaq 0,8% төмендеді.
— Австралияның S&P/ASX 200 индексі 0,6% жоғалтты.
— S&P 500 фьючерстері 0,7%, Nasdaq Composite 0,9%, Dow Jones фьючерстері 0,5% төмендеді.
