TD Cowen: Инвесторлар бағаламай отырған мүмкіндік — AMD
TD Cowen аналитигі келесі жылы жартылай өткізгіштер секторында ең тиімді таңдау ретінде AMD компаниясын атады. Оның айтуынша, инвесторлар жасанды интеллектке кететін шығындарға байланысты тәуекелдерді асыра бағалап отыр, ал AMD-дің негізі мықты болып қалуда. Сарапшы компанияның жаңа өнімдері нарыққа шықпай тұрып, оның акцияларын қарастыруды ұсынады.
Егжей-тегжейлі
MarketWatch жазғандай, TD Cowen аналитигі Джошуа Букалтердің пікірінше Advanced Micro Devices (AMD) акциялары инвесторлардың секторға қатысты шамадан тыс сақтығы салдарынан «негізсіз қысымға түсті». Ол «негативті көңіл-күй компанияның нақты жағдайына сәйкес келмейді» дейді және бұл сатып алу мүмкіндігіне жол ашады. AMD акциялары қарашада 16% төмендеді — бұл бәсекелесі Nvidia-дан екі есе көп.
Букалтер AMD-ді чип өндірушілер арасындағы келесі жылдағы басты таңдауы деп атады. Оның сөзінше AMD Broadcom мен Nvidia секілді ірі компаниялардан да тартымдырақ.
Ол Уолл-стриттің жасанды интеллектке кететін шығындардың тұрақтылығына қатысты алаңдаушылықтарының бір бөлігі орынды екенін мойындайды. Бірақ технологиялық алыптар ЖИ-инфрақұрылымына белсенді инвестиция жасап жатыр, ал AMD осы сұраныстан пайда көре алады.
Аналитиктің айтуынша OpenAI-мен жасалған мәміле де қысым көрсетті: нарық стартаптың жоспарланған көлемде ЖИ-чип сатып алмай қалуынан қауіптенеді. Алайда Букалтер AMD-дің бір клиентке тәуелділікті азайтып жатқанын айтады — компанияның шешімдерін Oracle мен Meta сияқты ірі ойыншылар енгізуге дайындалып жатыр.
Аналитик көріп отырған өсу драйверлері
TD Cowen сарапшысы AMD-дің жаңартылған аппараттық картасы, ROCm бағдарламалық платформасының дамуы және ірі корпоративтік клиенттердің көбеюі компанияға ЖИ-есептеулер саласында бәсекеге қабілетті болуға және нарықтағы позициясын күшейтуге мүмкіндік береді деп санайды.
Оның пікірінше, басты оқиға — 2026 жылдың екінші жартысында деректер орталықтарына арналған Helios шешімінің және жаңа MI450 ЖИ-жылдамдатқыштарының іске қосылуы. Бұл өнімдер AMD-дің ЖИ-чиптер ғана емес, сонымен қатар процессорлар мен желілік шешімдер сегментінде де үлкен әлеуеті бар нарыққа шығуына мүмкіндік береді. Букалтер атап өткендей, инвесторлар бұл бағыттың әлеуетін толық бағаламай отыр.
AMD бас директоры Лиза Су қарашадағы Сараптама күнінде деректер орталықтары нарығы онжылық соңына қарай $1 трлн-ға дейін өсуі мүмкін екенін айтты — бұл болжамның ішінде ЖИ-жылдамдатқыштар ғана емес, процессорлар мен желілік инфрақұрылым да бар. TD Cowen-ның бағалауы бойынша AMD осы нарықтың 11–17% үлесін иелене алады.
Аналитик инвесторларға Helios кең көлемде нарыққа шықпай тұрып, AMD акцияларына назар аударуға кеңес береді.
Акциялардың жағдайы
3 желтоқсандағы премаркетте AMD акциялары 0,6% өсті. Бұған дейін сейсенбі күнгі саудада олар 2%-дан аса төмендеген еді. Қарашадағы құлдырауға қарамастан, ЖИ-ға байланысты сұраныс пен деректер орталықтары нарығындағы үлесінің артуының арқасында компанияның капитализациясы биыл 80% өсті .
Barchart сарапшыларының айтуынша қарашадағы түзетуден кейін де AMD акциялары әлі де қымбат бағалануда. Компанияның P/E мультипликаторы — 68,5. Бұл инвесторлардың үлкен үміт артып отырғанын көрсетеді. Ұзақмерзімді инвесторлар үшін бұл қалыпты болуы мүмкін, бірақ қысқамерзімді ойыншыларға сақ болуға кеңес беріледі.
MarketWatch деректері бойынша Уолл-стриттің көзқарасы жалпы оң: 46 аналитик AMD акцияларын сатып алуды ұсынады, 11-і ұстап тұруды жөн көреді, ал сату туралы ұсыныстар жоқ. Орташа мақсатты баға — $286, бұл соңғы жабылу деңгейінен 32% өсім әлеуетін білдіреді.
