Tesla қысымға ұшырай ма? Кэти Вудтың қолдауы және Morgan Stanley-дің болжамы
Tesla-ның жақтасы әрі Ark қорын құрған Кэти Вуд Илон Маскқа қолдау білдірді. Ол Масктың АҚШ пен Еуропада төмендеп жатқан Tesla сатылымына тікелей араласуын оң бағалап, «ол бір нәрсеге назарын арнаса, міндетті түрде нәтижеге жетеді» деді. Ал Morgan Stanley сарапшысы қарама қайшы пікірде: оның ойынша, Масктың саяси белсенділігі Tesla котировкаларына қысымның жалғасуына әкеледі.
Егжей-тегжейлі
Кэти Вуд Bloomberg-ке берген сұхбатында Илона Маскты ашық түрде қолдады. Бұған дейін Маск жаңа саяси партия құрғанын жариялап, оның мәлімдемесінен кейін Tesla акциялары айтарлықтай төмендеген болатын. Вуд Масктың назарын қайтадан компания жұмысына аударғанын атап өтті: Bloomberg дереккөздері бойынша, ол АҚШ пен Еуропада төмендеген сұраныспен жеке өзі айналысатын болған.
«Илонның соңғы мәлімдемелерінің бірінде ол АҚШ пен Еуропадағы сатылымды өзі бақылайтынын айтты. Ол бір іске назарын арнаса, нәтижеге жететіні белгілі. Қазір ол бұрынғыға қарағанда әлдеқайда жинақы әрекет етіп жатыр», — деді Вуд.
Сонымен қатар, ол Масктың төңірегіндегі пікірталастар мен келіспеушіліктерді жоққа шығармады. «Tesla акцияларын алғаш рет сатып алған сәттен бері біз Маскқа қатысты түрлі келіспеушілікпен бетпе-бет кездесіп келудеміз. Бірақ біз директорлар кеңесіне және Масктың ішкі түйсігіне сенеміз, әрі саясаттан тыс қалудамыз», — деді инвестор.
Кэти Вуд — Tesla-ның көпжылдық жақтасы. 2014 жылдан бері компания қағаздары оның Ark қорларында ең ірі активтердің бірі болып келеді. Наурызда ол Bloomberg-ке берген сұхбатында Tesla акциялары бес жыл ішінде $2600-ге дейін жетуі мүмкін деп болжаған. Бұл — қазіргі бағасынан тоғыз есе жоғары. Оның айтуынша, бұған негіз болатын басты фактор — робот-такси жобасы, болашақта Tesla құнының 90%-ын дәл осы жоба қамтамасыз етеді. Сондай-ақ Вуд Масктың басқа жеке компанияларына да инвестиция салады: олардың қатарында — SpaceX, Neuralink және xAI бар.
Morgan Stanley не болжады?
Tesla-ға Масктың саяси амбициялары қысым жасай бастады, деп алаңдаушылық білдірді Morgan Stanley сарапшысы Адам Джонас. Оның айтуынша, компания акцияларының төмендеуі жалғасуы мүмкін.
«Жағдай тұрақсыз күйінде қалып отыр. Инвесторлар Маск мырзаның қаржы, уақыт және басқару ресурстарының көбірек саяси бағыттарға жұмсалатынына дайын болуы керек. Бұл қысқа мерзімді перспективада Tesla акцияларына қысым түсіруі мүмкін», — деді Джонас CNBC арнасына.
Соған қарамастан, ол Tesla қағаздарын сатып алуға ұсыныс беріп отыр. Сарапшы орнатқан мақсатты баға — $410, бұл 8 шілдедегі жабылу бағасынан 38% жоғары.
Басқалар не дейді?
Илон Масктың саяси белсенділігін тіпті Tesla-ның жақтасы саналатын Wedbush сарапшысы Дэн Айвз те сынға алды. Ол X әлеуметтік желісінде Tesla директорлар кеңесіне бірнеше ұсыныс жасады, соның ішінде Маск компанияға нақты қанша уақыт бөлуі керектігін белгілеуді ұсынды. Масктың жауабы қысқа болды: Айвздың жазбасына «Үніңді өшір, Дэн» деп пікір қалдырды.
Барлық сарапшылар Tesla-ның мәселелері үшін Масктың саяси амбицияларын кінәламайды, деп жазады Yahoo Finance. Мысалы, Cox компаниясының салалық зерттеулер директоры Стефани Вальдес Стрити сату көлемінің төмендеуін күшейген бәсекелестікпен, Tesla модельдерінің ескіруімен және АҚШ-та брендке деген қызығушылықтың азаюымен түсіндіреді. Оның айтуынша, Model Y-дің жаңартылған нұсқасы да сатылымды ұстап тұра алмады.
«Tesla-ның бюджеттік электромобилі әлі шыққан жоқ, ал қазір тұтынушыларға 70-тен астам электромобиль үлгісі қолжетімді — олардың көбі қазірдің өзінде тартымдырақ әрі бағасы бәсекеге қабілетті», — деді Вальдес Стрити.
Акциялардың жай-күйі
8 шілдедегі сауда кезінде Tesla акциялары бір сәтте 4%-ке жуық өсіп, $304-ке дейін жетті, бірақ күнді 1,3%-тік ғана өсіммен аяқтады.
2025 жылдың басынан бері компанияның нарықтық құны 26%-тен астамға қысқарып, «Керемет жетілік» компаниялары арасында ең нашар нәтижелердің бірін көрсетті. Дегенмен, сарапшылардың 40%-тен астамы инвесторларға бұл қағаздарды сатып алуға кеңес береді. Тағы үштен бірі – бейтарап көзқараста, ал қалғандары сатуды ұсынады. Уолл-стриттегі орташа мақсатты баға – $313, бұл соңғы жабылу бағасынан шамамен 7% жоғары.
