Tesla Model Y бағасын 15%-ға арзандатты. Бірақ бұл инвесторларға неге ұнамады?
Tesla компаниясы ең танымал электромобилі Model Y көлігінің жаңа, арзандатылған нұсқасын $37 990 бағамен таныстырды. Бұл — АҚШ-та федералдық салықтық жеңілдіктердің тоқтатылуын өтеп, сұранысты сақтап қалуға бағытталған қадам, деп жазады Bloomberg. Қазіргі таңда бұл Model Y желісіндегі ең қолжетімді нұсқа саналады.
Компания сайтындағы мәліметке сүйенсек, бұл нұсқаның бастапқы бағасы бұрынғы базалық Model Y-ден 15%-ға төмен. Жаңа үлгінің жүріс қашықтығы — 321 миль (шамамен 516 км), яғни премиум нұсқамен салыстырғанда шамамен 10%-ға қысқа. Сондай-ақ, бұл көлікте артқы қатар жолаушыларына арналған экран орнатылмаған және дыбыс жүйесіндегі динамик саны екі есе азайтылған.
Tesla акциялары жаңа Model Y шыққаны туралы хабардан кейін 4%-ға арзандап, $435,1-ге түсті. Инвесторлар қолжетімді Model Y-ді күткенмен, енді осы арзандатылған нұсқалардың табыстылығын бағалауы керек, деп жазады Barron’s.
Future Fund Active ETF теңқұрушысы Гэри Блэк бұл шешімді былайша сынға алды:
«Маркетинг жағынан ешқандай шығармашылық байқалмайды. Бұл шешімді инженерлер маркетинг мамандарымен ақылдаспай қабылдағанға ұқсайды». Оның пікірінше, Tesla тек қолжетімді Model Y нұсқасын шығарып қана қоймай, мүлде жаңа көлік жасауы керек еді.
Контекст
Tesla-ның арзанырақ моделі туралы үміт былтырдан бері қалыптаса бастады. Себебі кейбір инвесторлар мен компания қызметкерлері Илон Масктың $25 000 тұратын электрокөлік жобасын кейінге шегеру туралы шешіміне алаңдады, деп хабарлайды Bloomberg. Оның орнына Маск автономды жүргізу технологиясы мен адамға ұқсас роботтарды дамытуды басымдыққа айналдырды.
Соңғы тоқсандық есеп беру кезінде Tesla арзандатылған Model Y үлгісінің өндірісі маусымда басталғанын, бірақ $7500 көлеміндегі салықтық жеңілдік аяқталғанға дейін жаппай өндіріске кіріспегенін мәлімдеді. Қаржы директоры Вайбхав Танеджа өндіріс қарқыны бастапқы жоспардан баяу болатынын ескертті. Компания соңғы рет жаңа көлік моделін 2023 жылдың соңында шығарды — ол кезде Cybertruck нарыққа жол тартқан болатын, деп жазады CNBC.
Рекордтық тоқсандық жеткізілімге қарамастан, 2025 жылдың басынан бері Tesla-ның жаһандық сатылымы шамамен 6%-ға төмендеген. АҚШ-тағы электромобильге деген сұраныс салықтық ынталандырулар алынып тасталған соң одан әрі төмендеуі мүмкін.
BloombergNEF сарапшыларының болжамынша, АҚШ-та төртінші тоқсанда электромобиль мен гибрид көліктердің сатылымы 332 мың бірлікті құрайды. Бұл — үшінші тоқсандағы 500 мыңға жуық сатылыммен салыстырғанда айтарлықтай аз.
