Толқын әсері: үшінші тоқсанда технологиялық small-cap компаниялары қалай өсті
Кіші капитализациялы компаниялардың акциялары үшін жаздың соңы бетбұрыс сәтке айналды. Джексон-Хоул симпозиумында Федералдық резерв жүйесінің төрағасы Джером Пауэлл ақша-кредит саясатын қатаңдату циклі аяқталып келе жатқанын меңзеді. Бұл әсіресе қарыз құнына тәуелді small-cap компаниялары үшін күтулерді қайта қарауға себеп болды. Қосымша серпін технологиялық сектордан келді. Жасанды интеллект (ЖИ) үшін деректер орталықтарын салуға арналған жаңа келісімдердің артуы және Nvidia, Oracle мен TSMC өнімдеріне тұрақты сұраныс инвесторларға тіпті кіші технологиялық компаниялардың да ЖИ бумынан пайда таба алатынына сенім ұялатты.
Oninvest аналитигі Алдияр Ануарбеков есептеген AI Small Cap EW тең салмақталған индексі үшінші тоқсан қорытындысы бойынша 37%-ға, ал 2025 жылдың басынан бері 50%-ға өсті. Индекс құрамына жасанды интеллект инфрақұрылымы, сенсорика, робототехника және кванттық есептеу салаларында жұмыс істейтін 46 шағын капитализациялы компания кірді.
Үшінші тоқсанда индекс құрамындағы 46 компанияның 39-ы өсім көрсетті. Ерекше назар аударарлық жайт — ЖИ секторындағы кіші капитализациялы компаниялардың табыстылығы Nvidia акциялары мен iShares Semiconductor ETF (SOXX) биржалық қорының көрсеткіштерінен де жоғары болды: олардың жыл басынан бергі өсімі тиісінше 38,5% және 41% құраған.
Қай small-cap компаниялар көш бастады
Applied Digital
Үшінші тоқсан бойынша абсолютті көшбасшы — Applied Digital. Оның акциялары 135%-ға қымбаттап, жыл басынан бері 194%-ға өсті. Компанияның негізгі бағыты — ЖИ есептеулері үшін деректер орталықтарын салу. Инвесторларды CoreWeave компаниясына арналған жаңа қуаттар құрылысының ілгерілеуі және екі жаңа бұлттық сервис операторымен келісімге дайындық жаңалықтары қуантты (компания олардың аттарын жариялаған жоқ).
Қазанда Needham Applied Digital акцияларының мақсатты бағасын $21-ден $41-ге көтерді. Сарапшылар компания жобаларының айқындығын және ірі бұлттық операторлармен күтілетін келісімдерді негізгі оң факторлар ретінде атады. Craig-Hallum Capital Group бұл сәтті «маховик әсерінің бастауы» деп сипаттады: бизнес енді үздіксіз жаңа жобалар мен келісімшарттар циклін тудыра отырып, 2026 жылға дейін тұрақты өсу мүмкіндігін қалыптастырып отыр. MarketWatch-тың дерегінше компанияны бақылап отырған 12 аналитиктің бәрі де акцияны сатып алуды ұсынады (рейтингі — Buy және Overweight). Консенсус-болжам бойынша мақсатты баға — $42,9, яғни акциялар тағы шамамен 25%-ға өсуі мүмкін.
Absci Corporation
Absci — биопрепараттарды әзірлеуге арналған генеративті ЖИ платформасы. Компания антиденелер мен басқа да ақуыздық дәрілерді жобалау және оңтайландырумен айналысады, ЖИ үлгілерін жоғары өнімді зертханалық тексерумен ұштастырады. Absci акциялары үшінші тоқсанда 13%-ға, ал жыл басынан бері 66%-ға өсті. Бұл өсім, негізінен, ЖИ-биоинженерия саласындағы стратегиялық серіктестіктер арқасында болды.
Қарашаның басында Absci Oracle Cloud-пен әріптестік орнатқанын және AMD-ден стратегиялық инвестиция алғанын хабарлады. Бұл инвестициялар компанияның дәрі-дәрмек әзірлеуге арналған ЖИ платформасын дамытуға бағытталмақ. Инсайдерлік сатып алу туралы жаңалықтармен бірге бұл оқиғалар инвестор сенімін күшейтті. MarketWatch дерегінше, Absci акцияларын тоғыз аналитик қадағалайды және барлығы сатып алуға кеңес береді. Орташа мақсатты баға — $8, яғни қағаздар бағасы екі есеге жуық өсуі ықтимал.
Innodata
Innodata — ЖИ үшін деректер провайдері, яғни басқа компаниялардың үлгілерін оқытуға көмектеседі. Үшінші тоқсан қорытындысында компания акциялары 63%-ға, ал 2025 жылдың басынан бері 101%-ға қымбаттады. Бұл әсерлі қаржылық нәтижелер мен жаңартылған болжамдармен байланысты.
2025 жылдың екінші тоқсанында (31 шілдеде аяқталған) Innodata табысын 79%-ға арттырды және жылдық органикалық өсім мақсатын 45%-ға дейін көтерді. Бизнес көлемінің жылдам ұлғаюы инвесторларды компания қызметіне деген сұраныс тұрақты түрде жоғары екеніне сендірді.
Күзде Innodata акцияларының өсуін Wedbush Securities пікірлері күшейтті. Сарапшылар оны ЖИ индустриясындағы ең тартымды сатып алу нысандарының бірі деп атады. Осы мәлімдемеден кейін акциялар бір апта ішінде (29 қыркүйек — 3 қазан) шамамен 23%-ға өсті. Wedbush сарапшыларының айтуынша, ЖИ саласында инженерлік деректер мен оқу массивтерін дайындау бойынша Innodata негізгі технологияларды жеткізуші ретінде жақсы позицияда. Бұл компанияны ірі ойыншылардың генеративті ЖИ саласына инвестиция құюынан пайда көруші етеді. MarketWatch-тың дерегінше компанияны бес аналитик бақылайды, барлығы да сатып алуға кеңес береді. Консенсус-прогноз бойынша мақсатты баға — $83,7, бұл шамамен 8%-дық өсу әлеуетін көрсетеді.
Relay Therapeutics
Relay Therapeutics жасанды интеллект пен есептеу дизайны әдістерін пайдаланып дәрі-дәрмек әзірлейді. Үшінші тоқсанда акциялары 48%-ға, ал жыл басынан бері 72%-ға өсті.
Қыркүйектің басында Уолл-стрит сарапшылары компанияға оң баға берді: Guggenheim аналитиктері Relay-ді бақылауға алып, бірден сатып алу рейтингін және $15 мақсатты бағаны тағайындады — бұл сол кездегі нарық бағасынан төрт есе жоғары еді. Сарапшылар Relay Therapeutics-ті сүт безі қатерлі ісігіне қарсы перспективалы дәрі әзірлеу жобасы мен жеткілікті қолма-қол капиталы арқасында сектордағы «ең үздік идеялардың бірі» деп атады.
Екінші тоқсанда компанияның табысы $700 мыңға жетті (былтыр нөл болған), ал бір акцияға шаққандағы таза шығын 41%-ға қысқарып, $0,4 болды. Guggenheim сарапшылары операциялық көрсеткіштердің жақсаруы мен негізгі препарат бойынша прогресс компанияның инвестициялық тартымдылығын арттырып отырғанын атап өтті. MarketWatch дерегінше, компанияны 12 аналитик қадағалайды, олардың 10-ы сатып алуға, екеуі ұстауға (Hold) кеңес береді. Консенсус-болжам акция бағасының шамамен екі есе өсуін — $13,6 деңгейіне жетуін болжайды.
Алда не күтеміз
ЖИ инфрақұрылымына деген қызығушылық тұрақты болып отыр: ірі технологиялық компаниялар деректер орталықтары мен бұлттық есептеу қуаттарына инвестицияны ұлғайтып, шағын капитализациялы сегментке «барлық қайықтарды көтеретін толқын әсерін» тудырып отыр.
AI Small Cap EW индексіне кіретін компаниялар бұл экожүйеге әртүрлі деңгейде — арнайы чиптер мен сенсорлар өндіруден бастап, деректерді өңдеу және модельдерді бұлтта орналастыруға дейін қатысады. ЖИ инфрақұрылымына жаһандық шығындар экспоненциалды өседі деп болжанып отыр. Нарық көлемі 2031 жылға қарай $1,68 трлн-ға жетуі мүмкін. Бұл тез кеңейіп жатқан нарықта өз орнын алуға қабілетті тіпті тар шеңбердегі ойыншылар үшін де мүмкіндіктер ашады.
2025 жылдың екінші жартысында шағын компаниялардағы тапсырыс берушілер саны артты: гиперскейлерлер сыртқы есептеу қуаттарына келісімшарттар жасасуда, фармацевтикалық алпауыттар дәрі-дәрмек іздеуге арналған ЖИ-платформаларға қаржы салып жатыр, ал өндірістік кәсіпорындар роботтық шешімдерге инвестициялауда. Мұның бәрі 2026 жылы да индекс өсімінің жалғасуына алғышарттар қалыптастырады, егер қолайлы макроэкономикалық жағдай сақталса: арзан ақша дәстүрлі түрде инновациялық секторларды қолдайды.
Инвестор нені ескеруі керек
Қосымша тәуекел факторы — табыстың бірнеше ірі клиентке тым шоғырлануы. Мысалы, Applied Digital табысы негізінен бірнеше жоғары өнімді есептеу (HPC) қуатын жалға алушыларға тәуелді, ал Absci нәтижелері ірі ІТ-компаниялармен серіктестіктерге байланысты. Бір келісімнің жоғалуы немесе тапсырыс берушілердің ЖИ саласына инвестицияны уақытша тоқтатуы мұндай компаниялардың қаржылық көрсеткіштеріне айтарлықтай әсер етуі мүмкін.
Сонымен қатар Morgan Stanley сарапшылары артық қызып кету қаупіне ескертеді: бүгінгі күні ЖИ инфрақұрылымына капиталдың негізгі бөлігі ірі гиперскейлерлер мен Big Tech компанияларының қолында шоғырланған. Мұндай шоғырлану артық қуаттардың пайда болу және сұраныстың кейін суыту қаупін арттырады.
AI Small Cap EW индексінің әрі қарайғы динамикасы компаниялардың өз технологияларының коммерциялық әлеуетін дәлелдей алуына және ЖИ инфрақұрылымына капитал ағымының сақталуына байланысты болады.
