Трамп АҚШ тарихындағы криптовалютаға қатысты алғашқы заңға қол қойды
АҚШ президенті Дональд Трамп 18 шілдеде доллар бағамына байланған токендер — стейблкоиндердің шығарылуы мен қамтамасыз етілуін реттейтін GENIUS Act заңына қол қойды. Бұл — АҚШ тарихындағы криптовалюталарға қатысты алғашқы федералдық заң, деп хабарлайды Bloomberg.
«GENIUS стейблкоиндардың орасан әлеуетін іске асыру және толық ашу үшін нақты әрі қарапайым реттеуші негіз қалыптастырады», — деп мәлімдеді Трамп жұма күні Ақ үйде. — «Бұл, бәлкім, интернет пайда болғаннан бергі қаржы саласындағы ең ауқымды технологиялық бетбұрыс болмақ». Президенттің айтуынша, жаңа заң АҚШ валютасының әлемдік резервтік валюта ретіндегі мәртебесін нығайтады, себебі ол миллиардтаған адамға долларда ақша сақтап, аударым жасауға мүмкіндік береді.
Қол қою рәсіміне кейбір криптовалюта компанияларының басшылары қатысты. Атап айтқанда, БАҚ Coinbase Global компаниясының бас директоры Брайан Армстронгті, Robinhood Markets-тің жетекшісі Влад Теневті, криптобиржа Gemini-дің негізін қалаған миллиардер Кэмерон мен Тайлер Уинклвоссты, сондай-ақ криптоқауымдастық арасында танымал Rumble видеоплатформасының бас директоры Крис Павловски болды.
GENIUS Act доллармен байланған стейблкоиндердің айналымына қатысты ережелерді белгілейді. Атап айтқанда, заңда бұл токендердің толықтай қолма-қол ақшамен немесе федералды не өңірлік реттеушілер бақылайтын қысқа мерзімді қазыналық облигациялармен қамтамасыз етілуі тиіс деген талап бар. Заң жақтастарының пікірінше, бұл цифрлық активтерді қаржы жүйесінде кеңірек қолдануға жол ашады, деп жазады Bloomberg.
«Осындай [заңнамалық] айқындықты күтіп, шетте тұрған институционалдық қорлар енді бұл нарыққа жаппай ағылады», — деп пікір білдірді The Benchmark Company сарапшысы Марк Палмер Financial Times-қа берген сұхбатында.
Екінші ірі стейблкоин — USDC-ті шығаратын Circle Internet Group компаниясының акциялары жұма күні 4,8% төмендеді. Ал маусым айында GENIUS Act Сенатта қабылданған кезде Circle қағаздары 34% өскен болатын. 18 шілдеде криптобиржа Coinbase Global акциялары 2,2%-ға, ал Robinhood Markets сауда платформасының қағаздары 4,1%-ға нығайды. Криптозаңдардың қабылдануын күткен биткойн бұрынғы рекордтарын жаңарта отырып, 18 шілдеде 1,87% арзандап, $117 700 деңгейіне түсті. Бұл криптовалютаның ең ірі корпоративтік иесі болып саналатын Strategy компаниясының акциялары 6,2% төмендеді.
