Трамп командасы ФРЖ төрағалығына басты үміткерін таңдады — Bloomberg
АҚШ Федералдық резерв жүйесінің (ФРЖ) басқарма мүшесі Кристофер Уоллер қазіргі төраға Джером Пауэлден кейін реттеуші басшысы лауазымына басты фавориттердің бірі ретінде қарастырылып жатыр, деп хабарлады Bloomberg-тің дереккөздері. Уоллер Дональд Трамп командасының қолдауына ие болғанымен, президентпен жеке кездеспеген. Ол мөлшерлемелерді саяси қысыммен емес, экономикалық факторларға сүйене отырып төмендетуді қолдайды және ФРЖ тәуелсіздігін қорғаушы ретінде танымал.
Егжей-тегжейлі
Bloomberg дереккөздерінің хабарлауынша ФРЖ басқарма мүшесі Кристофер Уоллер Ақ үй үшін келесі Федералдық резерв төрағалығына басты үміткер болып отыр.
Агенттік сұхбаттастарының айтуынша, Уоллер Дональд Трамп командасымен бірнеше кездесу өткізіп, олардың оң бағасын алған, бірақ президентпен жеке жүздеспеген. Трамптың кеңесшілерін Уоллердің ақша-кредит саясаты бойынша шешімдерді ағымдағы деректерге емес, болжамдарға сүйене отырып қабылдау ниеті, сондай-ақ ФРЖ жүйесін терең түсінуі таң қалдырған.
Bloomberg-тің деректері бойынша Уоллерден бөлек үміткерлер қатарында Ақ үйдің экономикалық кеңесшісі Кевин Хассет пен бұрынғы ФРЖ басқарма мүшесі Кевин Уорш бар. Олар да, Трамп сияқты, мөлшерлемелерді төмендетуді жақтайды.
Трамп қандай үміткер іздеп отыр?
Уоллер Джером Пауэлдің орнын басуы мүмкін. Трамп қазіргі ФРЖ төрағасын мөлшерлемені төмендетуден бас тартқаны үшін бірнеше рет сынға алған. АҚШ президенті Пауэлді 2026 жылғы 15 мамырда өкілеттігі аяқталғанға дейін қызметінен босатпауға уәде бергенімен, Reuters мәліметінше, оның орнына лайықты кандидат іздеу процесі жеделдеген.
Жаңа үміткердің саяси қысымға берілмей, ақша-кредит саясатын жүргізу қабілеті мұқият бағаланбақ. Экономистердің пікірінше дәл осы тәуелсіздік инфляциямен күрестің және АҚШ экономикасының қаржылық тұрақтылығын сақтаудың негізі болып саналады, деп түсіндіреді Reuters.
«Президент Трамп Американы қайта бай елге айналдыру уәдесін орындау үшін ең білікті әрі тәжірибелі кандидаттарды ұсынуды жалғастырады, — деді Reuters келтірген Ақ үй өкілі Куш Десаи. — Дегенмен, егер ақпарат тікелей президент Трамптан шықпаса, кез келген кадрлық тағайындау жөніндегі әңгімелерді жәй ғана болжам деп санау керек».
Уоллердің ерекшелігі неде?
Трамп федералдық үкіметтің қарыз алу шығындарын азайту үшін мөлшерлемелерді төмендетуді талап етіп келеді. Шілде айында Уоллер мөлшерлемені өзгеріссіз қалдыру туралы шешімге қарсы шығып, оны төмендету үшін дауыс берді. Бұл қадамды ол ФРЖ төраға орынбасары, Трамп тағайындаған Мишель Боуменмен бірге жасады, деп еске салады Reuters.
Алайда Уоллер саясатты жұмсартуды басқа себептермен қолдайды. Ол тарифтердің инфляцияға айтарлықтай қысым жасамайтынын және еңбек нарығындағы баяулау қосымша қолдауды қажет ететінін айтуда. Сонымен бірге, ол мөлшерлеме қаржы министрлігінің мүддесіне немесе мемлекеттік қарызды азайту мақсатына қарай белгіленуі керек деген тәсілді түбегейлі қабылдамайды.
Уоллердің ФРЖ басқарма мүшесі ретіндегі алғашқы жария сөзі Федрезерв тәуелсіздігін қорғауға арналды. Бұл оның саяси мүддеге тәуелді емес екеніне қатысты алаңдаушылықты азайтуы мүмкін, деп жазады Reuters.
Контекст
7 тамыз, бейсенбі күні Трамп ФРЖ басқарушысы қызметіне Экономикалық кеңесшілер кеңесінің төрағасы Стивен Миранды таңдағанын мәлімдеді. Bloomberg-тің дерегінше егер Сенат оны мақұлдаса, Миран қызметінен кеткен Адриана Куглердің бос орнын басады және оның өкілеттігі 31 қаңтарда аяқталғанға дейін ғана қызмет етеді.
