Трамп мәлімдеме жасады. Пауэллді қызметінен босату қаншалықты ықтимал?
АҚШ президенті Дональд Трамп жақын арада Федералдық резерв жүйесінің төрағасы Джером Пауэллді қызметтен босатуы мүмкін, деп хабарлады Bloomberg агенттігіне Ақ үйдегі дереккөз. Оның айтуынша, Трамп бұл туралы 15 шілде, сейсенбі күні кешке Конгресстегі республикашылдармен кездесуде талқылаған. New York Times басылымы Трамптың заң шығарушыларға Пауэллді жұмыстан босату туралы хаттың нұсқасын көрсеткенін хабарлады.
Трамптың өзі сәрсенбі күні журналистерге Пауэллді қызметінен босатуға қатысты ешқандай әрекет жасауды жоспарлап отырмағанын айтты, дегенмен ол бұл мәселені партияластары арасында талқылағанын растады. Оның айтуынша, «олардың барлығы дерлік» ФРЖ төрағасын отставкаға жіберу идеясын қолдаған. Одан Пауэллді жұмыстан босату мүмкіндігін мүлде жоққа шығара ма деп сұрағанда, Трамп «егер тек алаяқтық жасаса ғана, ол кетуі мүмкін» деп жауап берді.
Bloomberg агенттігінің жазуынша, Пауэллдің қызметтен босатылуы қаржы нарықтарында дүрбелең тудырып, сонымен қатар маңызды құқықтық текетіреске алып келуі мүмкін.
Жетекші америкалық индекстер Пауэллдің қызметтен кетуі мүмкін екені туралы агенттік жариялағаннан кейін таңертеңгі өсімін жоғалтып, минусқа кетті. S&P 500 индексі 0,5% төмендеді, технологиялық Nasdaq Composite — 0,6%, ал «көгілдір фишкалар» индексі Dow Jones — 0,6% төмендеді. Кейін олар жоғалтқан көрсеткіштерінің бір бөлігін қайта қалпына келтіріп, Dow Jones тіпті «жасыл аймаққа» шықты. Нарықтағы құбылмалылық индексі VIX, яғни Уолл-стриттің «қорқыныш индексі» 7% күрт өсті.
Трамп бірнеше рет ФРЖ-ның пайыздық мөлшерлемелерді төмендетуден бас тартқанына наразы екенін білдірген. Соңғы күндері Ақ үй өкілдері Пауэллге мұрагер іздеу процесі басталып кеткенін растады. Пауэллдің өкілеттік мерзімі 2026 жылдың мамырында аяқталады. Алайда сейсенбі күні АҚШ қаржы министрі Скотт Бессент Трамптың ФРЖ басшысын қызметтен босату жоспары жоқ екенін мәлімдеді.
Ақ үй өкілдері ФРЖ штаб-пәтерін $2,5 млрд-қа қайта жөндеу жобасын ашық түрде сынға алғаннан кейін, бұл мәселеге қатысты алып-қашпа әңгімелер одан бетер күшейе түсті. MarketWatch басылымының жазуынша, Трамп бұны Пауэллді қызметінен шеттетуге себеп ретінде пайдалануы мүмкін. Нарық ФРЖ төрағасының отставкаға кету ықтималдығын 30% деп бағалап отыр, деп Capital Alpha компаниясының атқарушы директоры Иан Кац сейсенбі күні порталға мәлімдеді. «Шын мәнінде, Трамп Пауэллдің өзі отставкаға кетуін қалайды. Бірақ біз мұның жүзеге асуы екіталай деп есептейміз», — деді ол.
