Trump Media криптовалюталық биржалық қорды іске қосады. Мүдделер қақтығысы бар ма?
Дональд Трампқа тиесілі, Truth Social әлеуметтік желісінің иесі болып саналатын компания биткоин мен эфирге инвестиция салатын қор құру үшін өтініш берді. Осылайша, компания цифрлық активтер саласындағы ілгерілеуін жеделдетіп жатыр, деп жазады Bloomberg. Мұндай шешімге қарсы шыққандар Трампты этикаға қайшы әрекет жасады деп айыптайды, өйткені ол бір уақытта криптоиндустрияға ықпал етіп, одан пайда табуы мүмкін.
Егжей-тегжейлі
Truth Social Bitcoin and Ethereum ETF деп аталатын жаңа қор құруға берілген өтініш дүйсенбі күні АҚШ-тың Құнды қағаздар және биржа жөніндегі комиссиясына (SEC) жолданған құжаттарда жарияланды. Truth Social әлеуметтік желісіне иелік ететін Trump Media & Technology Group инвесторларға Binance, LocalBitcoins және Paxful секілді p2p-платформаларды пайдалануға балама ретінде «ыңғайлы әрі экономикалық жағынан тиімді» құрал ұсынғысы келетінін мәлімдеді, деп хабарлайды Bloomberg.
Trump Media екі апта ішінде криптовалюталық ETF-ке екінші рет өтініш берді, деп хабарлайды Reuters. Егер SEC екі қорды – Truth Social Bitcoin ETF пен Truth Social Bitcoin & Ethereum ETF мақұлдаса, олар ірі басқарушы компаниялар үстемдік ететін қатаң әрі бәсекелі нарыққа шығады, дейді агенттік. Мысалы, BlackRock-тың iShares Bitcoin ETF қорындағы активтер көлемі $72,5 млрд.
Сарапшылар пікірі
«Нарыққа жаңадан кіретін кез келген қатысушыны күрделі сынақ күтіп тұр. Ерекшеленудің жалғыз жолы — төмен комиссия немесе танымал бренд», — деді Reuters агенттігіне Morningstar компаниясының ETF бойынша сарапшысы Брайан Армер. Trump Media-ның биржалық қор құруға берген өтініштерінде комиссия мөлшері көрсетілмеген. Ал ұқсас өнімдерде ол әдетте шамамен 0,12%-ды құрайды, деп жазады Reuters.
«Бұл жаңа жобада [биткоин мен эфирге арналған ETF] түбегейлі жаңа ештеңе жоқ — маркетингті қоспағанда, — дейді CF Benchmarks компаниясының бас директоры Суи Чун. — Truth Social-дың қатысуын ескерсек, бұл [қорлар] бөлшек инвесторларға тікелей жарнамаланып, олардың қызығушылығын тудыруы әбден мүмкін — дәл iPhone жанкүйерлерінің Apple акцияларын сатып алатыны секілді».
Акциялардың жай-күйі
Дүйсенбі күнгі саудада Truth Social иесінің акциялары 4,1%-ға арзандап, $18,7 болды. Жыл басынан бері олардың құны 44% жоғалтқан.
Мамыр айында Trump Media биткоин сатып алу үшін $2,5 млрд тартуды жоспарлап отырғанын жариялаған кезде, компания акциялары 10%-ға құлдыраған еді. Компания бұл қаражатты «биткоин-қазынашылығын» құруға жұмсамақ екенін мәлімдеді.
Этикалық мәселелер
Трамптың криптоактивтілігінің артуы этика саласындағы мамандардың сынына ұшырады, деп жазады Bloomberg. Олар Трамп бір мезгілде саясат қалыптастырып отырған салалардан қаржылық пайда табуы мүмкін екенін айтып, әлеуетті мүдделер қақтығысына назар аударады.
Сайлауалды науқан кезінде Трамп криптовалютаны өзінің бағдарламасындағы негізгі тақырыптардың біріне айналдырды. Ол АҚШ-ты «әлемнің криптоастанасына» айналдырамын, саладағы реттеуді жеңілдетемін және биткоинның стратегиялық қорын құрамын деп уәде берді. Трамп отбасысы да криптожобаларға қатысып жатыр — олардың қатарында криптовалюталар мен мем-койндарға инвестиция салуға арналған World Liberty Financial платформасы және сайлау нәтижелері жарияланар алдында іске қосылған $TRUMP пен $MELANIA мем-койндары бар.
Қазіргі АҚШ президенті өз бренді мен саяси бағытына байланысты құрылған, әрі Ақ үйден ықпал ете алатын стратегияларға негізделген қорлардың табысына қаржылық мүдделі, деп түсіндірді Нью-Йорк университетінің Стерн бизнес мектебінің этика және қаржы профессоры Майкл Познер, деп түсіндірді Bloomberg. «Мұндай транзакциялар мемлекеттік этика стандарттарына қайшы келеді. Президент ретінде сіздің күш-жігеріңіздің 100%-ы елге қызмет етуге бағытталуы тиіс, ал қоғамдық беделіңізді табыс көзіне айналдыруға емес», — деді Майкл Познер.
Ал Ақ үй Трамптың бизнес басқарудан шеттетілгенін мәлімдеді: шамамен $4 млрд тұратын Trump Media акциялары Дональд Трамптың ұлы — Трамп кіші бақылайтын трастқа берілген.
Криптоқорлар тренді
Соңғы уақытта криптовалютаға арналған биржалық қорларға сұраныс айтарлықтай артты. Мысалы, iShares Bitcoin Trust биылғы жылдың басынан бері $12,5 млрд көлемінде таза түсім тартқан, ал 2024 жыл бойындағы жалпы түсім көлемі CoinTelegraph дерегінше $37 млрд құрады.
Эфирге бағытталған өнімдер де жақсы динамика көрсетуде: биыл iShares Ethereum Trust ETF және 2x Ether ETF қорлары $2 млрд-тан астам жинап, АҚШ-тағы барлық крипто-ETF арасында қаражат тарту динамикасы бойынша екінші және үшінші орындарды иеленді, деп хабарлайды Bloomberg.
