Uber робот-таксиді Еуропада іске қосады: стратегиясы сәтті бола ма?
Uber жаһандық такси қызметі Еуропада өз робот-таксиін іске қосу жоспары туралы мәлімдеді: 2026 жылы олар Германияда жолға шығады, алғашқы қала – Мюнхен. Uber қытайлық Momenta әзірлеген робомобильдерді сынақтан өткізеді. Компания өзінің автопилотты көліктерін жасаудан бас тартып, өзге компаниялармен серіктестікті таңдады және робот-такси нарығында Tesla мен Google сияқты компаниялармен бәсекелеседі.
Егжей-тегжейлі
Uber мен Қытайдың Momenta атты автопилотты көліктер стартапы 2026 жылы Германияда робот-такси сынағын бастауды жоспарлап отыр, деп хабарлайды Momenta сайты. Мюнхен екі компания үшін де құрлықтық Еуропадағы алғашқы қала болады. Кейін серіктестер басқа нарықтарға да шығуды көздеп отыр, деп жазады TechCrunch.
Алғашқы кезеңде Momenta технологиясына негізделген көліктерде қозғалысты бақылап, қажет болған жағдайда рөлді өз қолына алуға дайын жүргізушілер отырады. Uber Мюнхенді инженерлік дәстүрлері мен қуатты автокөлік экожүйесі үшін еуропалық база ретінде таңдағанын мәлімдеді. Алайда Momenta неміс реттеушілеріне өз көліктерінің белгілі бір қауіпсіздік стандарттарына сәйкес келетінін дәлелдеп, арнайы геозоналарда қозғалысқа рұқсат алуы тиіс, деп атап өтеді TechCrunch.
«Германия бір ғасырдан астам уақыт бойы әлемдік автокөлік өнеркәсібін қалыптастырды, енді Мюнхен автономды көліктермен оның болашағын айқындауға көмектеседі», — деді Uber бас директоры Дара Хосровшахи, оның сөздерін Momenta келтіреді.
8 қыркүйектегі саудада Uber акциясы шамамен 2% өсті. Жыл басынан бері олар 53%-дан астам қымбаттады.
Бұл компания үшін нені білдіреді?
Uber-дің шешімі компанияны Еуропадағы автопилотты көліктер нарығына шығуға дайындалып жатқан өзге такси сервистерімен тікелей бәсекеге қояды. Мәселен, тамыз айында Lyft қытайлық техгигант әрі ЖИ әзірлеушісі Baidu-мен Еуропада робот-такси іске қосу туралы келісім жасағанын хабарлады. Жоба келесі жылдан бастап Германия мен Ұлыбританияда басталады, деп жазады TechCrunch.
Халықаралық деңгейде Uber Momenta және WeRide, Pony.ai секілді басқа қытайлық стартаптармен бірлесіп, Таяу Шығыста өз платформасында робот-такси қызметін жолға қоюда. Қазіргі уақытта Uber мен WeRide Абу-Даби мен Эр-Риядта автопилотты көліктермен сапарларды ұсынып отыр, ал болашақта Дубайға шығуды жоспарлайды. Сонымен қатар Uber мен Ұлыбританияда орналасқан Wayve жақында Лондонда төртінші деңгейлі автономдылықтағы көліктердің қоғамдық жол сынақтарын бастауға ниетті екенін мәлімдеді.
Momenta Uber-дің автопилотты көлік, жеткізу және жүк тасымалы саласындағы 20 жаһандық серіктесінің қатарына кіреді. Компания дерегінше, бұл альянстар жылдық жиынтық қарқында 1,5 млн сапар мен жеткізуді қамтамасыз етіп отыр.
Мюнхендегі робот-такси жобасы Momenta үшін алғашқы еуропалық бастамаға айналуы мүмкін, деп атап өтеді TechCrunch. Шанхайда компания қазірдің өзінде жолдарда сынақ сапарларын жүргізіп жатыр, ал жыл соңына дейін салонында қауіпсіздік операторлары бар толыққанды коммерциялық сервис іске қосылады. Momenta төртінші деңгейлі автономдылық технологияларын дамытып, сонымен қатар Mercedes-Benz, BMW және Audi секілді неміс автоөндірушілерімен бірге жүргізушіге көмек көрсететін жүйелерді (ADAS) енгізуде. Компания мәліметінше, оның ADAS жүйелері клиенттерге сатылған 400 000 автокөлікке орнатылған.
Сарапшылар пікірі
Өткен аптада Wells Fargo Uber акциялары бойынша мақсатты бағасын $119-дан $127-ға көтеріп, оларды сатып алу жөніндегі ұсынысын Overweight рейтингінде сақтап қалды. Бұл бағалау компания қағаздарының шамамен 40% өсуін болжайды.
FactSet деректеріне сүйенген MarketScreener хабарлауынша, Uber қағаздары бойынша сарапшылардың орташа ұсынысы «нарықтан жоғары» деңгейінде қалып отыр, ал орташа мақсатты баға $108,2 құрайды. Бұл акциялардың шамамен 17% өсуін білдіреді.
Uber инвесторлары робот-такси сервистерінен туындайтын бәсекеден қауіптеніп отыр: оларға төтеп беру үшін Uber-ге едәуір шығындарға баруға тура келеді, деп жазды Barron’s. Автономды көліктерден келетін қауіп соңғы есептілікке салқын көзқарастың бір себебі болды: сервис табыс пен пайда бойынша Уолл-стриттің күткенінен асты, бірақ оның акциялары құлдырады. Алайда кейбір сарапшылар жазда Uber-дің робот-такси нарығындағы стратегиясын оң бағалаған болатын.
Контекст
Uber мен Momenta арасындағы серіктестік алғаш рет 2025 жылдың мамырында жарияланған еді. Ол кезде Uber Momenta технологиясына негізделген көліктер 2026 жылы Еуропадағы оның сервисінде пайда болатынын хабарлады.
2016 жылы құрылған Momenta Қытайдың автономды көлік саласындағы алғашқы компаниялардың бірі саналады. Бейжіңдік стартап 2018 жылдан бастап автопилотты көліктерді сынақтан өткізіп келеді және елдегі бәсекелі автопилотты технологиялар нарығында елеулі орынға ие.
