Uber-дің мықты есебі акциялардың өсуіне жеткіліксіз болды. Инвесторлар неге алаңдаулы
Такси және тамақ жеткізу сервисі Uber екінші тоқсанда Уолл-стриттің табыс пен кіріс бойынша болжамдарынан асып түсті. Алайда бұл инвесторларды шабыттандыру үшін жеткіліксіз болды. Есеп жарияланғаннан кейін Uber акциялары 3,5%-ға арзандады. Barron’s-тың жазуынша инвесторлар роботакси қызметтерінен туындайтын бәсекеден қауіптеніп отыр. Uber оларға қарсы тұру үшін қомақты қаржы жұмсауға мәжбүр.
Егжей-тегжейлі
Uber-дің екінші тоқсандағы табысы өткен жылдың сәйкес кезеңімен салыстырғанда 18%-ға өсіп, $12,65 млрд-қа жетті. Бұл — сарапшылардың $12,46 млрд деген болжамынан жоғары, деп хабарлайды CNBC. Түзетілген EBITDA (пайыз, салық, тозу мен амортизацияны есептемегендегі пайда) рекордтық $2,12 млрд болды — бұл да консенсус-болжамнан ($2,09 млрд) жоғары, деп жазады Bloomberg. Таза пайда 33%-ға өсіп, $1,36 млрд-ты немесе акцияға шаққанда $0,63-ті құрады — бұл да Уолл-стриттің күткен деңгейінде.
Компания мұндай күшті нәтижелердің бір себебі ретінде негізгі бағыттар — такси және жеткізу арасындағы синергияны атады. Bloomberg-тің жазуынша, Uber бас директоры Дара Хосровшахидің айтуынша жеткізу сегментіндегі жылдық тапсырыстардың 12%-ы (шамамен $10 млрд) Uber-дің негізгі такси шақыру қосымшасындағы Eats қосымшасы арқылы орындалған.
«Қазіргі уақытта тұтынушылар тарапынан әлсіздік байқалмайды, — деді Хосровшахи CNBC эфирінде. — Жағдай тұрақты, бұл — Uber үшін керемет жаңалық».
Алайда, есептің мықты болуына қарамастан, сәрсенбі күні инвесторлар акцияларды сата бастады. Бағалы қағаздар 3,5%-дан аса арзандап, $86,3-ке түсті. Дегенмен, кейінірек акциялар біршама өсе бастады және бұл материал жарияланған сәтте олардың құны тек 0,7%-ға төмендеген болатын.
Нарық неден қауіптенуде?
Barron’s басылымының пікірінше жақсы есепті Uber-дің роботакси бәсекесіне қарсы бағыттаған инвестициялары көлеңкеде қалдырды. Нарық әлі де Tesla секілді компаниялар дамытып жатқан автономды такси сегментінің Uber үшін қауіп пе, әлде мүмкіндік пе екенін бағалауда.
Өткен айда Uber электромобиль өндіруші Lucid компаниясына $300 млн инвестиция салатынын мәлімдеді. Бұл серіктестік келесі жылы роботакси қызметін іске қосуға және алты жыл ішінде 20 000 автономды көлік паркын құруға бағытталған.
Инвесторлар Uber-дің бизнес-моделі өзгеруі мүмкін деп қауіптенуде. Агрегатордан ол көлік паркінің тікелей иесіне айналуы мүмкін. Barron’s атап өткендей, дәл осы серіктестіктерге жоспарланған инвестициялар сәрсенбі күнгі акциялардың арзандауына себеп болуы ықтимал.
«Біздің ақшалай ағынымыз бен капиталды бөлу құрылымымызды ескерсек, біз автономды көлік саласына агрессивті инвестиция салып, сонымен қатар акционерлерге айтарлықтай қаражат қайтара аламыз», — деді Хосровшахи аналитиктермен өткен конференц-қоңырау барысында. Ол Uber-дің жаңа $20 млрд-тық акцияларды кері сатып алу бағдарламасын атап өтті.
Uber роботакси бәсекесінен қорқуы керек пе?
Barron’s атап өткендей, әзірге роботакси қызметтері Uber-дің нарықтағы үлесін тартып алғаны байқалмайды. Тоқсан ішінде Uber-де орындалған сапарлар саны 18%-ға артып, 3,3 млрд-қа жетті. Платформаның белсенді пайдаланушыларының саны 15%-ға өсті, ал gross-бронировкалар (шайпұлсыз есептегендегі жүргізушілер мен сатушылардың табысы мен тұтынушылар төлеген қаражатты) 17%-ға өсіп, $46,8 млрд-ты құрады. Bloomberg-тің мәліметінше компанияның келесі тоқсанға жасаған болжамы gross-брондаудың өсу қарқыны 18–21% деңгейінде болады деп күтілуде.
«Тұтынушылар сұранысы жоғары деңгейде қалуда, себебі Uber клиенттермен сақтандыру шығындарының төмендеуінен пайда бөлісуде. Соның нәтижесінде сапарлар санының өсуі жеделдей түсті, — дейді Barron’s келтірген William Blair аналитигі Ральф Шаккарт. — Келесі тоқсанда АҚШ-тағы сапарлар саны одан әрі өсетіні туралы болжамдар — Uber-дің бизнесін ауқымдауға қабілетті екенін көрсетеді».
Шаккарт Uber акцияларына «нарықтан жоғары» (Outperform) рейтингін растады, бірақ мақсатты бағаны нақтыламады.
Ал Stifel талдаушысы Марк Келли Uber акцияларының мақсатты бағасын $117-ден $116-ға дейін төмендетіп, бірақ оларды сатып алуға ұсынысын сақтап қалды.
MarketWatch-тың дерегінше такси қызметін бақылап отырған 57 талдаушының 45-і акцияларды сатып алуға (Buy және Overweight рейтингтері), ал қалған 12-сі оларды портфельде ұстауға (Hold) кеңес береді. Уолл-стриттің орташа консенсус-болжамы бойынша Uber акцияларының мақсатты бағасы $101,2 — бұл 5 тамыз, сейсенбі күнгі жабылу бағасынан 13%-ға жоғары.
