Уолл-стриттегі казинo: неліктен Nebius нарықтың қызған шағында дараланып тұр?
Канададағы Lamoureux & Co зерттеу компаниясының президенті Ив Ламуру жасанды интеллект саласындағы ең перспективті инвестициялардың бірі ретінде Nebius Group бұлттық провайдерін атады. Компанияны «Яндекстің» негізін қалаушысы әрі Қазақстанның тумасы Аркадий Волож басқарады. Сонымен қатар, Ламуру нарықтың казиноға ұқсап бара жатқанын айтып, ағымдағы кезеңде инвесторлардан барынша сақ болуды талап етеді, деп жазады MarketWatch.
Егжей-тегжейлі
Нарықтағы негізгі тәуекелдердің бірі АҚШ компанияларының шамадан тыс қарыз жүктемесі, әсіресе пайыздық мөлшерлеменің өсуіне осал бизнес үшін. Осындай жағдайда стратег Ив Ламуру дивиденд төлемейтін, бірақ пайданы дамытуға қайта инвестициялайтын, тұрақты ақша ағыны бар технологиялық компанияларды жөн көреді.
Ол мысал ретінде үлкен деректерді сақтау және талдауға арналған ClickHouse платформасына инвестиция салған, Нидерландта тіркелген Nebius Group компаниясын атады. Ламурудың айтуынша, Nebius — бұл жасанды интеллектке арналған «таза ставка», яғни тіпті жоғары нарықтық тұрақсыздық жағдайында да төтеп бере алатын жоба. «Мен бұл компанияға, тіпті нарық тұрақсыз болса да, инвестиция салар едім», — деді стратег.
30 шілде күні Nasdaq биржасында Nebius акцияларының котировкасы сауда кезінде шамамен 4% қымбаттап, $52,5 болды, алайда кейін жинаған өсімнің басым бөлігін жоғалтты. Жыл басынан бері компания котировкасы 80%-дан астамға шарықтады.
Сарапшылар пікірі
MarketWatch басылымының хабарлауынша, Ламуру АҚШ нарығына қатысты бұрынғы оптимизмін әлдеқайда сақтық позициясына ауыстырды. Оның пікірінше, 2025 жылғы қор индекстерінің қарқынды өсуі алаңдатарлық сигнал: «Мұндай жедел ралли — өте сирек құбылыс. Бұл — инвестордың емес, нарықтағы ойыншылардың әрекеті».
Ламуру ағымдағы жағдайды 2021 жылмен салыстырады — ол кезде мем-акциялар мен қысқа мерзімді опциондар айналасында алыпсатарлық бум болған. Ол нарықтың барған сайын казиноға ұқсай бастағанын, мұнда есеп емес, құмарлық үстемдік етіп тұрғанын айтады. Осы көктемде сарапшы Dow Jones индексі 2027 жылға қарай 50 000 пунктке жетеді деп болжаған еді, деп еске салады MarketWatch. Алайда екі айда 46 000-ға дейін күрт көтерілуін тым өткір әрі орнықсыз секіріс деп сипаттады.
Ламурудың бағалауынша, нарық «төбесін» қалыптастыру кезеңіне енді. Алдағы екі-үш жылда Dow шамамен 45 000 пункттің маңында құбылуы мүмкін. Инвесторларға ол мынадай кеңес береді: сақ болу, акциялар үлесін азайту, бірақ бар қаржыны толығымен кэшке аудармау. «Нарық құлдырағанда аз-аздан сатып алыңыз, ал өскенде бір тұтастай сатыңыз», — деп түйіндеді стратег.
Уолл-стритте Nebius қалай бағаланып жатыр?
Шілденің ортасында Goldman Sachs Nebius акцияларын сатып алуды ұсынды, себебі генеративті ЖИ-ға сұраныстың артуына байланысты компанияның капитализациясы 50%-дан астамға өсуі мүмкін деп болжайды. Goldman сарапшысы Алекс Дювальдің айтуынша, Nebius жасанды интеллектке деген қызығушылықтың өсуінен ұтып жатыр, өйткені ол сұранысқа ие GPU-инфрақұрылымды (яғни бейнежады карталары бар бұлтты серверлерді) төмен шығынмен және жеке платформамен ұсынады. Дювальдің пікірінше, ЖИ өңдеуге арналған Nebius серверлерін жалға алу — жабдықты сатып алуға қарағанда тиімдірек.
MarketWatch деректеріне сәйкес, Nebius акцияларына рейтинг берген бес сарапшының барлығы оларды сатып алуға кеңес береді (төртеуі — Buy, біреуі — Overweight). Уолл-стриттің консенсус таргеті $66,8 деңгейінде, бұл акция бағасының шамамен үштен біріне өсу әлеуеті бар екенін білдіреді.
Компанияның ахуалы
Nebius белсенді дамып келеді, дейді Benzinga. Соңғы тоқсанда компанияның табысы жылдық мәнде 385% артып, $55,3 млн болды. Компания Nvidia-ның негізгі серіктестерінің қатарына кіреді, сондықтан оның ең жаңа ЖИ чиптеріне басқаларға қарағанда ертерек қол жеткізіп, оларды өз клиенттеріне ұсынады, деп жазады басылым.
