Уолл-стриттің екі сарапшысы McDonald’s акцияларын сатып алудан бас тартты. Не себеп?
Morgan Stanley сарапшыларының пікірінше, McDonald’s фастфуд нарығында қалыптасқан құрылымдық қиындықтардан аман қалуы екіталай. Компания бұл қиындықтардың салдарын жақын арада өз мойнымен сезінуі мүмкін. Осы себепті Morgan Stanley енді инвесторларға McDonald’s акцияларын сатып алуға кеңес бермейді және олардың болжамды бағасын 1,5%-ға төмендетті. Бұл — өткен апта соңынан бері компанияның рейтингін төмендеткен екінші ірі инвестициялық банк. Алғашқы түзетуге McDonald’s ұсынған тауық стрипстерінің сыртқы түрі себеп болған.
Толығырақ
Morgan Stanley-дің сарапшысы Брайан Харбор 9 маусымда McDonald’s акцияларына берген «нарықтан жоғары» (яғни «сатып алу») деген бағасын «нарық деңгейінде» деп өзгертті және мақсатты бағасын 329 доллардан 324 долларға дейін төмендетті. Бұл жаңа бағалау да акциялардың қазіргі бағасынан шамамен 5% өсуі мүмкін екенін көрсетеді. Дегенмен, дүйсенбі күнгі саудада McDonald’s акциялары 1%-ға түсіп, 304,1 доллар болды.
Morgan Stanley неге сақтық танытып отыр?
Харбор McDonald’s компаниясының емес, тұтастай фастфуд индустриясының мәселелерін атап өтті. «McDonald’s — өте сапалы бизнес, бірақ ол да фастфуд нарығындағы құрылымдық қиындықтардан қорғалмаған және қорғалмайды да», — дейді сарапшы CNBC-ге берген жазбаша пікірінде.
Ол аталған қиындықтардың қатарында экономикалық саясаттағы белгісіздік пен табысы төмен тұтынушыларға қысымды, сонымен қатар дұрыс тамақтану мен салауатты өмір салтына деген қызығушылықтың артуын атап өтті. Barron’s басылымы да бұл салаға кері әсер ететін фактор ретінде салмақ түсіруге арналған GLP-1 дәрілерінің танымалдығы артып келе жатқанын ескертеді.
McDonald’s акциялары осы күнге дейін бәсекелестерінен озық нәтиже көрсетіп келгенімен, олардың өсу қарқыны баяулауы мүмкін. «Жыл басынан бері бұл акциялар 6%-ға өсті. Инвесторлар оларды қауіпсіз актив деп санады. Дегенмен, фастфуд нарығында бір жылдан бері жалғасып келе жатқан іргелі проблемаларға қарамастан, акциялар тарихи максимумнан небәрі 5%-ға төмен еді. Қазіргі сәтте біз тәуекел мен табыс мүмкіндігі арасында тепе-теңдік пайда болды деп есептейміз. Бір жағынан McDonald’s фастфуд сегментінде көш бастап тұр, екінші жағынан тұтынушылардың мінез-құлқындағы өзгерістер оған кедергі келтіре бастады», — деп жазады Харбор.
Ол қазіргі бағаның тарихи тұрғыдан әділетті екенін атап өтеді. Алайда егер жоспарлар орындалмаса, банк бағалауды тағы төмендетуі мүмкін екенін ескертеді.
Басқа сарапшылар не дейді?
Morgan Stanley сарапшысы Харбор соңғы күндері McDonald’s акцияларының рейтингін төмендеткен екінші Уолл-стрит сарапшысы болды. Бұған дейін, 6 маусымда, Loop Capital сарапшысы Элтон Стамп акцияға берген бағасын «сатып алу» деңгейінен «ұстау» деңгейіне түсіріп, мақсатты бағаны 346 доллардан 315 долларға дейін төмендетті. Бұл жаңа межеге сәйкес, McDonald’s акцияларының өсім әлеуеті 2,6%-ды құрайды. Стамп Barron’s басылымына берген пікірінде инвесторлардың көңілін тауық етінен дайындалған McCrispy стрипстерінің түрі түсіргенін айтты. Оның сөзінше, дәмі жақсы болғанымен, бұл тағамның панировкасы аз, әрі көлемі бұрынғы наггетс пен тендерге қарағанда кішірек. Бұл бірқатар тұтынушыларды қанағаттандырмады және өнімнің тиімділігіне күмән туғызды.
Алайда CNBC мәліметінше, Уолл-стрит сарапшыларының жалпы көзқарасы McDonald’s-қа қатысты әлі де оң. LSEG деректеріне сәйкес, компания акцияларын бақылап отырған 38 сарапшының 22-сі оларды сатып алуға кеңес береді (Buy және Overweight), қалғандары — ұстауға кеңес беріп отыр.
McDonald’s қандай әрекет етуде?
McDonald’s 10 шілдеден бастап АҚШ-та Snack Wrap өнімін қайта ұсынбақ. Бұл — бидай нанына оралған тауық еті, салат, үгілген ірімшік және соустан тұратын ролл. Танымал болғанына қарамастан, бұл өнім мәзірден 2016 жылы алынып тасталған, себебі оны дайындау қиын болған. McDonald’s оны мәзірге қайта қосу арқылы аз табысты тұтынушылар тарапынан азайған сұраныс пен былтырғы ішек инфекциясы оқиғасынан кейінгі клиент ағынының төмендеуін өтеуді көздеп отыр.
2025 жылдың алғашқы тоқсанында McDonald’s-тың АҚШ-тағы ұқсас сауда көлемі 3,6%-ға азайды. Бұл көрсеткіш қатарынан екі тоқсанда төмендеп отыр (2024 жылдың төртінші тоқсанында 1,4%-ға қысқарған).
