Венесуэладағы жер сілкінісінен қаза тапқандар саны 10 000-нан асуы мүмкін — болжам
Фото: mytaj1 / Shutterstock.com
АҚШ Геологиялық қызметінің (USGS) болжамдық модельдеуіне сүйенсек, Венесуэлада болған екі күшті жер сілкінісінен қаза тапқандар саны мыңдағанға жетуі мүмкін және 10 000-нан асу ықтималдығы жоғары. Бұл туралы Reuters хабарлады.
Не болды?
25 маусым, бейсенбі күні Рихтер шкаласы бойынша 7,2 және 7,5 магнитудалы екі күшті жер сілкінісі Венесуэлада бір минуттан да аз уақыт айырмашылығымен болды. Нәтижесінде астана Каракас пен оның маңындағы аймақтарда ондаған ғимарат қирап, жүздеген адам қирандылар астында қалып қойды.
Соңғы деректер бойынша 164 адамның қаза болғаны расталды. Тағы шамамен мың адам жарақат алды. Оппозиция өкілдері жоғалған адамдарды табуға көмектесу үшін құрған және әлеуметтік желілерде таратылған веб-сайт бейсенбі күні таңертеңге қарай қайда екені белгісіз адамдар туралы 10 000-нан астам хабарлама қабылдады.
Каракас қаласының солтүстігінде орналасқан Ла-Гуаира штаты ең қатты зардап шекті. Мұнда Венесуэланың негізгі Кариб теңізі порты мен Симон Боливар атындағы халықаралық әуежай орналасқан. Уақытша президент Делси Родригес бұл аймақты «апат аймағы» деп жариялады. WSJ мәліметі бойынша, Ла-Гвайрада төтенше жағдай жарияланды және АҚШ, Мексика, Доминикан Республикасы, Сальвадор мен Катар қатысатын ауқымды құтқару операциясы жүріп жатыр.
Bloomberg хабарлауынша, зардап шеккен аймақтарда қайталанатын жер сілкіністері салдарынан электр, су және газ жабдықтарында үзілістер орын алуда.
Бұл экономикаға қалай әсер етеді?
Алдын ала мәліметтерге сәйкес, Reuters хабарлауынша, Венесуэланың энергетикалық инфрақұрылымына зиян тигізілген жоқ. Елдегі даму үстіндегі газ кен орындарын бағалауға қатысатын британдық мұнай-газ компаниясы Shell өзінің барлық қызметкерлерінің аман-есен екенін мәлімдеді.
Мұнайдың ірі орталығына жақын орналасқан Маракайбо қаласының билігі қаза тапқандар мен жарақат алғандар болмағанын хабарлады. Эпицентрге жақын орналасқан Эль-Паито мұнай өңдеу зауытының бір қызметкері де нысанға ешқандай зақым келмегенін айтты.
Алайда Reuters агенттігінің дереккөзі Венесуэладағы ұзақ мерзімді электр қуатының сөніп қалуы мұнай өндіру деңгейіне әсер етуі мүмкін екенін ескертті. Мемлекеттік мұнай компаниясы PDVSA пікір сұрауларына жауап бермеді.
Bloomberg мәліметіне сәйкес, Венесуэладағы ең ірі тәуелсіз мұнай өндіруші Chevron қалыпты режимде жұмысын жалғастырып жатқанын және барлық қызметкерлердің байланыста екенін мәлімдеді.
