«Жасырын інжу»: McGraw Hill акцияларын сарапшылар жаппай сатып алуға кеңес беруде
18 тамызда кемінде жеті Уолл-стрит талдаушысы алғаш рет McGraw Hill акцияларына рейтинг беріп, бірден «сатып алуға» ұсынды, деп хабарлайды Yahoo Finance.
Егжей-тегжейлі
— Нью-Йорк биржасындағы капитализациясы $2,8 млрд құрайтын McGraw Hill — жасанды интеллектке сұраныстың артуынан пайда табуға дайын «жасырын інжу», деп жазды Deutsche Bank CNBC келтірген жазбасында. Компания ЖИ негізінде білім беру шешімдерін ұсынады. Олар оқыту процесін мектеп оқушыларынан бастап медицина қызметкерлеріне дейін жеке даралауға мүмкіндік береді.
— «McGraw Hill ЖИ-дың артықшылықтарын барынша қолдана алады, өйткені оның контенті, деректерге негізделген аналитикасы және ғылыми зерттеулері оқу тәжірибесін даралап, оң нәтижелерге жеткізеді», — дейді Deutsche Bank сарапшысы Фаиза Элви. Ол жаңа келісімшарттар есебінен компания кірісі өсетінін болжап отыр. McGraw Hill әдетте бес-сегіз жылдық шарттар жасайды, аванстық төлемдер есебінен кірістерді тұрақты болжай алады. 2026 қаржы жылының бірінші тоқсанында (30 маусымда аяқталған) компания кірісі 2,4%-ға өсіп, $535,7 млн-ға жетті.
— Deutsche Bank McGraw Hill қағаздарына «сатып алу» рейтингін беріп, мақсатты бағаны $18 деп белгіледі. Бұл соңғы жабылу бағасынан 24% өсім әлеуетін білдіреді.
— Goldman Sachs компанияның цифрлық трансформациясын ерекше атап өтті, деп жазады Investing.com. «Бұл өзгеріс ЖИ-негізделген курстық контент экожүйесін қалыптастыру барысында клиенттердің адалдығын және кірістердің ашықтығын күшейтеді», — делінген банктің жазбасында. Таргет — $27, бұл ағымдағы бағадан 86% жоғары.
— JPMorgan McGraw Hill-ді «білім беру саласында өз класындағы көшбасшы» деп атады. Рейтингі — Overweight, мақсатты баға — $21 (апсайд 44,8%).
— Baird те мақсатты бағаны $21 деп қойып, «сатып алуды» ұсынды (рейтинг Outperform). Олар компания бағасының тартымдылығына және оның нарығының тұрақтылығына назар аударды.
— Stifel McGraw Hill-ді «рецессияға төзімді» деп атап, IPO-дан кейін маржа өсімін және қарыздық жүктеменің төмендеуін күтеді. Рейтингі — «сатып алу», мақсатты баға — $19 (апсайд 31%).
— UBS қана бейтарап ұстаным танытып, акцияларды «ұстауға» кеңес берді. Оның таргеті — $15, бұл ағымдағы бағадан бар-жоғы 3% жоғары. Банк сарапшылары демографиялық және саяси кедергілерге, сондай-ақ ЖИ технологиялары төңірегіндегі белгісіздіктерге назар аударды.
MarketWatch-тың мәліметінше McGraw Hill бойынша Уолл-стрит сарапшыларының 11-і «сатып алуды», тек бірі «ұстауды» ұсынады. Орташа мақсатты баға — $21, бұл соңғы жабылу бағасынан шамамен 45% жоғары.
Акциялардың жағдайы
Дүйсенбіде McGraw Hill акциялары 9%-ға өсіп, $14,5-қа жетті. Бұл — компания 24 маусымда IPO кезінде орналастырған $17 бағасынан әлі 15% төмен. Ол кезде McGraw Hill 24,4 млн акция шығарып, $3,25 млрд бағаланған еді. 19 тамыз таңғы саудада қағаздар тағы 1,7%-ға қымбаттады.
