«Жедел әрекет етудеміз»: Pepsi жақсы тоқсандық нәтиже көрсетті. Дағдарыс артта қалды
Lay’s, Doritos және Mountain Dew сияқты брендтерге иелік ететін PepsiCo компаниясы тоқсандық есеп жариялап, сарапшылар оны «үміт ұялатарлық» деп бағалады. Бұл – бизнес қалпына келіп жатқан кезеңдегі оң нәтиже. Солтүстік Америкадағы сатылым көлемі азайғанымен, осы өңірдегі сусындар бағыты соңғы екі жылдағы ең жоғары табыс өсімін көрсетті. Компания бас директоры PepsiCo «жедел әрекет ету режимінде» жұмыс істеп жатқанын және пайдалы тамақтану трендіне сай жаңа өнімдер сұранысты сақтауға көмектесетініне сенетінін айтты.
Егжей-тегжейі
6 қыркүйекте аяқталған қаржы жылының үшінші тоқсанында PepsiCo нәтижелері Уолл-стрит күткеннен сәл жоғары болды. FactSet дерегін келтірген Barron’s ақпаратына сәйкес, акцияға шаққандағы түзетілген пайда $2,29 болды. Бұл сарапшылар болжамынан үш центке көп. Түсім $23,9 млрд-қа жетіп, болжамнан $100 млн-ға жоғары шықты. Компания мұндай нәтижеге негізгі халықаралық нарықтардағы тұрақты сұраныс пен АҚШ-тағы пайдалы сусындарға қызығушылықтың артуының арқасында қол жеткізді.
Солтүстік Америкадағы жағдай аралас болды. MarketWatch дерегінше, сатылым көлемі бұл аймақта қатарынан 12-тоқсан бойы төмендеп келеді. Сусындар бағыты 3%-ға, ал снэктер 4%-ға азайды. Азық-түлік сегментінің табысы 3%-ға қысқарса, сусындар сатылымы керісінше 2%-ға артты. Бұл соңғы екі жылдағы ең жоғары өсім, деп жазады Bloomberg. Компания мұны Pepsi Zero Sugar және дәстүрлі газдалған сусындарға балама ретінде ұсынылған Poppi өнімдерінің жақсы сатылуымен түсіндірді.
Алда не күтіп тұр?
PepsiCo 2025 жылға арналған болжамын растады: компания органикалық табыс өсімін төмен бір таңбалы деңгейде сақтап, түзетілген пайданы өткен жылмен шамалас деңгейде ұстамақ.
Бас директор Рамон Лагуэрта Yahoo Finance агенттігіне берген сұхбатында компания бизнес құрылымын кең ауқымда қайта қарап жатқанын айтты. Оның сөзінше, PepsiCo АҚШ-тағы снэк өндірісіндегі шығындарды «белсенді түрде азайтпақ». Сәйкесінше төртінші тоқсанда екі зауыт жабылып, өнім атауларының шамамен 15%-ы қысқартылады. Компания сонымен қатар өнім құрамын жаңартуда: Cheetos және Doritos өнімдерінен жасанды дәмдеуіштерді алып тастап, Lay’s өнімдерінен зәйтүн мен авокадо майын қолдануды арттыруды жоспарлап отыр. Сондай-ақ Simply, Sabra, Sun Chips және биыл сатып алынған Siete Foods сияқты пайдалы брендтерге басымдық берілмек. Сонымен қатар жаңа буып-түю түрлері мен ақуыз және талшық мөлшері жоғары өнімдер, оның ішінде Doritos протеинді чипстері мен Quaker, Sun Chips, PopCorners және Smartfood желілерінің жаңартылған нұсқалары дайындалып жатыр.
«Инновация — біз үшін басты басымдық. Біз тез әрекет етіп, жаңа өнімдер мен платформалар арқылы ерекше қарқынмен өсіп келе жатқан нарық сегменттерін қамтуды көздеп отырмыз», — деді Лагуэрта инвесторлармен сөйлесу барысында (Yahoo Finance келтіруі бойынша).
Нарық реакциясы
9 қазандағы саудада PepsiCo акциялары 2,5%-ға қымбаттап, $142,3 деңгейіне жетті. Дегенмен, жыл басынан бері компанияның нарықтық құны шамамен 7%-ға азайды. Салыстыру үшін, АҚШ-тың негізгі S&P 500 индексі осы кезеңде 14,5%-ға өсті, ал басты бәсекелес Coca-Cola акциялары 7%-ға артты.
Контекст
PepsiCo акцияларына «денсаулыққа пайдалы өнім» трендтері қысым көрсетіп отыр. Компания тұтынушылар әдетінің өзгеруіне бейімделу үшін кішірек қаптамалар, пайдалы өнім желілері және жаңартылған маркетинг стратегияларына назар аударуда.
Өткен айда белсенді инвестор Elliott Investment Management қоры компаниядағы $4 млрд үлесін жариялағаннан кейін қысым күшейді. Қор құрылымдық өзгерістерді талап етіп отыр: өндіріс пен логистика шығындарын қысқарту, табысы төмен сусын құю операцияларын аутсорсингке беру және негізгі емес бағыттардан (мысалы, макарон, үлпек, шәрбат өнімдері) бас тарту. Негізгі күш Pepsi, Mountain Dew және Gatorade брендтеріне шоғырлануы тиіс деп санайды. Elliott бағалауынша, мұндай шаралар компанияның табыстылығын арттырып, нарықтық құнын 50%-дан аса өсіруі мүмкін.
Кейбір сарапшылар Elliott араласуынан кейін PepsiCo-ның белсендірек қимылдай бастағанын оң бағалап отыр. Carnegie Investment Counsel зерттеу директоры әрі PepsiCo акцияларына иелік ететін Грег Холтер Reuters-ке берген пікірінде: «Бұл тоқсандық нәтижелер қалыпты, бірақ үміт сыйлайды. Elliott Management компания басшылығын нақты әрекет етуге итермеледі . Олар қазір шығындарды азайту мен бизнес тиімділігін арттыруға назар аударып отыр», — деді.
