ЖИ Googlе жарнама кірісін арттырды, бірақ бұлттық қызмет көрсетудегі өсім бәсеңдеді
Alphabet, Google компаниясының холдингі, бірінші тоқсандағы қаржы нәтижелерін жариялады. Табысы мен пайдасы сарапшылардың орташа күтулерінен жоғары шықты. Оған іздеу қызметіндегі жарнама кірісінің тұрақты өсуі әсер етті: ол жасанды интеллектінің енгізілуімен 10 % өсіп, $50,7 млрд-қа жетті. Алайда YouTube пен бұлттық бөлімшесі Google Cloud құрастырған табыстың өсуі сәл бәсеңдеді.
Жалпы кіріс жыл сайын 12 % өскен – $90,23 млрд болды (болжам – $89,12 млрд). Акцияға шаққандағы түзетілген таза пайда $2,81-ді құрады, ал Уолл-стрит сарапшылары орташа есеппен $2,01 күтті.
Google Cloud қызметінің табысы 28 % өсіп, $12,26 млрд деңгейінде болды (күтілгені – $12,27 млрд). Оның операциялық кірісі $2,18 млрд-ты құрады, бұл да болжамнан ($1,94 млрд) жоғары. Бұл нәтижелер Google-дың бұлттық бизнесінен де жақсы маржа алуға қабілетті екенін көрсетті. Есепті жариялаған соң Alphabet акциялары 5 % көтерілді.
Инвесторлар қалай қабылдады
24 сәуірде есептік мәліметтер шыққан соң кеңейтілген саудада Alphabet (A классы) акциялары шамамен 5 % қымбаттады. Баға $169 дейін көтерілді – бұл деңгей негізгі саудада соңғы рет 26 наурызда байқалған.
Негізгі сессия бейсенбіде 2,5 % өсіп, $159,30 болды. Бұл 27 наурыздан бергі ең жоғары жабылу бағасы.
Есепте не туралы айтылды
YouTube табысы нарық күтулеріне сәл ілесе алмады: кіріс жылдық есепте 8,5 % өсіп, $8,93 млрд болды, ал StreetAccount дерегі бойынша сарапшылар $8,97 млрд күткен.
Other Bets бөлімшесінің сатылымы (мұнда Waymo автопилотты жүйесі мен Verily биотехнологиялық компаниясы кіреді) өткен жылға қарағанда 9 % төмендеп, $450 млн-ды құрады. Алайда шығын артты. Alphabet мәлімдегендей, Waymo Сан-Франциско, Лос-Анджелес, Финикс және Остинде толық автономды төлемді 250 000-нан астам сапар жүзеге асырады. Бұл көрсеткіш ақпан айында, Остинде қызметі іске қосылмай тұрып, 200 000 болған.
Қаржы директоры Анат Ашкенази сарапшыларға 2025 жылға арналған негізгі капиталдық шығыстарды шамамен $75 млрд деңгейінде сақтайтындарын хабарлады. Сондай-ақ директорлар кеңесі өткен жылғыдай $70 млрд көлемінде акцияларды қайта сатып алу бағдарламасын бекітті. Дивидендтер 5 % өсіріліп, акцияға $0,21-ге жеткізілді. Компания дивиденд төлеуді тек 2024 жылы бастап еді.
Инвестор үшін маңыздысы
Alphabet есебі осы маусымда технологиялық компаниялардың есеп жариялауларының бағытын айқындайды, – деп жазады Bloomberg. Google антимонополиялық іс-шараларда жеңіліп, ЖИ саласындағы бәсекенің күшеюіне қатысты алаңдаушылыққа тап болып, осы қиындықтарды шешуге миллиардтаған доллар жұмсауды жалғастырады.
Alphabet-тің бұлттық қызметі ЖИ бумының компанияның сатуына қалай әсер етіп жатқанының маңызды көрсеткіші. Өнімділігін арттыру үшін қосымша есептеу қуаты қажет стартаптар Google Cloud-тың клиентіне айналуда. Amazon мен Microsoft-пен салыстырғанда сәл артта қалса да, бұл Alphabet өсуінің негізгі бағыттарының бірі.
Екінші тоқсан қатарынан клиенттер сұранысы деректер орталықтарының қуатынан асып келеді, – деді қаржы директоры Ашкенази. Сондықтан Alphabet ЖИ-ге инвестиция салуды жалғастырып, серверлер мен деректер орталықтарына шығындарын ұлғайтуда. Есепті тоқсандағы капиталдық шығыны $17,2 млрд – бұл Wall Street болжамынан сәл жоғары. Bloomberg ескертетіні: Alphabet ЖИ-ға жасалған үлкен инвестицияларды ақтайтын жарнама мен бұлттық қызметтер кірісін өсіруді жалғастыруы тиіс.
Сарапшылар не дейді
Жыл басынан бері Alphabet акциялары шамамен 16% арзандады. MarketWatch мәліметіне сүйенсек 68 сарапшыдан 47-і Buy, 9-ы Overweight, 12-і Hold рейтингісін беріп, сатып алуды ұсынады, сатуға шақырып отырғандар жоқ. Wall Street-тің ортақ таргеті — акцияға $201,8, бұл 24 сәуірдегі жабылу бағасынан 26,7% жоғары.
