Alphabet Wiz стартапын сатып алуға қайта оралды

Google компаниясының бас құрылымы Alphabet өткен жылы сәтсіз аяқталған келіссөздерден кейін бұлттық киберқауіпсіздік саласындағы Wiz стартапын сатып алу идеясын қайта қарастырып жатыр, деп хабарлайды The Wall Street Journal. Егер мәміле жүзеге асса, ол Google тарихындағы ең ірі сатып алу болмақ. Дегенмен, АҚШ-тағы екі антимонополиялық талаппен бетпе-бет келген компанияға реттеушілердің мақұлдауын алу қажет. Келісімді мақұлдау процесі басқа технологиялық компаниялар үшін жаңа әкімшіліктің ұстанымын түсінуге бағыт-бағдар болуы мүмкін.

Толығырақ

Alphabet бұлттық қауіпсіздікті қамтамасыз ететін Wiz стартапын сатып алу жөнінде келіссөздерді қайта бастағанын хабарлады, деп жазады The Wall Street Journal дереккөздерге сілтеме жасап. Олардың айтуынша егер күтпеген кедергілер туындамаса, мәміле жақын арада аяқталуы мүмкін. WSJ мәліметінше Alphabet және Wiz өкілдері түсініктеме беруден бас тартқан.

Егер мәміле сәтті аяқталса, Wiz-дің сатып алынуы Alphabet тарихындағы ең ірі келісім болады, деп жазады Bloomberg. Қазіргі рекорд 2012 жылы Google-дың Motorola Mobility-ді 12,5 млрд долларға сатып алуына тиесілі. Ал Wiz компаниясын Alphabet шамамен 30 млрд долларға бағалап отыр, бұл өткен жылғы ұсыныстан 30%-ға жоғары.

Дүйсенбі күнгі сауда барысында Alphabet-тің A класты акциялары 0,7%-ға төмендеп, 164,3 долларды құрады, ал Nasdaq Composite индексі 0,3%-ға өсті.

Wiz туралы не белгілі

Wiz — бұлттық киберқауіпсіздік саласындағы ең қарқынды дамып келе жатқан стартаптардың бірі, деп жазады WSJ. Ол 2020 жылы Microsoft пен бұған дейін Microsoft сатып алған Adallom компаниясының бұрынғы қызметкерлері негізін қалаған. Өткен жылдың соңында компания 16 млрд долларға бағаланған. Оған Кремний алқабының әйгілі венчурлық инвесторлары, соның ішінде Sequoia Capital, Andreessen Horowitz, Index Ventures және Greenoaks қаржы құйды.

Wiz-ді сатып алу Alphabet-тің бұлттық есептеулер саласындағы позициясын нығайтуы мүмкін. Бұл — қарқынды дамып келе жатқан, болашағы зор бағыт, онда компания әлі де негізгі бәсекелестерінен артта қалып келеді. Wiz-дің озық қауіпсіздік құралдары Google-ға өзінің бұлттық платформасына көбірек клиент тартуға көмектеседі, деп түсіндіреді WSJ.

Өткен жылы Alphabet Wiz-ді 23 млрд долларға сатып алуды ұсынған, бірақ келіссөздер нәтижесіз аяқталды — Wiz IPO-ға дайындыққа назар аударуды жөн көрді. Алайда IPO нарығындағы жағдайдың белгісіздігіне байланысты Wiz қайтадан әлеуетті инвесторлармен келіссөздер жүргізе бастады, деп хабарлайды WSJ дереккөздері.

2024 жылы тараптар Wiz-дің Google құрамында жеке бөлімше болып қала ма, әлде бұлттық бизнесіне біріктіріле ме деген сұрақ төңірегінде келісе алмады, деп жазады WSJ. Сонымен қатар, Wiz және оның кейбір инвесторлары реттеуші кедергілерді еңсеруге кететін уақытқа алаңдады. Бұл бас тарту Google үшін ауыр соққы болды, себебі компания жоғары бәсекелі бұлттық сервис нарығында Microsoft пен Amazon-нан қалып қою қаупін сезінді, деп атап өтті Bloomberg.

Контекст

Wiz Amazon Web Services және Microsoft Azure бұлттық жүйелерімен жұмыс істейді, қашықтағы серверлердегі деректерді қауіптер мен осалдықтарға тексереді. Alphabet-тің бұл стартапты сатып алуы антимонополиялық бақылауға ілігеді және Ақ үйдің жаңа антимонополиялық саясаты үшін тест болуы мүмкін, деп жазады WSJ.

Wall Street Трамп әкімшілігі кезінде бірігу және сатып алу мәмілелерін реттеуге жұмсақ көзқарас болады деп күткен. Алайда жаңа әкімшілікте ірі технологиялық компанияларға скептикалық көзқарас сақталған, оның ішінде вице-президент Джей Ди Вэнс те бар. Антимонополиялық реттеушілердің алғашқы әрекеттері нарық үшін күтпеген жағдай болды, деп жазады басылым. Трамп тағайындаған Федералдық сауда комиссиясының төрағасы Эндрю Фергюсон өзінің алдындағы Лина Ханның қатаң антимонополиялық саясатын жалғастыратынын мәлімдеді, бұл реттеушілерге келісімдерді бұғаттау өкілеттігін кеңейтуге мүмкіндік береді. Сондай-ақ, Фергюсонның риторикасында популизм белгілері байқалады, деп атап өтті WSJ.

Google реттеушілердің бұл келісімді мақұлдауға дайындығын сынап көреді. Қазіргі уақытта компания АҚШ-та екі монополтяға қарсы тергеумен бетпе-бет келуде. Бірінде сот Google-ды іздеу жүйесі нарығында монополист деп таныды, енді компанияға ықтимал санкциялар талқылануда. Байден әкімшілігі тіпті Google-ды Chrome браузерін сатуға мәжбүрлеуді ұсынды. Екінші істе АҚШ Әділет министрлігі Google-ды интернет-жарнама нарығында монополия құрды деп айыптауда. Қараша айында тараптар өз дәлелдерін ұсынуды аяқтады және енді сот шешімін күтуде.