Jefferies: Nike және тағы үш компания сауда келісімінен пайдаға кенелді
АҚШ пен Қытай арасындағы сауда соғысында жарияланған үзіліс кейбір компаниялар үшін оң нәтиже бере бастады. Jefferies сарапшыларының пікірінше, бұл жағдайдан ең көп пайда көргендер – Қытай тауарларына 145 пайыздық баж салығын алдын ала есепке алып, өз болжамдарын соған сай бейімдеген компаниялар.
Олардың қатарында спорт киімін өндіретін Nike, туристік және аңшылық жабдықтарымен танымал Yeti, тұрмыстық техника сататын SharkNinja және қолжетімді тауарлар желісі Five Below бар. 12 мамырдағы сауда-саттықта бұл компаниялардың акциялары 7%-дан 20%-ға дейін қымбаттады.
Мысалы, Five Below акциялары бір күнде 20%-дан астамға өсті, өйткені Қытай – осы бөлшек сауда желісінің ең ірі жеткізушісі болып қала береді.
Егжей-тегжейі
Jefferies сарапшылары неге Nike, Yeti, SharkNinja және Five Below компанияларының акцияларын сатып алуға кеңес береді? Компаниялардың акцияларын сатып алуға негізгі себеп – шығындарының қысқаруы. Олар бұрын енгізілген Қытай тауарларына 145% кедендік баж салығын өз бизнес-модельдеріне ертерек бейімдеген. Енді бұл ставка үш айға 30%-ға дейін төмендетілді.
Jefferies Barron’s басылымына жолдаған жазбасында былай дейді:
«Қытайлық баж салығының қысымына қарамастан, кең ауқымды және танымал брендтер бұл шығындардың орнын толтыра алады. Енді, келіссөздер алға жылжыған сайын, компаниялар шығындарын едәуір қысқартуға үміттене алады. Себебі олардың көпшілігі болжамдарын 145%-дық мөлшерлемеге сүйеніп құрған».
Мысалдар:
Nike үшін Қытай өткен тоқсанда компания табысының 15%-ын әкелді. Ал енді АҚШ кроссовкаларын Қытайға импорттау салығы 125%-дан 10%-ға дейін төмендеді. Бұл америкалық компания үшін үлкен мүмкіндік.
Five Below тауарларының басым бөлігі АҚШ-тан тыс жерде өндіріледі, ал Қытай – негізгі жеткізуші ел.
Yeti мен SharkNinja инвесторлар тарапынан жоғары баж салығына байланысты сенім жоғалту мәселесіне тап болған еді.
Нәтижесінде, Вашингтон мен Пекин арасындағы келісім жарияланған соң, аталған компаниялардың акциялары күрт қымбаттады:
Nike – +7%, Dow индексінде көш бастаушылар қатарында болды.
Yeti – +13%.
Five Below – +20,8%, бұл 2020 жылғы наурыздан бергі ең ірі күндік өсім.
SharkNinja – +7,2%.
Контекст
АҚШ пен Қытай арасындағы өзара баж салығына жарияланған үзіліс нарықтағы көңіл күйді айтарлықтай өзгертті. Barron’s басылымының жазуынша, бұл жаңалықтардан ең көп пайда көргендер — тұтынушылық компаниялар. 12 мамырда бүкіл қор нарығының өсуі де осы жаңалықтар негізінде болашаққа деген көзқарастың жақсарғанын білдіреді.
«Бұлайша тез және қарқынды өсу сауда мен баж салығына қатысты риториканың жақсаруының арқасында болды», — дейді Edward Jones инвестициялық стратегия бөлімінің басшысы Мона Махаджан Barron’s-қа берген сұхбатында.
Нәтижесінде бөлшек сауда мен тұтынушылық сектор компаниялары ұтты. Amazon мен Tesla секілді «Керемет жетілік» өкілдері, сондай-ақ Starbucks пен Nike кіретін Consumer Discretionary Select Sector SPDR биржалық қоры 5%-ға өсті.
Алайда бұл үзілістен тек ритейл ғана емес, басқа салалар да ұтысқа шығуы мүмкін, дейді BCA Research компаниясының АҚШ акциялары бойынша бас стратегы Айрин Танкел. Оның айтуынша, бұған дейін баж салығының қысымын сезінген чип өндірушілер, автокөлік компаниялары және өнеркәсіптік кәсіпорындар да енді айтарлықтай өсу көрсеткіштеріне жете алады.
Мысалы:
* Жасанды интеллектке арналған чиптер шығаратын Nvidia акциясы 5,5%-ға өсті;
* PHLX Semiconductor жартылай өткізгіштер индексі — +7%;
* GM (General Motors) акциясы — +4,5%;
* Chrysler иесі Stellantis — +6,5%;
* Stanley Black & Decker құрал-жабдық өндірушісі — +15,7%.
«Трамп әкімшілігінің кей әрекеттері нарық тұрақтылығын бұзды. АҚШ-қа қатысты ашу-ыза мен белгісіздік көп болды, бірақ бұл, бәлкім, уақытша құбылыс шығар», — дейді Танкел.
