АҚШ Конгресі криптовалюталар жөніндегі алғашқы заң жобасын мақұлдады
17 шілде күні АҚШ Конгресі ел тарихында алғаш рет криптовалюта нарығын реттейтін заң жобасын мақұлдады. Бұл құжат долларға байланған стейблкоиндерді реттеуге арналған негізгі ережелерді белгілейді.
Жоба президенттің қол қоюына жолданды. Бірақ Дональд Трамптың оған қол қоятынына еш күмән жоқ, өйткені бұл бастаманы өзі ұсынған. Бұл туралы Bloomberg хабарлады.
Егжей-тегжейі
АҚШ Конгресі бейсенбіде GENIUS Act деп аталатын заң жобасын бекітті. Оның толық атауы — Guiding and Establishing National Innovation for US Stablecoins Act.
Құжат республикалық партия өкілдерінің бастамасымен дайындалған және Дональд Трамптың тікелей қолдауына ие. Бұл заң доллармен байланған токендерге мемлекеттік бақылау енгізеді. Мұндай токендер түрлі цифрлық платформалар арасында еркін айнала алады.
GENIUS Act долларлық стейблкоиндерге арналған базалық ережелерді бекітеді. Олардың ішінде токендер толықтай АҚШ валютасымен немесе қысқа мерзімді мемлекеттік облигациялармен қамтамасыз етілуі керек деген талап бар. Бұл активтер федералды немесе өңірлік реттеушілердің бақылауында болуы тиіс.
Қолдаушылардың пікірінше, мұндай реттеу есеп айырысу процесін жеделдетіп, арзандатуға көмектеседі. Сонымен қатар, жалпы құны $265 млрд-қа жеткен криптонарыққа заңды мәртебе береді. Citigroup болжамына сүйенсек, бұл нарық 2030 жылға қарай $3,7 трлн-ға дейін өсуі мүмкін.
Заң жобасы маусымда Сенаттан өтті. Енді АҚШ Өкілдер палатасынан да көппартиялық қолдаумен мақұлданды. Енді тек президенттің қолы қажет. Бұған дейін Трамп Республикалық партия депутаттарын бұл жобаны қолдауға жеке өзі үгіттеген.
Криптонарық қалай әсер етті?
— Биткоин заң жобасын күтудің әсерінен рекордтық $123 мыңға дейін қымбаттады. Бірақ бейсенбіде $117,5–119,9 мың аралығында саудаланып, кешке қарай 0,5%-ға төмендеді.
— Екінші ең ірі стейблкоин USDC шығарушысы Circle Internet Group акциялары негізгі саудада 0,8%-ға өсті. Кеңейтілген сессияда баға өзгерген жоқ. Маусым айында заң жобасы Сенатта қабылданғанда, Circle акциялары бірден 34%-ға өскен болатын.
— Криптобиржа Coinbase Global акциялары күндіз 3,2%-ға, кейін қосымша сессияда тағы 0,7%-ға қымбаттады. Robinhood Markets акциялары да 2,1% және 0,5% өсім көрсетті.
— Биткоинның ең ірі корпоративтік иесі Strategy акциялары биткоинмен бірге 1%-ға төмендеді.
— Майнинг компаниясы MARA Holdings бағалы қағаздары 2,7%-ға өсті.
Уолл-стрит не дейді?
Brookings Institution аға ғылыми қызметкері Эсвар Прасад:
«Бұл құжат стейблкоин индустриясына бұрыннан қажет заңды мәртебені береді. Ең бастысы — реттеу тым қатал емес», — деді Bloomberg агенттігіне.
Алайда бәрі бірдей бұл заңды жетістік деп бағаламайды, деп жазады MarketWatch. Pangaea Policy аналитикалық компаниясының негізін қалаушы Терри Хейнс:
«Шын мәнінде, Вашингтонда криптовалютаға қатысты үлкен қолдау жоқ», — деді.
Ол бұл заң жобасының қабылдануын криптоиндустрия үшін ұзақ уақытқа жететін жалғыз жеңіс деп атады.
«Криптовалютаға қызығушылық танытатын инвесторлар қысқа уақыттық эйфорияны сезінуі мүмкін. Бірақ ол тез өшеді, себебі шынайы жағдай басымдық алады», — деді ол.
Сын мен қауіптер?
Кейбір демократ-сенаторлар заң жобасын сынға алды. Олар бұл реттеу тұтынушыларды толық қорғауға кепіл бола алмайды деп есептейді. Егер стейблкоин шығарушы компаниялар банкротқа ұшыраса, нарық қиындыққа тап болуы мүмкін.
Bloomberg мәліметінше, стейблкоин-шоттарға жаппай ауысу жағдайында цифрлық токендер банктердегі депозиттердің бір бөлігін өзіне тартып алуы мүмкін.
Агенттік хабарлауынша, АҚШ-тың ірі банктері бұл қысымды қазірдің өзінде сезініп отыр. Апта ішінде өткен қаржылық есеп беру конференцияларында JPMorgan бас директоры Джейми Даймон, Bank of America басшысы Брайан Мойнихэн және Citigroup жетекшісі Джейн Фрейзер пікір білдірді.
Олар цифрлық доллардың төлем жүйелеріндегі банктердің үстемдігіне қауіп төндіретінін айтты. Сонымен қатар, жауап ретінде қарсы шаралар әзірлеп жатқанын мәлімдеді.
Жаңа заң жобасы банктер мен төлем жүйелеріне өз стейблкоиндарын шығаруға мүмкіндік береді. Соңғы апталарда JPMorgan мен Citigroup осындай токендерді жасауды зерттеп жатқанын көрсеткен.
«Криптоапта» Конгресте?
Бейсенбіде АҚШ Өкілдер палатасы криптовалюта нарығын реттейтін тағы екі заң жобасын қабылдады.
— CLARITY Act — цифрлық активтердің құқықтық мәртебесін анықтайды.
— Anti-CBDC Surveillance State Act — мемлекеттік цифрлық валюталар құруға тыйым салады.
Бұл құжаттар енді Сенатта қаралуы тиіс.
Алайда TD Cowen сарапшысы Джарет Зайбергтің айтуынша, CLARITY Act жобасының Сенатта екіпартиялық қолдауы жоқ. Сондықтан оның қашан өтетіні белгісіз.
«Бұл заң жобасының қабылдануы символдық маңызға ие. Бірақ шынымен маңыздысы — Сенат қандай нақты тұжырымдарға келісе алатыны», — деді сарапшы осы аптада. Barron’s дерегінше, бұл құжаттың соңғы нұсқасы биылғы жылдың соңына дейін немесе келесі жылдың басында ғана дайын болады деп күтіледі.
