АҚШ пен Ұлыбритания арасында сауда келісімі жасалды. Бұдан қай салалар ұтады?
АҚШ президенті Дональд Трамп пен Ұлыбритания премьер-министрі Кир Стармер 16 маусым, дүйсенбі күні өткен G7 саммитінде өткен айда одақтастар арасында келісілген сауда келісіміне қол қойылғанын жариялады. «Біз оған қол қойдық, енді бәрі бітті. Бұл екі тарап үшін де әділ мәміле. Ол көптеген жұмыс орындарын құрып, мол кіріс әкеледі», — деді Трамп Sky News таратқан мәлімдемеде.
Тараптар мынадай шарттар бойынша келісімге келді:
— АҚШ британдық аэроғарыштық өнімдерге, соның ішінде ұшақ қозғалтқыштары мен қосалқы бөлшектерге салынатын баж салығын алып тастауға міндеттеледі, делінген Ақ үй сайтында жарияланған келісім мәтінінде. Қазір бұл өнімдерге қолданылатын ставка 10%-ды құрайды.
— Жылына 100 мыңға дейінгі автокөлік импортына салынатын баж салығы 27,5%-дан 10%-ға дейін төмендетілуі тиіс. Сондай-ақ автокомплекттерге де 25%-дың орнына 10% мөлшерінде баж салығы салынады.
— Тараптар британдық дәрі-дәрмектер мен олардың құрамдас бөліктеріне қатысты сауда жеңілдіктері бойынша келіссөздерді жалғастыруға уағдаласты.
— АҚШ британдық болат пен алюминий өнімдеріне тарифтік квоталар белгілейді. Бұл шектеуден тыс импорт бұрынғыдай жоғары баж салығымен салынады. Ақ үй сайтында жарияланған жарлыққа сәйкес, бұл квоталар Ұлыбритания болат жеткізу тізбектерінің қауіпсіздігін және өндірістік қуаттардағы жағдайдың талаптарға сай екенін растай алған жағдайда ғана күшіне енеді.
Ұлыбритания АҚШ-қа болат импорттау кезінде 50% баж салығынан босатылған жалғыз ел болып отыр, бұл ел үшін ставка 25%-ды құрайды, деп еске салады Sky News. Бұл баж салығы толық алынып тасталады деп күтілген еді, алайда Ұлыбритания үкіметі «негізгі болат түрлеріне нөлдік баж енгізу жолында алға жылжу үшін жұмыс жалғасады» деп мәлімдеді. АҚШ президенті болатқа қатысты нөлдік ставка туралы сұраққа жауап бере отырып, бұл ақпарат кейінірек жарияланатынын айтты.
Сол күні кешке АҚШ президенті мен Канада премьер-министрі Марк Карни G7 саммиті аясындағы кездесу қорытындысы бойынша 30 күн ішінде сауда келісімін жасауға уағдаласты, деп хабарлады Канаданың үкіметі жариялаған есеп. The Wall Street Journal басылымының жазуынша, тараптар Канададан келетін болат, алюминий және автокөлік бөлшектеріне салынатын баж салығын алып тастауға мүмкіндік беретін келісім жайында келіссөз жүргізіп жатыр. Трамп журналистерге берген сұхбатында кейбір келіспеушіліктердің барын атап өтті, бірақ сауда келісімі алдағы апталарда «жасалуы мүмкін» екенін айтты.
