Alibaba акциясы 11% шарықтады: ЖИ табысы өсімді жалғастыра ма?
Қытайдың интернет алыбы Alibaba-ның қағазы АҚШ-тағы саудада тоқсандық есептен кейін шамамен 11% күрт өсті. Компания жасанды интеллект пен бұлтты сервистен түсетін табыстың екі таңбалы өсімін хабарлады. Бұл инвесторлардың көзінде жалпы сатылымның баяулауын және операциялық пайданың төмендеуін көлеңкеде қалдырды. Бұдан бөлек, нарыққа Wall Street Journal жариялаған жаңалық та әсер еткен болуы мүмкін: онда Alibaba жаңа жасанды интеллект чипін жасағаны айтылды. Компания Қытайға жеткізуге тыйым салынған Nvidia процессорын алмастыруға тырысуда.
Егжей-тегжейлі
Alibaba-ның депозитарлық түбіртегі АҚШ-тағы сауда ашылғаннан кейін көп ұзамай 10,6% қымбаттап, бір қағазы $132,3 болды. Бұл – мамыр айының ортасынан бергі максимум.
Қытайдың электронды коммерция алыбы 29 тамызда жасанды интеллектке байланысты өнімдерден түсетін табыстың сегізінші тоқсан қатарынан «үш таңбалы» өсім көрсеткенін хабарлады. Сондай-ақ 30 маусымда аяқталған тоқсан қорытындысы бойынша бұлтты бөлімшенің табысы 26% артқан.
Тоқсан қорытындысы бойынша Alibaba-ның таза пайдасы $5,9 млрд құрады, бұл күтілген $3,7 млрд-тан едәуір жоғары болды. Бұған инвестицияларды қайта бағалау мен түрік маркетплейсі Trendyol-дағы үлесін сату әсер етті, деп жазады Barron’s. Алайда жалпы табыс болжамнан төмен шықты: бар болғаны 2% өсіп, $34,6 млрд болды (күтілгені $35 млрд). Операциялық пайда 3% қысқарып, $4,9 млрд-ты құрады.
Бұлт пен ЖИ-ден түскен табыс инвесторларды біраз тыныштандырды, себебі олар Қытайдағы бағалық соғысқа алаңдап отыр еді. Alibaba Meituan және JD.com компанияларымен бірге қатаң бәсекелестік жағдайында нарықтағы үлесін сақтап қалуға тырысуда, деп жазады Bloomberg. Қысымның күшеюі салаға әсер етіп жатыр: JD.com-ның тоқсандағы пайдасы екі есеге азайды, ал Meituan ірі залал күтілетінін ескертті. Соның салдарынан осы аптада үш компанияның акциясы бірлесіп $27 млрд-қа арзандады.
Қытайдағы тұтынушылар сенімін ұзаққа созылған жылжымайтын мүлік дағдарысы, жалақы өсімінің төмен қарқыны және жаһандық саудадағы іркілістер әлсіретіп отыр. Тіпті агрессивті жеңілдіктер де сатып алушылардың сақтығын бұза алмады, деп толықтырды Bloomberg.
Технологиялық серпіліс пе?
Barron’s болжамынша, инвесторларға сенім берген тағы бір фактор – Alibaba компаниясының технологиялық жетістігі болуы мүмкін. The Wall Street Journal мәліметінше, Alibaba жасанды интеллекттің жұмысын қамтамасыз ету үшін кең ауқымды міндеттерді орындай алатын өз чипін жасап шықты. WSJ атап өткендей, бұл чип компанияның бұрынғы үлгілерімен салыстырғанда бір қадам алға ілгерілеген.
Alibaba мен басқа да қытайлық технологиялық алыптар АҚШ шектеулеріне байланысты Қытайға жеткізе алмайтын америкалық Nvidia-ның озық өнімдеріне балама жасауға тырысып жатыр, дейді Barron’s.
Investing.com дерегінше, Alibaba-ның бұл жетістігі – Пекиннің жасанды интеллект саласында өзіне тәуелсіз жеткізу тізбегін қалыптастыруға бағытталған кең ауқымды стратегиясына сәйкес келеді. Ал Financial Times 27 тамызда хабарлағандай, қытайлық чип өндірушілер жасанды интеллектке арналған микросхема өндірісін үш есе арттыруды жоспарлап отыр. Мақсат – ұлттық экожүйе қалыптастырып, Nvidia-ның жаһандық көшбасшылығына бәсекелестік тастау.
Сарапшылар пікірі
Alibaba Қытай нарығындағы қатты бәсекелестік жағдайында жасанды интеллектке және жаңа онлайн-сауда модельдеріне инвестиция салу мен өсімді көрсету қажеттілігінің арасында тепе-теңдік сақтап отыр, дейді CNBC. Инвесторлар әзірге бұл қадамын оң бағалауда: АҚШ-та саудаланатын акциясы жыл басынан бері шамамен 40% қымбаттап, MSCI China индексінің (28%) өсімінен асып түсті.
Benchmark сарапшысы Фон Цзянның айтуынша, бұлтты сервис пен генеративті ЖИ жеткізуші ретіндегі Alibaba-ның позициясы әлі де мықты. Benchmark компания қағазын сатып алуды ұсынады, деп жазады Barron’s.
MarketWatch деректері бойынша, Alibaba түбіртегіне қатысты 44 сарапшының ұсынысы бар. Олардың басым бөлігі дерлік сатып алуға кеңес береді (32 рейтинг – Buy, 10 – Overweight): тек екеуі ғана қағаздарды ұстау (Hold) дұрысырақ дейді. TipRanks мәліметінше, Alibaba акциясының орташа мақсатты бағасы $148,5 деңгейінде, бұл ағымдағы бағадан шамамен 13% өсу әлеуетін білдіреді.
